«ՊԵՏՔ Է ՀԱՇՎԻ ԱՌՆԵՆ, ՈՐ ԵՐԵԽԱՆԵՐԸ ՄԻՇՏ ՃԻՇՏ ԵՆ»

«ՊԵՏՔ Է ՀԱՇՎԻ ԱՌՆԵՆ, ՈՐ ԵՐԵԽԱՆԵՐԸ ՄԻՇՏ ՃԻՇՏ ԵՆ»

Երեկ` Երեխաների պաշտպանության օրը, Երեւանի ամեն մի անկյունից` օրվան համահունչ, հնչում էր մանկական երգն ու պարը: Հանրության համար արդեն սիրելի դարձած փոքրիկներն իրենց իսկ տոնը թողած` կատարումներով օրը տոնական դարձրին բոլոր փոքրիկների համար: Սակայն, «Իրավունքի» հետ զրույցում նրանցից եւ ոչ ոք չդժգոհեց. հաճույք են ստանում` իրենց հասակակիցներին ուրախացնելու համար` միաձայն հաստատեցին բոլորը: Այս ամենից բացի, նրանք բոլորն էլ երազում են` Հայաստանն ունենա խաղաղ երկինք, որ իրենց անհոգ մանկությունն ապահովված լինի:

«ԻՆՁ ՊԱՇՏՊԱՆՎԱԾ ԵՄ ԶԳՈՒՄ
ԻՄ ՀԱՅՐԵՆԻՔՈՒՄ»

Այս տարի Մանկական «Նոր ալիք» մրցույթում Հայաստանը ներկայացնող ՄԵՐԻ ՔՈՉԱՐՅԱՆԸ մրցույթին նախապատրաստվելուն զուգահեռ` երեկ չի անտեսել իրենց տոնն ու իր կատարումներով ներկա եղել մի քանի համերգային ծրագրերի: Մերիի կարծիքով` Երեխաների պաշտպանության մասին պետք է հիշել ամեն օր, ոչ թե տարվա մեջ մեկ անգամ. «Քանի որ հունիսի 1-ը Երեխաների պաշտպանության միջազգային օրն է, պետք է ամեն ինչ անեն մեծերը, որ բոլոր խնդիրները լուծվեն, որպեսզի աշխարհի բոլոր մանուկները միշտ ժպտան»,- մեծերին խորհուրդ տվեց հայտնի փոքրիկն ու շարունակեց. «Շատ հպարտ եմ, որ ՀՀ քաղաքացի եմ ու ինձ ամբողջովին պաշտպանված եմ զգում իմ հայրենիքում, որի սահմանները պաշտպանում են մեր քաջ հայ զինվորները: Ուստի, իմ հասակակիցներին` եղբայրներին, քույրերին կմաղթեմ խաղաղ երկինք ու առողջություն...»:
Մերիի համար երեկվա տոնական օրը նշանավորվել է իր համար եւս մեկ հաճելի նորությունով. «Բացի Երեւանի մի քանի համայնքներում համերգներին մասնակցություններից, ես առաջին անգամ դիտեցի նոր տեսահոլովակս, որի պրեմիերան կկայանա շուտով: Այդ ընթացքում չմոռանալով վոկալիս պարապմունքների մասին` քանի որ, կարելի է ասել, մեկ ամիս է մնացել մրցույթին: Ակտիվ պարապում եմ, ձայնագրվում, փորձում հնարավորինս նոր երգեր ընդգրկել երգացանկիս մեջ»,- տեղեկացրեց «Նոր ալիք» մանկական մրցույթում մեր այս տարվա պատվիրակն ու վստահեցրեց. «Մեկնում եմ` միանշանակ հաղթելու համար, սակայն չեմ տխրի հաղթական հորիզոնական չզբաղեցնելու դեպքում, մասնակցությունը եւս մեծ ձեռքբերում կլինի ինձ համար»:

«ԵՐԱԶՈՒՄ ԵՄ
ԱՊՐԵԼ ԽԱՂԱՂ
ՀԱՅԱՍՏԱՆՈՒՄ»

