Եթե Փաշինյանի իշխանությունը տեւեց եւս ամիսուկես, Արցախը ճանաչվելու է Ադրբեջանի կազմում. Գալստյան

Եթե ընդամենը մեկ տարի առաջ տեղի ունեցած արտահերթ ընտրություններին այս իշխանության դեմ պայքարում էին շուրջ երկու տասնյակ քաղաքական ուժեր, ապա այսօր նրանցից ընդամենը մի քանիսն է ակտիվ: Ընտրություններին մասնակցած քաղաքական ուժերից որոշակի հատված կարճ ժամանակ անց բացահայտվեց որպես իշխանության «գրպանային» ֆեյք ընդդիմություն, իսկ մի հատվածն էլ դեմ է ե՛ւ իշխանությանը, ե՛ւ այսօր փողոցում ակտիվություն դրսեւորող ընդդիմադիր ուժերին: Այս մասին «Իրավունքը» զրուցեց արտահերթ խորհրդարանական ընտրություններին մասնակցած «Հայոց հայրենիք» կուսակցության նախագահ ԱՐՏԱԿ ԳԱԼՍՏՅԱՆԻ հետ: Նա ասաց, որ չեն միանալու այս իշխանության դեմ համաժողովրդական պայքար սկսած քաղաքական ուժերին:

– Պարոն Գալստյան, իսկ ի՞նչ է պատրաստվում անել առաջիկայում «Հայոց հայրենիք» կուսակցությունը:

– Ասեմ ձեզ, որ ելքը շատ մոտ է: Թե ինչ ենք պատրաստվում անել, թույլ տվեք, շատ չծավալվել, բայց որպեսզի ձեր հետաքրքրությունը սպառեմ, ասեմ, որ «Հայոց հայրենիքը» եւ «Հայրենիքի կանչ» նախաձեռնությունը միանշանակ լինելու են ընդդիմություն-իշխանություն սեւ ու սպիտակ խաղից դուրս: Բացարձակապես մենք դրանց չենք մասնակցելու, որովհետեւ ոչ մի տեղ չտանող ճանապարհ է: 

– Այսօր խորհրդարանական ընդդիմությունից բացի, փողոցում այս իշխանության դեմ պայքարում են նաեւ «Սեւ հովազներ» կազմակերպությունը, «5165 շարժումը»: Նրա՞նց էլ ցանկություն չունեք միանալու: 

– «5165 շարժման» վերաբերյալ թույլ տվեք չպատասխանեմ: Ինչ կապված է «Սեւ հովազների» հետ, մենք նրանց հետ մեկ մարմին ենք: Ամբողջովին ինչ անում են «Սեւ հովազները», «Հայոց հայրենիք» կուսակցությունը միահամուռ իրենց կողքին կանգնած է: Ընդ որում` միակ ուժն է, որ այսօր Ազատության հրապարակում նստացույց է անում` պահանջելով իշխանափոխություն եւ կառավարման համակարգի փոփոխություն: 

– Ամեն դեպքում, կբացե՞ք փակագծերը, թե որն է Ձեր առաջարկած այլընտրանքը ստեղծված իրավիճակում:

– Այլընտրանքը մենք առաջարկել ենք դեռեւս անցյալ ընտրությունների ժամանակ: Հույս ունենք, որ այս անգամ այդ այլընտրանքն ավելի շատ ձայներ կհավաքի: Գոնե թե այն առումով, որ չենք թողնի Նիկոլ Փաշինյանին եւս մեկ անգամ կեղծել ընտրությունները:

– Այսօր մի շարք ընդդիմադիր ուժեր ահազանգում են, որ այս իշխանության օրոք Արցախը կարող է ճանաչվել Ադրբեջանի կազմում: Ի՞նչ կասեք այս մասին:

– Շատ ճիշտ են հայտարարում... Եթե Նիկոլ Փաշինյանի իշխանությունը տեւեց եւս ամիս կամ ամիսուկես, այդ ընդդիմությունով, բոլորով իրար հետ` Արցախը ճանաչելու են Ադրբեջանի կազմում:

– Իսկ ինչպե՞ս եք վերաբերվում առանց նախապայմանների` հայ-թուրքական հարաբերությունների կարգավորման գործընթացին:

– Մեր կուսակցությունը եւ նախաձեռնության անդամներն այս տարի ապրիլի 24-ին Ծիծեռնակաբերդի հուշահամալիր էին բարձրացել ԱՍԱԼԱ-ի այն տղաների նկարներով, ովքեր վրեժ են լուծել Հայոց ցեղասպանության համար: Կարծում եմ` դրանով մենք հստակ ենք արտահայտել մեր դիրքորոշումը` քանի դեռ այդ վրեժը լուծված չէ, քանի դեռ մեր նախնիների հոգիները խաղաղված չեն, որեւիցե հարաբերություն չեն կարող կարգավորվել թուրքերի հետ` անկախ նրանից, թե ով ինչքան գումար է վաստակում կամ ինչ տնտեսական հաշվարկներ է անում` ուրանալով անգամ հարազատ եղբոր արյունը...

ՀՐԱՆՏ ՍԱՐԱՖՅԱՆ

Այս թեմայով Վիրավոր իմ Հայաստան, դու դեռ ուղղելու ես քո ողնաշարը Թող մեր եռագույնը միշտ հպարտ ծածանվի ազատ և խաղաղ երկնքի տակ «Հայրենիք» կուսակցությունը կենդանության նշույլներ է ցույց տալիս ՇՏԱՊ. Հայաստանի կառավարությունը վարձել է արեւմտյան լոբբիստական գործակալություն Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար