Հնդկաստանը 3 ամսում 50 անգամ ավելացրել է ռուսական նավթի ներմուծումը.The Economic Times

Հնդկաստանի նավթավերամշակող ընկերությունները ապրիլից հունիս ընկած ժամանակահատվածում 50 անգամ ավելացրել են ռուսական հում նավթի գնումները։ Այս մասին ուրբաթ հայտնել է The Economic Times-ը՝ հղում անելով կառավարական աղբյուրներին։

Նրանց տվյալներով՝ վերջին երեք ամսվա ընթացքում ռուսական նավթի ներմուծումն աճել է 50 անգամ, և այժմ առաջին անգամ ռուսական նավթին բաժին է ընկնում Հնդկաստանի կողմից դրսից գնվող ամբողջ հում նավթի 10%-ը։ Մինչև փետրվարի 24-ը այն չէր գերազանցում հնդկական կողմի գնումների ընդհանուր ծավալի 0,2%-ը։

«Այժմ Ռուսաստանը Հնդկաստանին նավթ մատակարարողների տասնյակում է: Մայիսին Ռուսաստանը շրջանցեց Սաուդյան Արաբիային և դարձավ այդ հումքի երկրորդ խոշոր արտահանողը հանրապետություն Իրաքից հետո», - ասել են աղբյուրները:

Նրանք նշել են, որ Հնդկաստանը օգտվել է իրավիճակից, երբ Ռուսաստանի Դաշնությունը սկսել է նավթը վաճառել մեկ բարելի համար մինչև 30 դոլար զեղչով այն ժամանակ, երբ համաշխարհային էներգակիրների գները զգալիորեն բարձրացել են: Մայիսին Հնդկաստանը գնել է մոտ 25 մլն բարել ռուսական նավթ։