ԱՐՑԱԽՈՒՄ ՀՈՍԱՆՔԻ ՍԱԿԱԳԻՆԸ 25 ԴՐԱՄ Է ԵՎ ԹԱՆԿԱՑՈՒՄ ԷԼ ՉԻ ՍՊԱՍՎՈՒՄ

ԱՐՑԱԽՈՒՄ ՀՈՍԱՆՔԻ ՍԱԿԱԳԻՆԸ 25 ԴՐԱՄ Է ԵՎ

ԹԱՆԿԱՑՈՒՄ ԷԼ ՉԻ ՍՊԱՍՎՈՒՄ

Պարզվում է Հայաստանում և Արցախում էլեկտրաէներգիայի նույն սակագինն է գործում, բայց Արցախի բնակիչները հոսանքի 1 կվտ/ժամի դիմաց վճարում են 25 դրամ: Խնդիրն այն է, որ ԼՂՀ կառավարությունը սակագնի մոտ մեկ երրորդը՝ 16,85 դրամը սուբսիդավորում է: Հայաստանում էլեկտրաէներգիայի սակագնի փոփոխության դեպքում հնարավո՞ր է, որ Արցախում նույնպես թանկանա էլեկրաէներգիայի սակագինը «Իրավունքին» հարցին ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովի արտաքին կապերի բաժնի պետ Անի Նիկողոսյանն ասաց, որ առայժմ նման նախաձեռնություն չկա, քանի որ տարեց-տարի նվազում է Հայաստանից գնվող հոսանքի քանակությունը:

Ա. Նիկողոսյանի տեղեկացմամաբ՝ 2014 թվականի տվյալներով Արցախը Հայաստանից գնել է ընդրահուր սպառվող էլեկտրաէներգիայի 22 տոկոսը, իսկ 2015 թվականի սպասումներով, այն ավելի քիչ կլինի: «Արցախում գործում են ՀԷԿ-եր, որոնք արտադրում են էլեկտրաէներգիա և Արցախում սպառվող հիմնական էլեկտրաէներգիան մեր ՀԷԿ-երի կողմից արտադրած հոսանքն է: Կանխատեսումների համաձայն կարծում ենք, որ 2015 թվականին Արցախը Հայաստանից կգնի մոտ 15 տոկոս էլեկտրաէներգիա, քանի որ պլանավորվում է շահագործման հանձնել երեք նոր ՀԷԿ-եր»,- ասաց Ա. Նիկողոսյանը:

Իսկ Արցախում կա՞ արդյոք հոսանքի սպառման երկսակագնային համակարգ հարցին ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովի արտաքին կապերի բաժնի պետը պատասխանեց՝ քանի որ բնակիչ-բաժանորդների համար սուբսիդավորվում է հոսանքի սակագինը, այդ պատճառով էլ Արցախում չի ներդրվել երկսակագնային համակարգ, սակայն տնտեսվարող սուբյեկտների համար լարման հզորությունից կախված գործում են հոսանքի սակագների տարբեր առաջարկներ: «6 կՎտ, 35 կՎտ և ավելի բարձր լարման բջիջներով սնվող սպառողների համար 1 կՎտ/ժ-ի արժեքը կազմում է 32, 85 դրամ, իսկ 0,38 կՎտ լարման բջիջներով սնվող սպառողների համար ցերեկային ժամերի սպառման գինը 1 կՎտ/ժ-ի համար կազմում է 41, 85 դրամ, իսկ գիշերային սակագինը 36, 85 դրամ է»,- ասաց Ա. Նիկողոսյանը:

ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովի արտաքին կապերի բաժնի պետը «Իրավունքին» տեղեկացրեց նաև, որ Արցախում էլեկտրաէներգիայի թանկացման հայտ չկա:

ԱՐՄԻՆԵ ԳՐԻԳՈՐՅԱՆ