ՍԱՄՎԵԼ ՍԵՎՅԱՆԸ ԱՆՊԱՐՏԵԼԻ ԷՐ, ԻՍԿ ԱՐՈՆՅԱՆԻՆ ՀԱՋՈՂՎԵԼ Է ԲԱՐԵԼԱՎԵԼ ԴԻՐՔԵՐԸ

ՍԱՄՎԵԼ ՍԵՎՅԱՆԸ ԱՆՊԱՐՏԵԼԻ ԷՐ,
ԻՍԿ ԱՐՈՆՅԱՆԻՆ ՀԱՋՈՂՎԵԼ Է ԲԱՐԵԼԱՎԵԼ ԴԻՐՔԵՐԸ

Շախմատի Հայաստանի հավաքականի առաջատար Լեւոն Արոնյանը մայիս ամսվա ընթացքում ցուցադրած լավ ելույթների եւ Ռուսաստանի ակումբային առաջնությունում Նովոսիբիրսկի «Սիբիրի» կազմում չեմպիոն դառնալու շնորհիվ կարողացել է բարելավել դիրքերը ՖԻԴԵ-ի դասակարգման աղյուսակում:Լեւոն Արոնյանը, թեեւ առաջադիմել է 2 աստիճան եւ զբաղեցնում է 8-րդ տեղը, սակայն հայ գրոսմայստերի վարկանիշը մնացել է 2776: Առաջատարն աշխարհի չեմպիոն, նորվեգացի Մագնուս Կարլսենն է, որին հաջորդում է իտալացի Ֆաբիանո Կարուանան: Աշխարհի նախկին չեմպիոն Վիշվանաթան Անանդը նահանջել է երրորդ տեղ: 100 լավագույն գրոսմայստերների ցուցակում են Հայաստանի հավաքականի եւս 2 ներկայացուցիչ, Գաբրիել Սարգսյանը 68-րդն է, իսկ Սերգեյ Մովսեսյանը՝ 91-րդը:

Իսկ շախմատի Հայաստանի կանանց հավաքականի առաջատար Էլինա Դանիելյանը Վրաստանի Չակվի քաղաքում ավարտված շախմատի կանանց

Եվրոպայի 16-րդ անհատական առաջնությունում թեեւ լավագույն արդյունքը ցուցադրեց հայ ներկայացուցիչների մեջ, բայց վերջին տուրում զիջեց դիրքերն ու դուրս մնաց լավագույն եռյակից: Մրցաշարի 9-րդ եւ 10-րդ տուրերում Դանիելյանը հաղթանակ էր տոնել եւ վերջին տուրից առաջ միանձնյա զբաղեցնում էր երրորդ հորիզոնականը, սակայն վերջին պարտիայում սեւերով պարտվեց ուկրաինուհի Նատալիա Ժուկովային, ով 9,5 միավորով գրավեց առաջին տեղը: Արծաթե մեդալ նվաճած Նինո Բատսիաշվիլին (Վրաստան) հավաքեց 9 միավոր, իսկ երրորդ տեղը գրաված Ալինա Կաշլինսկայան՝ 8: Էլինա Դանիելյանը 5 շախմատիստուհիների հետ բաժանեց 4-9-րդ տեղերը, ու լրացուցիչ ցուցանիշներով չորրորդն էր: Հայաստանի ներկայացուցիչներից Լիլիթ Մկրտչյանը մրցաշարն ավարտեց 7 միավորով, Մարիա Կուրսովան ու Լիլիթ Գալոյանը՝ 6-ական, Մարիա Գեւորգյանը եւ Աննա Հայրապետյանը՝ 5-ական, Սուսաննա Գաբոյանը՝ 4,5, իսկ Սիրանուշ Ղուկասյանը՝ 3,5:

Փոխարենը՝ նկատելի նվաճում ունեցավ միջազգային վարպետ Միքայել Հակոբովը: Միքայելը Կալայոկի քաղաքում անցկացված առաջնությունում 10 հնարավորից վաստակելով 9 միավոր, հռչակվեց շախմատի Ֆինլանդիայի 2015թ. չեմպիոն: Նա երկու միավորով գերազանցել է մոտակա մրցակցին` միջազգային վարպետ Սամպսա Նիիստին:
Իսկ ահա հայազգի պատանի գրոսմայստեր Սամվել Սեւյանը շարունակում է ցուցադրել փայլուն խաղ եւ ձեռնոց նետել շախմատային աշխարհի ուժեղագույններին: ԱՄՆ-ի Չիկագո քաղաքում ավարտված շախմատային բաց մրցաշարում ամերիկահայ շախմատիստը չկրեց ոչ մի պարտություն եւ 9 հնարավորից վաստակելով 6,5 միավոր՝ 113 մասնակիցների մեջ բաժանեց 2-9-րդ տեղերը` մի շարք հեղինակավոր գրոսմայստերների հետ: Սամվելը միայն կես միավոր հետ մնաց մրցաշարի հաղթողից` միջազգային վարպետ Ջեֆրի Քսիոնից (ԱՄՆ):
ՔՐԻՍՏԻՆԵ ՊԵՏՐՈՍՅԱՆ