ԶԱՐՄԱՆՔ

(Կարդալ բջջային տարբերակը)

Խունտան զարմանալիորեն փորձում է «դաժան դիկտատուրայի» դեր խաղալ, բայց ինչպես միշտ, ստացվում է տնազ: Այսպես, առավոտյան փաստաբան Բենիկ Գալստյանն ահազանգեց. «Այսօր` ժամը 07:15-ին ոստիկանության աշխատակից ներկայացած առանց տարբերանշանների ինչ-որ անհասկանալի համազգեստով անձինք խաբեությամբ` խուզարկություն կատարելու պատրվակով մուտք են գործել ՀՀԿ երիտասարդական կազմակերպության նախագահ ՀԵՆՐԻԽ ԴԱՆԻԵԼՅԱՆԻ բնակարան եւ նրան տարել անհայտ ուղղությամբ: Մինչ այս պահը փորձում եմ պարզել Հենրիխի գտնվելու վայրը»: Հետո արագ պարզվեց, որ անհասկանալի նպատակներով երիտասարդ քաղաքական գործչին տարել են Գյումրի, այնուհետ նա ազատ արձակվեց, եւ պատգամավոր Հայկ Մամիջանյանի հետ վերադարձավ մայրաքաղաք` անհնազանդության ակցիաներին իր մասնակցությունը շարունակելու: Այս ամբողջ պատմությունը զարմանալիորեն ցույց է տալիս` այս կապիտուլյանտներից «պինոչետ» չի ստացվի, շատ մանր ու էժան են դրա համար: Եվ Արմեն Աշոտյանն իրավամբ արձանագրեց. «Այս ստոր ձեռագրով Հենրիխին եւ մեզ վախեցնել չի ստացվի, գործ սարքել` նույնպես: Նիկոլի բռնապետական երազախաբությունը սպասարկող ուժայիններին` ամոթ եւ պարսավանքի ցից»:

Ոստիկաններն էլ այնպիսի սանձարձակ բռնություն են ծավալել ցուցարարների հանդեպ, որ անգամ ՔՊ-ական ՄԻՊ-ը արձանագրել է բազում զարմանալի դեպքեր, մասնավորապես. «Իրականացված արագ արձագանքման այցերի ժամանակ բերման ենթարկված քաղաքացիների կողմից համատարած բարձրացված խնդիր է եղել բերման ենթարկելիս անձանց կոկորդին սեղմելու, խեղդելու միջոցով բերման ենթարկելու պրակտիկան: Մեկ այլ դեպքում, ըստ վարչական ձերբակալման ենթարկված քաղաքացիների պնդման, անձին բերման ենթարկելիս ոստիկանության ծառայողները նրան ոչ թե նստեցրել են իրենց մեքենան, այլ նետել են մեքենայի մեջ, այնուհետեւ մեքենայում նաեւ հայհոյել»: Իսկ ամենախայտառակ միջադեպը, որն արձանագրել են տեսախցիկները` որ սեւբերետավոր ոմն արարած նաեւ թքում է բերման ենթարկվածի վրա... Ի դեպ, մամուլին արդեն հայտնի է դարձել, որ հիշյալ` ուղտերի դասին պատկանող մենթազավրը ոստիկանության զորքերի հատուկ վաշտի պայմանագրային ծառայող է, հրամանատար, փոխգնդապետ ՀՈՎՀԱՆՆԵՍ ԶԱՔԱՐՅԱՆՆ է: Դե ինչ ասես... յա՜խք:

Սակայն անդրադառնանք ավելի պոզիտիվ թեմաների: Մայիսի 8-ին` «Հարսանիք լեռներում» օպերացիայի 30-ամյա տարեդարձին բազում ընդդիմադիրների ուղղվել է այն հարցը` ինչպե՞ս պետք է Շուշին վերադարձվի մայր հայրենիքի գիրկը: Այդ հարցը քանիցս ուղղվել էր Ֆրանսիայի հրապարակ եկած ՍԵՐԺ ՍԱՐԳՍՅԱՆԻՆ, ով 30 տարի առաջ իր ստորագրությամբ վավերացրել էր օպերացիայի պլանը: ՀՀ երրորդ նախագահ Սերժ Սարգսյանի զարմանալի լակոնիկ պատասխան է տվել այդ հարցին` ինչ պետք է անել Շուշին կրկին հայկական դարձնելու համար. «Դրա համար պետք է, որ նրանք, ովքեր Շուշին հայկական չեն համարում, գնան իրենց տները, որից հետո կարողանան մարդիկ, ովքեր հայկական են համարում, լրջորեն զբաղվել այդ հարցով»: Սպարտացիների հակիրճությանը չզիջող պատասխան է` հստակ եւ սպառիչ: Եվ իրոք, որեւէ ազգային գերխնդրով լրջորեն զբաղվել հնարավոր է միայն այս չհայ խունտայից ձերբազատվելուց հետո: Իսկ առանց դրա, որեւէ խնդրի լուծումը գործնականում անհնարին է, եւ դա թող ականջին օղ անեն բազում «բազմոցային» փորձագետները, ովքեր վերամբարձ քննադատում են պայքարողներին:

Զարմացած է ՀՈՎՀԱՆՆԵՍ ԳԱԼԱՋՅԱՆԸ