Իրականում ինչ է տեղի ունեցել Արթիկի Վետերանների Միությունում. Նոր, բացառիկ մանրամասներ

Օրերս համացանցում մեծ աղմուկ բարձրացավ Արթիկում տեղի ունեցած միջադեպի փաստով: Մասնավորապես, տեղեկություն տարածվեց համացանցում, որ  «ինչ-որ թափթփուկներ, գիշերը մտել են Արթիկի վետերանների միության շենք, վնասել գույքը, այրել ապրիլյան և 44 օրյա պատերազմի հերոսների նկարները»:

 «Իրավունքը» փորձեց հետաքրքրվել Արթիկի փոխքաղաքապետ Մակյանից, թե ով եւ ինչի համար է դիմել նման սրբապիղծ արարքի, ով, սակայն, հերքեց մարդկային գործոնի միջամտությունը, ներկայացնելով հետեւյալը.

-Այն ինչ ներկայացված է մամուլում խեղաթյուրված փաստ է, քաղաքականացվում է չեղած բան:

-Այսինքն նման դեպք չի՞ եղել:

-Եղել է, բայց հրդեհի հետեւանք է եղել:

-Հրդեհի հետեւանքո՞վ են վնասվել գույքը, այրել ապրիլյան և 44 օրյա պատերազմի հերոսների նկարները:

-Այո, գույքը վնասվել է, բայց 44-օրյա պատերազմի տղաների լուսանկարներ կամ առհասարակ այրված նկարներ չկան, չկա նման բան, ոնց բացատրենք:

- Լուսանկարներ չեն եղել փակցված:

-Ոչ եղել են 1941թ. պատերազմի վետերանների լուսանկարները, որոնք ծխահարվել են, բայց ոչ մի 44-օրյա պատերազմի հերոսների լուսանկարներ, ոչ էլ քառօրյայի չի եղել:

-Իսկ, ինչի՞ց է հրդեհ բռնկվել:

-Այդ օրը կարկուտ էր, քամի ուժգին, էլեկտրական լարերի հետ է ամենայն հավանականությամբ կապված: Ոստիկանությունը հիմա քննում է:

-Իսկ, ինչպե՞ս եք տեղեկացել:

-Դիմացից են նկատել, զանգել ԱԻՆ ու էդպես բոլորս տեղեկացել ենք:

ԻԼՈՆԱ ԱԶԱՐՅԱՆ