ՁԱՅՆԱՍԿԱՎԱՌԱԿՆԵՐԻ ԽՆԴԻՐԸ` ԱԺ-ՈՒՄ. «ՀԻՄԱ ԴԱԳԱՂԻ ՄԱՍԻՆ ՕՐԵՆՔ ԸՆԴՈՒՆԵ՞ՆՔ»

ՁԱՅՆԱՍԿԱՎԱՌԱԿՆԵՐԻ ԽՆԴԻՐԸ`ԱԺ-ՈՒՄ. «ՀԻՄԱ

ԴԱԳԱՂԻ ՄԱՍԻՆ ՕՐԵՆՔ  ԸՆԴՈՒՆԵ՞ՆՔ»

Այսօր ԱԺ տնտեսական հարցերի մշտական հանձնաժողովում  առաջարկեց ուժը կորցրած ճանաչել ձայնասկավառակների մասին օրենքը, մասնավորապես,  դրոշմապիտակավորումը վերացնել, մտածել նոր մեխանիզմ հեղինակային իրավունքի պաշտպանության: «Առանց այդ էլ ձայնասկավառակների բիզնեսը մահանում է,  վերանում»,- ասաց պրն Եղիազարյանը:

Հանձնաժողովի  նախագահ Վարդան Այվազյանն էլ ասաց. «Դե  մահացողի վրա ինչի՞ ենք օրենք դնում»:

«Դե մահացողի վրա ինչի եք  լրացուցիչ սահմանափակում դնում: Դե թողեք իր համար մեռնի»,- արձագանքեց  կառավարության  ներկայացուցիչը:

«Հիմա օրենք  ընդունենք դագաղի մասի՞ն»,- զարմացած եւ կատակով հարցրեց Վարդան Այվազյանը:

«Դե ձայնասակավառակների բիզնեսը ինքն իրեն վերանում է, մի քիչ հեշտացնենք»,- ասաց Եղիազարյանը:

Վարդան Այվազյանն ընդունում է` դաշտում խնդիր կա. երգիչները դեռ ձայնասկավառակ չթողարկած իրենց  արտադրանքը զարտուղի ճանապարհներով հայտնվում է վաճառքում:  «Համապարփակ լուծում առաջարկեք խնդիրը լուծելու համար»,- ասաց Վարդան Այվազյանը: Նա նաեւ առաջարկեց հարցն օրակարգ մտցնել եւ քննարկել:

Ի դեպ, «Իրավունքը» Արմեն Եղիազարյանից, կառավարության ներկայացուցչից փորձեց հստակեցնել` դրոշմապիտակներ չամրացնելը  ձայնասկավառակների վրա, սակայն համոզիչ պատասխան այդպես էլ չլսեցինք: «Դե հանենք սահմանափակումները, թող ինքն իրեն մեռնի»,- եզրափակեց Եղիազարյանը:

ՍՈՆԱ ԴԱՎԹՅԱՆ