Կայացավ «Նիկոլ հեռացի՛ր» պահանջով առաջին հանրահավաքը. Ռեֆորմիստները միայն շիշ բռնող չունեին (Ֆոտոշարք)

Մատենադարանի դիմաց կայացավ Ռեֆորմիստների կուսակցության հանրահավաքը, որին էլ հաջորդեց երթը դեպի Հանրապետության հրապարակ: Երեւանյան փողոցներում, կարծես, նաստալգիա էր 2018 թվականի դեպքերի. Էլի մերժում էին, բայց այս անգամ գործող վարչապետ Նիկոլ Փաշինյանին, էլի ցուցարարներին միացավ շուն, որն ուղեկցեց նրանց մինչեւ վերջ՝ կնքվելով Ռեֆորմիստների Չալո անունով, էլի հնչում էր երգ, բայց ոչ թե Հայկ Ստվերի երգերից, այլ ՀՀ վաստակավոր արտիստ Շուշան Պետրոսյանի, էլի ասում էին, որ «Մենք ենք տերը մեր երկրի», բայց ոչ թե մենք ասելով նկատի ունեին հպարտ, այլ արժանապատիվ քաղաքացիներին, էլի ցուցարաներին միացան երթեւեկող մեքենաները իրենց ազդանշաններով ողջունելով, էլի ցույցն առաջնորդողի ձայնը խզվում էր ու էլի կար շիշ, բայց այս դեպքում՝ ռեֆորմիստները հատուկ շիշ բռնող չունեին, որին էլ հետո կարող էին վարձատրել, օրինակ, պատգամավորական մանդատով:

Ի դեպ, հատկանշական էր այն, որ Մատենադարանից մինչեւ Հանրապետության հրապարակ որեւէ քաղաքացի չհանդիպեց ցույցի մասնակիցներին, որը կհակառակվեր «Ստո՛պ Նիկոլ», «Նիկոլ հեռացի՛ր» վանկարկումներին, բացառությամբ մի քաղաքացու, որի անհամաձայնությունը լռեցվեց ցույցի մասնակիցների էլ ավելի բարձր ու ակտիվ իրենց պահանջը հնչեցնելով: Իսկ վերջում այն հրապարակում, որտեղ ընդամենը երկու տարի առաջ «հպա՜րտ քաղաքացիները» հասան նրան, որ իշխանական աթոռներին հայտնվեցին իրենց ուզած մարդիկ, հիմա շնորհակալություն էին հայտնում Ռեֆորմիստների կուսակցության նախագահ ՎԱՀԱՆ ԲԱԲԱՅԱՆԻՆ՝ կայացած երթի ու հանրահավաքի համար, եւ խնդրում հայտարարել՝ հաջորդ հանրահավաքի օրվա մասին:

Նյութը եւ լուսանկարները՝ ՀՐԱՆՏ ՍԱՐԱՖՅԱՆԻ