«Նրան սպասելիս». առաջնախաղ՝ Ռուսական թատրոնի Փոքր բեմում

Կ. Ստանիսլավսկու անվան ռուսական դրամատիկական թատրոնի Փոքր բեմի խաղացանկը կհամալրի ժամանակակից դրամատուրգ և ռեժիսոր Միխայիլ Խեյֆեցի «Նրան սպասելիս» պիեսը՝ Ելենա Վարդանյանի ռեժիսուրայով։

Մ․ Խեյֆեցը դրամատիկական և գրական տարբեր միջազգային մրցույթների մրցանակակիր և դափնեկիր է։

«Նրան սպասելիս» պիեսը գրվել է 2010թ.։ Այն բեմադրվել է ռուսաստանյան տարբեր թատրոններում։ Ինքը՝ հեղինակը, այն ժանրային առումով բնութագրել է որպես քնարական կատակերգություն։

Առաջին հայացքից սա իսկապես կատակերգություն է, բայց մի փոքր տխուր։ Բեմում տարբեր տարիքի չորս կանայք են։ Յուրաքանչյուրն իր ճակատագրով, իր զգացմունքային դրամայով: Համացանցի միջոցով նրանք ծանոթանում են մի տղամարդու հետ և շտապում այգի ժամադրության՝ ակնկալելով ինչ-որ հրաշքի, ազատվելու մենակությունից, առօրյա դժվարություններից։ Արդյո՞ք ճակատագիրը բարեհաճ կլինի նրանց նկատմամբ, և նրանց երազանքն իրականություն կդառնա:

Ներկայացման մեջ խաղում են Լալիտա Բուկիան, Լիանա Սևումյանը, Ելենա Եսայանն ու Յուլիա Ժդանովան: Ներկայացման բեմանկարիչը Արթուր Հարությունյանն է, երաժշտական ձևավորումը՝ Ելենա Վարդանյանի, խորեոգրաֆիան՝ Նունե Կիրակոսյանի:

Ներկայացումը նախատեսված է 16+ անձանց համար:

Առաջնախաղերը կկայանան սեպտեմբերի 4-ին, 11-ին,  20-ին, 21-ին և 28-ին: