Գոնե հիմա լսեք, եթե, իհարկե, Հայրենիքը թանկ է բոլորիս համար. Բալասանյան

Արեւմտյան Բալկանների հարցերով ԱՄՆ հատուկ ներկայացուցիչ Գաբրիել Էսկոբարն այսօր հայտարարել է, որ եկել է մոռանալու սկզբունքը, թե Կոսովոն Սերբիա է, այլ հայտարարելու նոր սկզբունքի մասին՝ Սերբիան ու Կոսովոն Եվրոպա են։ Անդրադառնալով վերոնշյալին՝ ԵՊՀ միջազգային հարաբերությունների եւ դիվանագիտության ամբիոնի դոցենտ, պատմական գիտությունների թեկնածու ԳՐԻԳՈՐ ԲԱԼԱՍԱՆՅԱՆԸ գրում է. «Հասկանում եք, մենք ինչ ենք կորցրել վերջին 30 տարիների ընթացքում: ԱՄՆ հայկական կազմակերպությունները, հայկական լոբբիստական կազմակերպությունները հենց այս հարցով պետք է հիմնականում զբաղվեին, կազմակերպություններ, որոնց հզորության մասին խոսում էր նաեւ Բժեզինսկին։ Պետք է աշխատեին, որ այսօր Կոսովոյի նախադեպը վերաբերվեր նաեւ Արցախին։ Ունեինք իրավունք փոշիացնել հայկական հզոր լոբբիի պոտենցիալը: Չունեինք, բայց չարեցինք հնարավորն ու անհնարը Արցախի հայության իր պատմական Հայրենիքում ապրելու անբեկանելի իրավունքը ապահովելու համար։ Չօգտագործեցինք ԽՍՀՄ չարիքի կայսրություն հռչակած ԱՄՆ իսթեբլիշմենթի հետ նրբորեն աշխատելու համար։ Ինչպես կարելի է ԽՍՀՄ սահմանները համարել հիմք տարածքային ամբողջականության ապահովման համար, եթե հենց Ադրբեջանը իրեն չէր համարում այդ պետության իրավահաջորդ:  Չէինք հասկանում, շատ էինք ինքնավստահ, հավատում էինք համաշխարհային արդարության գաղափարին, մեր պայքարն արդար էր, ու դա պետք է բոլորն ընդունեին: Ոչ եւ երիցս ոչ։ Պետք էր աշխատել։ Տքնաջան աշխատել։ Օգտագործել շանտաժը, քծնանքը, նույն ապրանքը մի քանի տեղ վաճառելու հնարավորությունը։ Չարեցինք, արխային ընկանք ու հիմա ունենք այն, ինչ ունենք։ Կադրերն են որոշում ամեն ինչ, ասում էր մի շատ խելացի մարդ։ Ցանկացած ձախողում ունի կոնկրետ անուն և ազգանուն, զգուշացնում էր մի շատ փորձված մարդ։ Չլսեցինք։ Գոնե հիմա լսեք, եթե, իհարկե, Հայրենիքը թանկ է բոլորիս համար»։