Դատապարտում եմ խաղաղ  բնակչությանը թիրախավորելը եւ կապ չունի, թե դա ում կողմից է իրականացվում․ Հայտնի փաստաբանի ուշագրավ դիտարկումը

ԶԼՄ-ները հայտնում են Ղրիմի Նովոֆեդորովկա գյուղի մոտ տեղակայված ռուսական ավիաբազայի տարածքում մի քանի ուժգին պայթյունների մասին։ Նովոֆեդորովկան գտնվում է Սև ծովում, Ղրիմի արևմտյան ափին գտնվող Սակի քաղաքի մոտ: Դատելով բաց աղբյուրներից՝ այստեղ են գտնվում ռազմական օդանավակայանը և ՌԴ ՊՆ ուսումնավարժարանը։

ՌԴ ՊՆ-ն հաստատել է պայթյունները, հայտնելով, որ ավիացիոն զինամթերթի դետոնացիան մի քանի պայթյուն է առաջացրել Սակի օդանավակայանի տարածքում։ Պայթյունի հետևանքով զոհեր և վիրավորներ չկան, ավիացիոն տեխնիկան չի տուժել, հայտնել են նախարարությունից։

Վերը նշյալի շուրջ «Իրավունքը» զրուցել է հայտնի փաստաբան, բոլոր ոլորտներում օբյեկտիվ իրականությունը ներկայացնող Լեվ Գրուպ փաստաբանական ընկերության հիմնադիր-ղեկավար ԼԵՎՈՆ ԲԱՂԴԱՍԱՐՅԱՆԻ հետ, ով փաստեց․

-Թիրախավորել եւ հարվածել խաղաղ  բնակչությանը դա պատերազմ չէ, դա միջազգային իրավանորմով կոչվում է ցեղասպանություն։ Ցավոք, երբ ադրբեջանցի խուժանը թիրախավորում էր Ստեփանակերտը, Շուշին եւ այլ խաղաղ բնակավայրեր աշխարհը լուռ էր։ 

Անդրադառնալով Ղրիմը թիրախավորելուն պետք է արձանագրեմ  նախ, որ որպես իրավապաշտպան դատապարտում եմ խաղաղ  բնակչությանը թիրախավորելը եւ կապ չունի, թե դա ում կողմից է իրականացվում։ Ակնհայտ է, որ Ուկրաինայի իշխանությունը անցել է հոգեբանական գրոհի, որը կարճ էֆֆեկտ է ունենալու, սակայն կործանարար է լինելու հենց Ուկրաինայի եւ ցավով եմ արձանագրում նաեւ Ուկրաինայի քաղաքացիների համար։

-Պարոն Բաղդասարյան, Դուք այսօր գրառում էիք կատարել, որ մեր երկրի առջեւ ծառացած խնդիրները կարող ենք հաղթահարել միասնական ջանքերով, այդ միասնականության շունչը Դուք տեսնո՞ւմ եք։

-Ոչ միայն տեսնում եմ, այլեւ գտնում եմ, որ այսօր առավել քան երբեւէ անհրաժեշտ է, որ ե՛ւ իշխանությունը, ե՛ւ ընդդիմությունը ե՛ւ սփյուռքը, որովհետեւ, երբ գալիս են ու քեզ պատերազմ պարտադրում՝ դու չես կարող խաղաղությամբ այն դիմավորել։ Ընդառաջ գնալով խաղաղության պայմանագրին, այն պետք է լինի արժանապատիվ, իսկ արժանապատիվ լինելու համար հարեւան մելիքությունը պետք տեսնի, որ մենք միասնական են եւ մեկ բռունցք, որի պարագայում կլռեն բոլոր բաշիբոզուկները։ 

ԻԼՈՆԱ ԱԶԱՐՅԱՆ