Կա՛մ Արցախը կշարունակի մնալ հայկական, կա՛մ ինքներս մեզ կգնդակահարենք, բայց մեր հողում կմնանք. ինչ են մտածում արցախցիները

Ադրբեջանի նախագահ Իլհամ Ալիեւը ադրբեջանական կենտրոնական հեռուստատեսությանը տված հարցազրույցում հայտարարել է, թե Ղարաբաղում բնակվող հայերը չեն ունենա ո՛չ կարգավիճակ, ո՛չ անկախություն, ո՛չ որեւէ այլ առանձնաշնորհում կամ արտոնություն: Ղարաբաղում բնակվող հայերը, ըստ Ալիեւի պետք է կատարեն «ճիշտ ընտրություն» եւ ինտեգրվեն ադրբեջանական հասարակությանը: Սակայն, այս հայտարարությունն արցախցիների վրա էական ազդեցություն չի ունեցել: Առկա տրամադրությունների մասին «Իրավունքը» մանրամասներ է պարզել հենց Ստեփանակերտում:

Ալիեւի նման հռետորաբանության վերաբերյալ կարծիքներն իրարամերժ են: Մեծ մասը գտնում է, որ Ալիեւին չի հաջողվելու իրականացնել իր եւ հոր երազանքը, ավելին՝ հավատում են, որ ռուսների օգնությամբ՝ Արցախը կրկին ոտքի կկանգնի: Եվ եթե այսօր Ալիեւը ոգեւորված հայտարարություններ է անում, ապա վաղը լացելու է, ինչպես մենք ենք լացում Շուշին մեզնից խլելու համար:

ՎՅԱՉԻՍԼԱՎ պապը մեզ հետ զրույցում անդրադառնալով Ալիեւի հերթական սպառնալիքներին՝ ինքն էլ հարց ուղղեց. «Ալիեւն ո՞ւմ դռան շունն է, որ իր խոսքն էլ արցախցին մեկնաբանի: Ճիշտ է, Արցախի համար հիմա շատ ծանր ժամանակաշրջան է, գոյի պայքար ենք տալիս, բայց ոչ մի րոպե չենք կոտրվում: Որ պահին էլ հույզերը տեղի են տալիս, հիշում ենք մեր թոռներին ու տղաներին, ովքեր իրենց կյանքը զոհաբերեցին, որ մենք ապրենք Արցախում: Ամեն անգամ Արցախ մուտք գործելիս հեռվից տեսնում ենք, որ Շուշիում ադրբեջանական դրոշներ են ծածանվում ու սրտներիցս արյուն է կաթում: Բայց սա էլ է ամրապնդում մեր պայքարը, որ մի օր նորից հասնենք Շուշի»:

Ըստ արցախցի Վյաչիսլավի, նորություն չէ, որ Ալիեւն ասում է, թե Արցախը պետք է լինի ադրբեջանական. «Հիմա աշխարհաքաղաքական իրավիճակն այնպիսին է, որ գուցե Ալիեւի եւ իր մեծ եղբոր էրդողանի համար շահավետ իրավիճակ է ստեղծվել, բայց ժամանակավոր է: Չգիտեմ՝ Հայաստանի իշխանություններն ինչքանով են կանգնած Արցախի կողքին, բայց տեղի իշպանությունը, անհատներս կանգնած ենք Արցախում եւ թույլ չենք տալու, որպեսզի Արցախի մնացած մասը թուրքի ձեռքը ընկնի: Հավատում ենք, որ ռուս խաղաղապահների օգնությամբ՝ կկարողանանք վերադարձնել նաեւ Շուշին ու Հադրությը, որոնք մեզնից խլեցին դավադիր պայմանավորվածությունների արդյունքում»:

ՍԵՐԳԵՅ պապն էլ էր նույնքան վճռական տրամադրված: Նա էլ մեր հարցին հարցով պատասխանեց. «Արցախ է մնացել, որ Արցախից խոսենք, ով ոնց կարողացավ Արցախը խուրդեց: Ասում են՝  կտոր-կտոր տալու ենք, մեզ պատերազմով են վախեցնում: Բայց երեք պատերազմ տեսած ժողովուրդ ենք, մեզ պատերազմով վախեցնել չի լինի: Կա՛մ կմնանք Արցախում ու Արցախը կշարունակի մնալ հայկական, կա՛մ ինքներս մեզ կգնդակահարենք, բայց մեր հողում կմնանք»:

ԻԼՈՆԱ ԱԶԱՐՅԱՆ

Արցախ-Երեւան

Այս թեմայով Անբարոյական մոտեցում է, եթե ՊՆ նախարարը գտնում է, որ բանակի ողբերգական դեպքերում իր մեղքը չկա 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան ՇՏԱՊ. Նարիմանյանը ցույց է տալու այն մարդկանց, ովքեր դիմակով և առանց դիմակի բռնության են ենթարկել. Խորխոռունու սպանության հետքերով Փաշինյանի առաջ Ալիև՞ն է պահանջ դրել, որ կառավարության երդման տեքստը փոփոխության ենթարկեք, կասկածե՞նք Հունգարիան վտարում է 10 ռուս դիվանագետի