«ԵՐԲ ՄԻ ԼԻԲԱՆԱՆԱՀԱՅ ԽՆԴԻՐ Է ԲԱՐՁՐԱՁԱՅՆՈՒՄ, ԱՍՈՒՄ ԵՆ` Ո՞ՒՐ Է ՀՐԱՆՈՒՇ ՀԱԿՈԲՅԱՆԸ»

«ԵՐԲ ՄԻ ԼԻԲԱՆԱՆԱՀԱՅ ԽՆԴԻՐ Է ԲԱՐՁՐԱՁԱՅՆՈՒՄ,

ԱՍՈՒՄ ԵՆ`Ո՞ՒՐ Է ՀՐԱՆՈՒՇ ՀԱԿՈԲՅԱՆԸ»

«Իրավունքը» Սփյուռքի նախարար Հրանուշ Հակոբյանից պարզեց` Ուկրաինայից հայերի մեծ հոսք կա դեպի Հայաստան:

«Շատ չէ հոսքը, բայց մեզ դիմողներ կան, որոնք աշխատանքի խնդրով են  դիմում նախարարությանը: Մենք էլ դիմում ենք աշխատանքի եւ սոցիալական հարցերի, էկոնոմիկայի նախարարություններ»,- ասաց  նախարարը:

Անդրադառնալով լրատվամիջոցների այն հրապարակումներին, թե սիրիահայերը  չեն վստահում Հայաստանի բիզնես  միջավայրին, նախարարի խոսքով` Սիրիայի եւ Հայաստանի միջեւ բիզնես դաշտերի,  օրենքների տարբերություն կա: «Իսկ ո՞վ ասաց, որ Հայաստանում  չկա բիզնեսմեն, ով ոգեւորվում է, հետո` հիասթափվում: Ով ասաց, որ հիասթափվածը հետո չի ոգեւորվում: Այստեղ չորս-հինգ տարի ապրողին  պետք չէ ասել` նա սիրիահայ է: Նա հայաստանցի է: Նորերին պետք է  կոչենք սիրիահայ»,-պարզաբանում է գործադիրի անդամը:

Հարցադրումը հստակեցրինք` կարծես թե հիասթափված սիրիահայերի թիվն ավելի շատ է, քան ոգեւորվածների ու հաջողակների: Ի պատասխան Հրանուշ Հակոբյանն ասաց, որ  անհաջողություն ունեցողը սկսում է փնտրել իր արմատը: «Երբ մի լիբանանահայ ելույթ է ունենում, խնդիր է բարձրաձայնում, փոխանակ դիմի պատկան կառույցներին, հեռուստացույցով հնչում է` ուր է Հրանուշ  Հակոբյանը: Բայց ես ինչ գործ ունեմ հարկերի մաքսերի, տնտեսական ծրագրերի հետ: Չի՛ կարելի»,- հորդորեց տիկին Հակոբյանը:

ՍՈՆԱ ԴԱՎԹՅԱՆ