Մեկնարկեց 12 տարի առաջ ոստիկանությունում կասկածյալին ծեծի ենթարկելու գործով դատավարությունը

12 տարի առաջ ոստիկանությունում մահակով և հակագազով ցուցմունք կորզելու գործով մեղադրվող Արաբկիրի բաժնի քրեական հետախուզության բաժանմունքի նախկին պետ Վաչագան Ներսիսյանն ու Ոստիկանության Ճամբարակի բաժնի պետ Նարեկ Սիմոնյանը, ում լիազորություններն այժմ ժամանակավորապես դադարեցված են, այսօր հրաժարվեցին լրագրողների հարցերին պատասխանել։

Վաչագան Ներսիսյանը ոչինչ չասաց: Նրա փաստաբանի խոսքով, հիմա տրամադրվածություն չունեն, հաջորդ նիստին կխոսեն:

Իսկ Նարեկ Սիմոնյանն էլ ասաց, թե «շոուն վերջացել է». – «Չեմ ցանակնում ձեր հարցերին պատասխանեմ, շոուն վերջացել ա... Գնացեք շոումեններին հարցը տվեք»:

Սիմոնյանին և Ներսիսյանին մեղադրանք է առաջադրվել պաշտոնեական լիազորություններն անցնելու համար, որը զուգորդվել է բռնությամբ, զենք կամ հատուկ միջոցներ գործադրելով։

Ըստ մեղադրանքի, 2008 թվականի նոյեմբերին Արաբկիրի բաժնի քրեական հետախուզության բաժանմունքի պետի պաշտոնը զբաղեցրած անձն իր աշխատասենյակում, նույն բաժանմունքի ծառայողների, այդ թվում ավագ օպերլիազորի, Ոստիկանության Ճամբարակի բաժնի պետի մասնակցությամբ, բնակարանային գողության փորձ կատարելու դեպքի շուրջ զրուցել է հանցագործությունը կատարելու կասկածանքով ոստիկանության բաժին բերման ենթարկված Արմեն Մարտիրոսյանի հետ: Երբ կասկածյալը հերքել է դեպքին առնչություն ունենալու հանգամանքը, ոստիկանության պաշտոնյան և ոստիկանության մի շարք այլ ծառայողներ, գողության փորձ կատարելու դեպքը խոստովանելու պահանջ ներկայացնելով, Արմեն Մարտիրոսյանին գցել են գետնին, գլխին անցկացրել հակագազ և ձեռքերով ու մահակով հարվածներ հասցրել նրա մարմնի տարբեր մասերին՝ պատճառելով ֆիզիկական ցավ։

Այս դեպքից միայն 11 տարի անց՝ համացանցում հայտնվեց «Ոստիկանները հակագազով ու մահակով ցուցմունք են կորզում» վերտառությամբ աղմկահարույց տեսանյութը, որի առնչությամբ Հատուկ քննչական ծառայությունում քրեական գործ հարուցվեց։ Նախաքննության ընթացքում պարզվեց բռնության ենթարկված անձի ինքնությունը, վերջինս գործով ճանաչվեց տուժող։

azatutyun.am