Հանգուցալուծումից առաջ. ինչո՞ւ են թիրախավորել հատկապես ՀՀԿ–ին

Անժելա Թովմասյանի ուղիղ եթերում ՀՀԿ հին, փորձառու դեմքերից մեկը` Գագիկ Մինասյանը, հիմնավորեց, որ հանգուցալուծումը մոտ է: Եթերում հնչած փաստարկներին չենք անդրադառնա, սակայն չենք կարող չնշել, որ բացի ներքաղաքական պատճառներից, ակնհայտ երևում է խոշոր խաղացողների` կապիտուլյանտի և վերջինիս թիմի վրա «վրաերթերի» հանգամանքը:

Սեփական թունդ ամերիկամետությունը չթաքցնող ԱԺԲ–ի գրասենյակի շրջակայքում բավականին շատ են զինվորական հագուստով շրջողները, ԱԺԲ–ի գործիչներն էլ բացեիբաց խոսում են զենքի ուժով կապիտուլյանտին իշխանազրկելու մասին: Ճիշտ է, ԱԺԲ–ին հարկ է դիտարկել որպես թատերականացված «շիրմա», իսկ գործողությունը (եթե լինի) կիրագործեն PR–ի հակումներ չունեցող ավելի լուրջ տղաները, սակայն նման է, որ Վաշինգտոնը միջնորդավորված տարբերակով սպառնալիք է կախել կապիտուլյանտի գլխին...

Իսկ ռուսները պաշտոնական դիվանագիտական խողովակներով բացեիբաց «վրաերթ» են կատարում Նիկոլի խունտայի վրա: Խոսքը ՌԴ դեսպանատան նոտայի մասին է, որի առիթն է «տեղական լրատվադաշտի» լուսանցքում` ԱԺԲ–ին հարող և առավելապես արտերկրում բազավորվող Տելեգրամ ալիքներում Ռուսաստանի` «Սուրմալուի» պայթյունին մեղսակցության մասին հրապարակումները, որոնք բնութագրվել են «սրբապիղծ»: Բայց ուշագրավը ոչ այնքան տեքստն է, որքան նոտան ներկայացնելու եղանակը: «Ավանդական» ընթացակարգով դեսպան Վաղարշակ Հարությունյանին պիտի հրավիրեին ՌԴ ԱԳՆ և հանձնեին նոտան, սակայն գերադասեցին շրջանցել աստիճանակարգը և ՀՀ–ում ՌԴ դեսպանատունը նոտան ուղարկեց ՀՀ ԱԳՆ–ին: Դա ոչ այլ ինչ է, քան գործող իշխանության ցուցադրական նվաստացում, և ընդամենը մեկ օր անց էլ ճեպազրույցի ժամանակ ՌԴ ԱԳՆ տեղեկատվության և հրատարակության դեպարտամենտի տնօրենի տեղակալ Իվան Նեչաևը հայտարարում է. «Մոսկվան պատասխան է ակնկալում ՀՀ ԱԳՆ-ից՝ մեր դեսպանատան ուղարկած բողոքի նոտայի առնչությամբ»: Նա նշել է, որ ՀՀ–ում ՌԴ դեսպանատան ժամանակավոր հավատարմատարը հանդիպում է ունեցել ՀՀ ԱԳՆ ներկայացուցիչների հետ և սպասում են համապատասխան պարզաբանման: Կարճ ասած` Նիկոլին և նրա խունտային ասում են, որ պիտի պատասխանեք անհապաղ, այլ ոչ թե ընթացակարգով նախատեսված 10–30 օրվա ընթացքում:

Թե ինչ հարցում է կապիտուլյանտը «քցել» գերտերություններին և հարուցել նրանց զայրութը` առանձին թեմա է, որը միգուցե կապ ունի Բերձորի միջանցքի արագացված հանձնման և Ադրբեջանի հետ անցակետերի բացման ոչ պակաս արագացված նախաձեռնության հետ, սակայն ծանրագույն հետևանքներով հղի զայրույթի առկայությունն անվիճելի իրողություն է:

