ԶԱՔԱՐՅԱՆ` ՄԱՐՈՒՔՅԱՆԻՆ. «ԵՏՄ-Ի ԾԱԽՍԵՐԸ ԿՐՃԱՏԵԼԸ ԱՐԴԱՐԱՑՎԱԾ ՉԷ»

ԶԱՔԱՐՅԱՆ` ՄԱՐՈՒՔՅԱՆԻՆ. «ԵՏՄ-Ի ԾԱԽՍԵՐԸ ԿՐՃԱՏԵԼԸ ԱՐԴԱՐԱՑՎԱԾ ՉԷ»

Արտաքին հարաբերությունների մշտական հանձնաժողովում այսօր տեղի ունեցավ 2014 թվականի պետական բյուջեի կատարման մասին տարեկան հաշվետվության ամփոփումը:

Հանձնաժողովի անդամ, ՀԱԿ պատգամավոր Նիկոլ Փաշինյանը մինչ օրակարգի հարցերը քննարկելը  առաջարկեց այնպես  անել, որպեսզի ԱԳ նախարար Էդվարդ Նալբանդյանը  ներկա լինի բյուջեի տարեկան հաշվետվության  քննարկումներին: Արտաքին հարաբերությունների հանձնաժողովի անդամ Շիրակ Թորոսյանն ասաց, որ հաճախ Նալբանդյանը արտերկրյա այցեր է ունենում: «Այս անգամ նա Մերձավոր Արեւելքում էր»,- ասաց պրն Թորոսյանը:

Այդ պահին, երբ Թորոսյանը պարզաբանում էր ներկայացնում, ներս մտավ «Ժառանգություն» խմբակցության պատգամավոր Զարուհի Փոստանջյանը: Արտակ Զաքարյանը մի պահ կարծես չճանաչեց պատգամավորին, ապա ասաց. «Տիկին Փոստանջյան, այնքան եք փոխվել, չճանաչեցի»:

Մինչ օրակարգին անցնելը, արտաքին հարաբերությունների մշտական հանձնաժողովի նախագահ Արտակ Զաքարյանը մի քանի րոպե ուշացած  անկախ պատգամավոր Էդմոն Մարուքյանին հարցրեց` նա որեւէ առաջարկ ունի՞ բյուջեի հետ կապված, թե ոչ: «Դե եթե չենք կարողանում առաջարկել, ինչ առաջարկեմ»,- կարծես հուսահատ ասաց Մարուքյանը:

«Ինչո՞ւ չեք կարողանում, առաջարկեք»,-  հորդորեց հանձնաժողովի նախագահը:

Մարուքյանի խոսքով` արդեն երեք տարի է, որ նախ բյուջետային ծախսերն են հաշվարկում, ապա նոր  ֆինանսական միջոցներ հավաքագրում, մինչդեռ հիմա հակառակն է:

Հաջորդ առաջարկը Էդմոն Մարուքյանի վերաբերում էր բյուջեից ԵՏՄ-ի ծախսերը կրճատելուն, քանի որ ԵՏՄ-ն մնալու է թղթի վրա:

Արտակ Զաքարյանն էլ ասաց, որ ԵՏՄ-ի հետ կապված ծախսերը կրճատելն արդարացված չէ:

ՍՈՆԱ ԴԱՎԹՅԱՆ