«ՊԱՏԵՐԱԶՄԱԿԱՆ ՇՐՋԱՆԻ ՄԱՄՈՒԼԸ ՃՇՏԻ ԵՎ ՍՏԻ, ԹՈՒՅԼԱՏՐԵԼԻԻ ԵՎ ԱՆԹՈՒՅԼԱՏՐԵԼԻԻ ԱԲՍՈՒՐԴ-ԲԱԼԱՆՍՆ Է»

«ՊԱՏԵՐԱԶՄԱԿԱՆ ՇՐՋԱՆԻ ՄԱՄՈՒԼԸ ՃՇՏԻ ԵՎ ՍՏԻ, ԹՈՒՅԼԱՏՐԵԼԻԻ ԵՎ ԱՆԹՈՒՅԼԱՏՐԵԼԻԻ ԱԲՍՈՒՐԴ-ԲԱԼԱՆՍՆ Է»

Մայիսի 31-ին Մոսկվայում տեղի ունեցավ ԼՂՀ Նախագահի օգնական, արցախյան պատերազմի մասնակից, գրող ԱՇՈՏ ԲԵԳԼԱՐՅԱՆԻ «Ղարաբաղյան օրագիր» ռուսերեն գրքի շնորհանդեսը, որին ներկա էին գրքի հեղինակը, տպագրության նախաձեռնողները, քաղաքական ու հասարակական մի շարք կազմակերպությունների անդամներ, հայ եւ ռուս մամուլի ներկայացուցիչներ, ինչպես նաեւ պարզապես հեղինակի ստեղծագործական ժառանգությանը հետեւող ընթերցասերներ: Այս մասին «Իրավունքին» տեղեկացրեց ՌԴ-ում հայտնի «ARM TV» հեռուստաընկերության հայկական լուրերի գլխավոր խմբագիր, ԵԿՄ ռուսաստանյան երիտասարդական թեւի ղեկավար, ինչպես նաեւ «New GP» փրոդաքշնի ներկայացուցիչ մոսկվաբնակ ՆԱԻՐԱ ՆԻԱԶՅԱՆԸ ու հավելեց. «Գրքում հեղինակը հավաքագրել է 1992-1994 թթ. Հայ-ադրբեջանական պատերազմին եւ հետպատերազմական շրջանին վերաբերող փաստերով հիմնավորված նյութեր` հուշեր, նամակներ, տպավորություներ ու մի շարք հոդվածներ, որոնց օգնությամբ սիրո, ընկերության, արյան եւ կրակի միջոցով խաղաղության հաստատման ճիգերի եւ այլ մարդկային բարձր արժեքների թեմաներին է հպվում եւ ընթերցողին հնարավորություն տալիս ոչ միայն վերապրել անցած տարիներին տեղի ունեցած ահարկու դեպքերը, այլեւ սթափ գնահատական տալ իրավիճակի դինամիկ զարգացումներին»: Իր տեսակով եզակի այս փաստագրական գիրքը լույս է տեսել ՌԴ-ում հրապարակվող «Ժամ» ամսագրի գլխավոր խմագիր ԱՆՆԱ ԳԻՎԱՐԳԻԶՅԱՆԻ նախաձեռնությամբ: Աննայի խոսքով` «Ժամն» ու ժամանակակից ստեղծագործող անհատը պատասխանատու է գալիք սերունդների առաջ իր թողած գրական ժառանգությամբ եւ այդ է պատճառը, որ իրենց ամսագիրը հանձն առավ այս գրքի տպագրությանը, քանզի. «Աշոտն այս դեպքում ոչ թե, պարզապես, պատերազմի ականատես է, այլեւ մասնակից (հայ-ադրբեջանական զինված հակամարտության ընթացքում ծանր վիրավորվել է) եւ լրագրող, որը պաշտպանված չէ ո՛չ ճակատից, ո՛չ թիկունքից, քանի որ պատերազմական շրջանի մամուլը ճշտի եւ ստի, թույլատրելիի եւ անթույլատրելիի աբսուրդ-բալանսն է, իսկ հետպատերազմական հայացքը` այս դեպքում հավաքագրած փաստագրական նյութերի օգնությամբ՝ տեղի ունեցածի օբյեկտիվ արձագանքն ու անաչառ գնահատականը»: Իսկ ըստ հեղինակի, գիրքը մեծ դաստիարակչական բնույթ է կրում նոր սերնդի համար, քանի որ նրանում ցույց է տրվում պատերազմի թոհուբոհով անցած ու հայրենիքն ազատագրած հայի-արցախցու անցած ուղին, որն այսօր էլ քարից հաց է քամում ու ամուր կառչած մնում հայրենի հողին` այն անսասան պահելու հավերժ ուխտով:

ՀՐԱՆՏ ՍԱՐԱՖՅԱՆ