Դուք ինձ հունից հանում եք, համառորեն ուզում եք ինձանից ինչ-որ պատասխան ստանալ. Վահե Հակոբյանի նյարդերը այլեւս տեղի են տալիս

Օրերս «Հայաստան» խմբակցության պատգամավոր Արթուր Ղազինյանը մանդատը վայր դրեց, որից հետո մամուլում խոսվում է մյուս պատգամավորների մանդատը հավանական վայր դնելու մասին։ 

Նկատենք, որ Ղազինյանը մանդատ վայր դնելու վերաբերյալ մասնավորապես ասել է. «Պատճառների մասին հիմա չեմ ցանկանում խոսել. դրանք կրում են բացառապես քաղաքական ու մարտավարական բնույթ: Այս պահին կարող եմ միայն ասել, այս ԱԺ-ում որևէ օրակարգով իմ հետագա աշխատանքն այլևս չեմ պատկերացնում, իսկ այդ պայմաններում պահպանել ԱԺ պատգամավորի կարգավիճակը, չեմ կարող. առնվազն ազնիվ չէ»:

Ազնի՞վ է համարում արդյոք շարունակել նույն ձեւաչափով վայելել պատգամավորական մանդատը հարցի պատասխանը փորձեցինք շատ բարեհամբյուր կերպով պարզել  Ազգային ժողովի տնտեսական հարցերի մշտական հանձնաժողովի նախկին նախագահ, «Հայաստան» խմբակցության պատգամավոր Վահե Հակոբյանից, ով բավականին նյարդային տոնով միանգամից ասաց.

- Էդ հարցը խնդրում եմ ուղղեք պարոն Ղազինյանին, թե ինքը ինչ դրդապատճառով է մանդատը վայր դրել:

- Ես Ձեզ եմ հարցնում, Դուք ազնիվ եք համարո՞ւմ Ձեր հետագա գործունեությունը պատգամավորի կարգավիճակում:

-Ես պարոն Ղազինյանի քայլերը չեմ մեկնաբանում:

- Ես Ձեզ եմ հարցնում, ոչ թե պարոն Ղազինյանի քայլերն եմ խնդրում մեկնաբանել:

- Պարոն Ղազինյանը ունի իր պատկերացումները ու ինքը իր համար... միգուցե իր համար արդար է, որը ես չեմ կարող կիսել:

- Դուք ինքներդ Ձեր հետագա աշխատանքը ազնիվ համարո՞ւմ եք:

- Դուք ինձ հունից հանում եք, համառորեն ուզում եք ինձանից ինչ-որ պատասխան ստանաք: 

- Խնդրում եմ հարցիս պատասխանեք:

- Կարող ա ես չիներեն եմ խոսում, ես ասել եմ այսօր բազմաթիվ անգամ, որ մենք սեպտեմբերին մոտ շատ ավելի հստակ մեր դիրքորոշումը կհայտնենք:

- Պարոն Հակոբյան...

- Ես էլ չեմ կարող խոսել Ձեզ հետ, շնորհակալություն, ցտեսություն:

- Էսպես ե՞ք խոսում ՀՀ քաղաքացու հետ:

- Ցտեսություն...

ԻԼՈՆԱ ԱԶԱՐՅԱՆ