ԿՈՒՍԱԿՑՈՒԹՅՈՒՆՆԵՐԻ ՄԱՍԻՆ ՕՐԵՆՔԻ ՓՈՓՈԽՈՒԹՅԱՄԲ Ո՞ՒՄ ԵՆ ՈՒԶՈՒՄ «ՔՑԵԼ»

ԿՈՒՍԱԿՑՈՒԹՅՈՒՆՆԵՐԻ ՄԱՍԻՆ ՕՐԵՆՔԻ

ՓՈՓՈԽՈՒԹՅԱՄԲ Ո՞ՒՄ ԵՆ ՈՒԶՈՒՄ «ՔՑԵԼ»

ԱԺ առաջիկա քառօրյայում քննարկվելու է «Կուսակցությունների մասին» օրենքում փոփոխությունների նախագիծը, որով առաջարկվում է կուսակցությունների գույքի կառավարման հետ կապված փոփոխություններ կատարել: ԱԺ մարդու իրավունքների պաշտպանության մշտական հանձնաժողովի նախագահ Էլինար Վարդանյանը հարցի քննարկման  ժամանակ  հայտարարեց`չի հասկանում, թե ինչու է այս հարցը այսքան հաճեպ բերվել խորհրդարան, չի հասկանում` ինչու հարցը  պետք է քննարկել արագացված ռեժիմով: Հարցի զեկուցող ՀՅԴ պատգամավոր Արծվիկ Մինասյանն ասաց, որ ցանկանում են նախագծի փոփոխված տարբերակն ընդունել մինչ ամառային արձակուրդները:

ՀՅԴ խմբակցության քարտուղարն էլ ասաց, որ գուցե  ամռան ընթացքում ինչ-որ մեկը ցանկանա գույք նվիրաբերել ինչ-որ կուսակցության:

«Ժառանգության» խմբակցության պատգամավոր  Ալեքսանդր Արզումանյանը, սակայն, կարծում է, որ շտապելու կարիք չկա:

Հանձնաժողովի նախագահ Էլինար Վարդանյանն էլ հիշեց ժողովրդական խոսքը` «ամեն ինչ լավ է, բայց ուզում եմ հասկանամ `որտե՞ղ են ուզում մեզ «քցել»»:

Արծվիկ Մինասյանն արձագանքեց` որևէ մեկին «քցելու» խնդիր չկա. «Կուսակցությունների մասին օրենքում փոփոխությունը հնարավորություն կտա կուսակցություններին  վերջնականապես օրինականացնել իրենց կողմից տնօրինվող գույքը»:

ՕԵԿ խմբակցության քարտուղար Մհեր Շահգելդյանն էլ հայտարարեց, որ իրենք կողմ են, որպեսզի փոփոխության ենթարկվի ընդհանրապես կուսակցությունների համակարգը. «Մաս-մաս ենք քննարկում կուսակցությունների գործունեության վերաբերյալ հարցերը, բայց պետք է միանգամից դա անել` լայն մոտեցում է հարկավոր»,- ասաց  նա:

Արծվիկ Մինասյանն էլ հորդորեց գործընկերներին ամեն ինչին սև ակնոցներով չնայել, իսկ եթե ուզում են համակարգային փոփոխություններ` ապա թող բերեն այդ փոփոխությունները. Ի վերջո, նախագիծը դրական եզրակացություն չստացավ:

ՍՈՆԱ ԴԱՎԹՅԱՆ