«Աշխատարաններ՝ միջազգային փորձի փոխանակմամբ. ԳԱԿ – Կրեավիվա (Creaviva Children's Museum)» ծրագիրն եզրափակվեց ամփոփիչ ցուցահանդեսով

Գեղագիտության ազգային կենտրոնի (ԳԱԿ) և Շվեյցարական Պաուլ Կլեե Կենտրոնում (Zentrum Paul Klee) գործող Creaviva մանկական թանգարանի համատեղ իրականացրած ծրագրի շրջանակում արվեստագետը հուլիսի 21-ից օգոստոսի 16-ը աշխատարաններ և վարպետության դասեր անցկացրեց Երևանի, Վանաձորի և Գորիսի հաշմանդամություն ունեցող և չունեցող երեխաների ու պատանիների համար, ինչպես նաև փորձի փոխանակման հանդիպումներ ունեցավ ԳԱԿ ուսուցիչների հետ։

20 տարվա արվեստի դասավանդման փորձ ունեցող Ֆրանց Բրուլհարթը (Franz Brülhart) Հայաստանում գտել է այն, ինչն, իր խոսքով, արդեն մոռացված է արևմուտքում՝ բաց, անկեղծ մարդկային հարաբերությունները։ Ասում է՝ իր կյանքն ամբողջությամբ պտտվում է մարդկանց ու գույների շուրջ, և հուսով է, որ իր մեթոդներով աշխատարանների մասնակիցներն ավելի մոտեցան արվեստին և սիրեցին այն նորովի։

«Աշխատարաններ՝ միջազգային փորձի փոխանակմամբ. ԳԱԿ – Կրեավիվա (Creaviva Children's Museum)» ծրագիրը, որն իրականացում էր ՀՀ կրթության, գիտության, մշակույթի և սպորտի նախարարության դրամաշնորհի շրջանակում, եզրափակվեց ամփոփիչ ցուցահանդեսով։

ԳԱԿ Պատկերասրահում (Աբովյան 13) այս օրերին ցուցադրվում են ծրագրի շրջանակում մասնակիցների ստեղծած աշխատանքները։

Ֆրանց Բրուլհարթը հուսով է, որ հաջորդ տարի նորից կայցելի Հայաստան՝ ավելի մեծ ծրագրով, որ կարողանա ավելի շատ երեխաների ու պատանիների մոտեցնել գույների կախարդական աշխարհին։