Եվ ահա այս պայմաններում լրատվական դաշտը և սոցցանցերը կեղտոտվում են ՀՀԿ–ի և վերջինիս առաջնորդ Սերժ Սարգսյանի դեմ վայրահաչություններով, ու հայ «կոլեգաներին» ձայնակցում են նաև ազերիները: Իհարկե, «նախկիններին» թուրքը և նրա հայաստանյան կամակատարները միշտ էլ թիրախավորել են, սակայն հիմա կա շեշտադրումների էական դրեյֆ դեպի ՀՀԿ և ՀՀ Երրորդ նախագահ: ՀՀԿ փոխնախագահ Արմեն Աշոտյանն էլ մասշտաբների ընդլայնում է արձանագրում. «Հայաստանի պետականության շարունակական փլուզման եւ հայ հասարակության լիակատար ապատիայի համատեքստում, որոշ շրջանակներ, որոնք իրենց հռչակում են հականիկոլական, սկսեցին կեղտոտ արշավ` ընդդիմության ճամբարի դաշնակիցներին, մասնավորապես` ՀՀԿ-ին  վարկաբեկելու ուղղությամբ:

Իմ ասածը վերաբերում է ուժերին եւ անհատներին ինչպես երկրի ներսում, այնպես էլ սփյուռքի տիրույթում: Հատկապես անառողջ «հակումով»  Հայաստանի երրորդ նախագահ Սերժ Սարգսյանի եւ Հայաստանի Հանրապետական կուսակցության հանդեպ վերջերս առանձնացել է մեդիագործիչ Արամ Գաբրելանովը, ով հայտնի է նեղ եւ անհայտ` լայն շրջանակներում, որն իր ինքնամոռաց հակասերժական էքստազի մեջ չի խորշում գլորվել փաշինյանական մեդիամանիպուլյացիաների` նիկոլական փտած գարշահոտ փչող աղբավայրերերի  մակարդակի»:

Բնականաբար, հարց է ծագում` ինչո՞վ է ՀՀԿ–ն իր առաջնորդով այդ աստիճանի ատելի դարձել ոչ միայն ազերիաթուրքական և նրանց կատարածու նիկոլական շրջանակների, այլև հականիկոլական դիրքավորում ունեցող որոշ շրջանակների և գործիչների համար: Կարծում ենք` այդ գործընթացի կատալիզատոր է ծառայել այն, որ խունտայի խնդրի հանգուցալուծումն օբյեկտիվորեն մոտիկացել է: Մրցակիցներ ոչ ոք չի սիրում: Իսկ ՀՀԿ–ն «Դիմադրության շարժման» անհնազանդության տևական ակցիաների ընթացքում աչքի ընկավ իր կազմակերպվածությամբ: Այդ թիմի ոչ այնքան մեծ ռեսուրսը շատ արդյունավետ է կառավարվել, հատկապես աչքի ընկնելով երիտասարդական կառույցի գործողությունների համարձակությամբ և լավ արդյունքներով: Իզուր չէ, որ նիկոլապահ ենիչերիները` կարմիր և սև բերետավորները, հատկապես լարվում են, երբ տեսնում են ՀՀԿ ԵԿ տղաներին և աղջիկներին: 

Այդ թիմում ճիշտ է կազմակերպված աշխատանքը երիտասարդների հետ և պատշաճ ուշադրություն կա սերնդափոխության հարցի նկատմամբ, և իհարկե դա էապես պայմանավորված է թիմի առաջնորդի որակներով և մոտեցումներով: Բոլորի աչքի առաջ է երիտասարդ պատգամավորներ Հայկ Մամիջանյանի, Տիգրան Աբրահամյանի և Աննա Մկրտչյանի արդյունավետ և ՔՊ–ին խելագարության նոպաների հասցնող արդյունավետ աշխատանքը ինչպես խորհրդարանում, այնպես էլ դրսում: Իսկ անհնազանդության ակցիաների ընթացքում երիտասարդական կառույցի մի շարք ներկայացուցիչներ արագորեն ակտիվիստից աճեցին լիարժեք քաղաքական գործչի մակարդակի:

Միաժամանակ և՛ Սերժ Սարգսյանը, և՛ ՀՀԿ գործիչները մշտապես բացառիկ պարկեշտություն են դրսևորում պայքարի դաշնակից ուժերի և դեմքերի նկատմամբ, ինչն արժանի է ընդօրինակման: Դաշնակցից սովերելն, անշուշտ, ավելի արդյունավետ և կառուցողական տարբերակ է, քան տարատեսակ խանդի տեսարանները:

ՀՈՎՀԱՆՆԵՍ ԳԱԼԱՋՅԱՆ