Աղվան Հովսեփյանի ղեկավարած դատախազության դատախազները քննության ժամանակ վարվել են մի քանի անգամ ավելի բիրտ ու դաժան

Քննվում է նախկին գլխավոր դատախազ Աղվան Հովսեփյանի խափանում կալանավորման հարցը։ Որպես իրավապաշտպան հակված եմ, որպեսզի դատարանը վերացական դատողություններով անձին չպահի կալանքի տակ, իսկ գրավի ինստիտուտից համարձակ օգտվի՝ անկախ առերևույթ կատարած արարքի ծանրությունից։
Ընդհանրապես չէի անդրադառնա այս անձնավորությանը, եթե երեկ նիստի ժամանակ վերջինիս քողարկված խոսքերի տակ չփորձեր ,,ուսուցանել,, մեղադրող կողմին։ Արձանագրում եմ, որ տասնամյակներ շարունակ Աղվան Հովսեփյանի ղեկավարած դատախազության դատախազները կալանքի միջնորդություններ քննության ժամանակ վարվել են մի քանի անգամ ավելի բիրտ ու դաժան՝ թքած ունենալով ինչպես անձի կործանվող ճակատագրի, արդարադատության շահի, այնպես էլ պետության շահի վրա, չհաշված դատավորների վրա տոտալ ճնշումները։ Կարևորագույնը եղել է իրենց գլխավոր պապայի կամքն ու ցանկությունը:
Եվ սա է իրականությունը և իրականությունից չես փախչի։
Իսկ բումերանգի օրենքը գործում է:
Ո՞րն է ելքը: Խոստովանել, խոստովանել ի պաշտոնե արածի բացասական, հասարակության համար կործանարար հետևանքները, հայցել հասարակության ներողամտությունը, խնդրել, որպեսզի գնահատեն նաև լավ կողմերը։ Եվ ամենակարևորներից, համարձակություն ունեցեք տառապելու, դրա ուժով մաքրվելու, հաղթահարելու, ներելու, ներվելու ու սիրելու։ Եթե փոխեք ձեր գիտակցությունը, ինձ կհամարեք ձեր լավ բարեկամը։

Լևոն Բաղդասարյան, փաստաբան