«ՔԱՂԱՔԱՑԻԱԿԱՆ ՊԱՅՄԱՆԱԳՐՈՒՄ» ԹՈՒՅԼ ԴԵՄՔԵՐ ԵՆ ՆԵՐԿԱՅԱՑՎԱԾ»

«ՔԱՂԱՔԱՑԻԱԿԱՆ ՊԱՅՄԱՆԱԳՐՈՒՄ» ԹՈՒՅԼ ԴԵՄՔԵՐ ԵՆ ՆԵՐԿԱՅԱՑՎԱԾ»

Նորաստեղծ «Քաղաքացիական պայմանագիր» կուսակցության անդամ, կարելի է ասել փաստացի ղեկավար Նիկոլ Փաշինյանը կուսակցության համագումարի օրը հայտարարել էր, որ չեն պատրաստվում երկար մնալ ընդդիմություն եւ ստանձնելու են պետական իշխանությունը:

Սոցիոլոգ, «Սոցիոմետր» անկախ սոցիոլոգիական կենտրոնի ղեկավար ԱՀԱՐՈՆ ԱԴԻԲԵԿՅԱՆԻՑ «Իրավունքը» պարզեց` ՔՊԿ-ն այդքան շանս ու հնարավորություն ունի՞ իր շուրջ համախմբելու իշխանությունից դժգոհ հատվածին եւ հավակնել պետական իշխանության: «Նման փորձեր եղել են, բայց ձախողվել են` «Նոր ժամանակներ» կուսակցությունը եկավ նման առաքելությամբ, բայց մեկ տոկոս էլ չհավաքեց: Արկադի Վարդանյանը եւս հաջողություն չունեցավ: Հայաստանում իշխանության են գալիս ոչ թե դժգոհության ալիքի, այլ կառուցողական առաջարկներով եւ զանգվածներին դրական ներշնչումների հիման վրա: Դա է պատճառը, որ իշխանությունն անընդհատ վերարտադրվում է»,- ասաց Ադիբեկյանը:
Սոցիոլոգի խոսքով` ԲՀԿ-ի թուլացումից հետո ընդդիմադիր դաշտի մի հատված պատրաստ է շեղվել ավանդական քաղաքական ուժերից, եթե գա նոր Մովսես եւ ցույց տա երանելի այն ափերը, որտեղ կգտնեն իրենց երազած Հայաստանը:
Ադիբեկյանը կարծում է, որ Հայաստանում ինչ-որ լավ բան անելու համար պետք է լինել իշխանության մեջ եւ փորձել այնտեղ ինչ-որ բան փոխել: «Նիկոլ Փաշինյանի հույսն իր վրա է: Նա կարող է հանդես գալ որպես մարգարե, քանի որ ՔՊԿ-ն քաղաքական ուժ չի դիտվում, որպես թիմ դեռ չի ընկալվում, անհրաժեշտ են միջոցներ, կազմակերպվածություն: ՔՊԿ-ում թույլ դեմքեր են ներկայացված: Այնտեղ պետք է խարիզմատիկ մեկը, որ գրավի հանրությանը, ոչ թե իր համախոհներին»,- մանրամասնեց «Սոցիոմետր» անկախ սոցիոլոգիական կենտրոնի ղեկավարը:
Ի դեպ, Ահարոն Ադիբեկյանը չի բացառում, որ ՔՊԿ-ն կարող է ստվերային պայմանավորվածություն ունենալ իշխանության հետ:
ՍՈՆԱ ԴԱՎԹՅԱՆ