Փոքրիկ երգիչ ԿԱՐԵՆ ՕՀԱՆՅԱՆԸ բոլոր փոքրիկների նման սիրում է Հունիսի 1-ը,  քանի որ այդ օրը բոլորի ուշադրությունը կենտրոնացված է երեխաների վրա. «Բնականաբար, երեկ ես էլ որոշ չափով փորձեցի ուրախություն պարգեւել երեխաներին` բազմաթիվ համերգների մասնակցեցի: Այդ ամենն ինձ համար հաճելի էր, կարողանում էի ուրախացնել եւ երեխաներին ժպիտ պարգեւել. դա ինձ ուրախություն էր պարգեւում: Օրը հետաքրքիր էր նրանով, որ քաղաքի ամեն անկյունում երեխաների համար տոն էր կազմակերպված»,- փաստեց Կարենն ու խոսելով իր իրավունքների մասին` ասաց. «Փառք Աստծո, ունեմ լավ ընտանիք եւ նրանց շնորհիվ այսօր ինձ եւ իմ իրավունքները լիովին պաշտպանված եմ համարում, բայց երազում եմ ապրել խաղաղ Հայաստանում եւ ուտել աշխարհում ամենամեծ շոկոլադե պաղպաղակը: Ուզում եմ, որ իմ հասակակիցներն առողջ լինեն, որ ունենանք երջանիկ մանկություն, որ բոլոր փոքրիկներս մեր հայրենիքում ապրենք խաղաղ երկնքի տակ` մեր ընտանիքի հետ»:
Կարենը վստահեցրեց, որ առաջիկայում նորություններ շատ կունենա` հանդիսատեսն իրեն կտեսնի նոր գեղարվեստական ֆիլմում, ինչպես նաեւ «Մենք ենք մեր ապագան» նոր տեսահոլովակում, ինչպես նաեւ նոր հաղորդաշարում, որը եթերում կլինի արդեն ամռան կեսերին:

«ՈՒԶՈՒՄ ԵՄ ԱՌԱՆՑ
ՊԱՏԵՐԱԶՄՆԵՐԻ,
ՀԵՏ ԲԵՐԵՆՔ
ՄԵՐ ՀՈՂԵՐԸ...»

Անցյալ տարի մանկական «Եվրատեսիլում» Հայաստանը ներկայացրած փոքրիկ ԲԵԹԹԻՆ «նախազգուշացրեց». «Հունիսի 1-ը ծնողներին եւս մեկ հիշեցում է, որ մեզ պետք է պաշտպանեն եւ հաշվի առնեն, որ երեխաները միշտ ճիշտ են` իմ փորձով եմ ասում»,- վստահեցրեց Բեթթին ու շեշտեց, որ իրեն պաշտպանված է համարում. «Ուրախ եմ, որ ունեմ լավ ընտանիք ու լավ ընկերներ: Ես աշխույժ աղջիկ լինելով` եղբայրս, հայրիկս ու մայրիկս ինձ միշտ պաշտպանում են, անում ամեն ինչ, որ լինեմ երջանիկ եւ տալիս այն ամենը, ինչի կարիքն ունեմ: Ուստի, այդ առումով ինձ պաշտպանված եմ համարում: Մայրիկս ամբողջ օրն իմ կողքին է լինում, նա ինձ շատ է օգնում, ես նրան շատ եմ սիրում: Տեսեք, այսօր շատ նկարահանումներ ու համերգներ եմ ունեցել, բայց մայրիկս այնպես արեց, որ ես այդ հոգնածությունը չզգամ, որպեսզի ես էլ մեր տոնը վայելեմ, միաժամանակ այնպես անեմ, որ մյուս փոքրիկներն էլ վայելեն տոնը` իմ կատարումների ներքո»:
Միշտ իր ակտիվությամբ աչքի ընկնող փոքրիկը, պարզվում է, մեծի նման ունի մի փափագ. «Իմ ամենագլխավոր երազանքն ինձ հետ կապված չէ` ուզում եմ, որ առանց պատերազմների հետ բերենք մեր հողերը եւ այն կյանքերը, որոնք արդեն չկան... Մենք դեռ կդառնանք ամենահզոր երկիրը, քանի որ կանք մենք, մենք ենք մեր երկրի վաղվա տերերը: Իմ նոր` «Նոր սերունդ» երգն էլ, որը կթողարկվի շուտով, հենց այդ մասին է: Այդ ամենից բացի, երազում եմ դառնալ լավ մարդ, լինեմ արժանի զավակ իմ հայրենիքի համար: Եվ ինչպես թողարկվելիք «Նոր սերունդ» երգում է ասվում` մենք նոր սերունդն ենք աշխարհի, ուժն ու սիրտը գալիք օրերի...»:
Զրուցեց ԼԻԼԻԹ ԵՂԻԱԶԱՐՅԱՆԸ