«ՀԱՐԿԱԴԻՐ ԿԱՏԱՐՈՂՆ ԱՅՆ ՕՂԱԿՆ Է, ՈՐՈՎ ՎԵՐԱԿԱՆԳՆՎՈՒՄ ԵՆ ԿԱԶՄԱԼՈՒԾՎԱԾ ԸՆՏԱՆԻՔՆԵՐԸ» (Տեսանյութ)

«ՀԱՐԿԱԴԻՐ ԿԱՏԱՐՈՂՆ ԱՅՆ ՕՂԱԿՆ Է, ՈՐՈՎ ՎԵՐԱԿԱՆԳՆՎՈՒՄ ԵՆ ԿԱԶՄԱԼՈՒԾՎԱԾ ԸՆՏԱՆԻՔՆԵՐԸ» (Տեսանյութ)

Երեկ` Երեխաների պաշտպանության միջազգային օրվա առթիվ, գունեղ տոնակատարությամբ աչքի ընկավ Հարկադիր կատարման ծառայությունը: Կառույցի բակը լի էր հեքիաթային հերոսներով ու խորհրդավոր աճպարարով, երգ ու պարով, եւ, իհարկե, երջանիկ մանուկներով, որոնց համար ալիմենտի բռնագանձումն ու ծնողների հետ տեսակցությունների կազմակերպումն ապահովում է ծառայությունը: Ուշագրավ էր հատկապես այն, որ արդեն ավանդական դարձած միջոցառմանը այս տարի մասնակցում էին ոչ միայն Երեւանի, այլեւ գրեթե բոլոր մարզերից ժամանած մանուկներն ու իրենց ծնողները:

«ՊԵՏՔ Է ԱՄԵՆ ԻՆՉ ԱՆԵՆՔ, ՈՐ ԱՅՍ ԵՐԵԽԱՆԵՐԸ ԵՐՋԱՆԻԿ ԼԻՆԵՆ»

Այս յուրատեսակ միջոցառմանը ներկա էր ՀՀ գլխավոր հարկադիր կատարող, գեներալ-մայոր ՄԻՀՐԱՆ ՊՈՂՈՍՅԱՆԸ, ով ողջունելով փոքրիկներին` նշեց. «Շնորհավորում եմ բոլորիդ` այս ամենալավ, ամենահրաշալի, ամենաերջանիկ տոնի առթիվ: Ուզում եմ, որ միշտ լավ սովորեք եւ դառնաք մեր պետության արժանի քաղաքացիներ: Յուրաքանչյուր երեխա երջանիկ լինելու իրավունք ունի, ինչն ապահովելը բոլորի` ընտանիքի, հասարակության, պետության խնդիրն է»: Ապա դիմեց ներկա ծնողներին. «Մենք եւ դուք պետք է ամեն ինչ անենք, որ այս երեխաները լինեն երջանիկ, ժպտերես, ունենան մեծ ապագա: Երեխաներին այնպես պետք է դաստիարակենք, որ դառնան պիտանի մարդիկ` մեր պետության ու մեր հասարակության համար: Տոնը դեռ շարունակվելու է, եւ մենք բազմաթիվ միջոցառումներ ունենք միասին անելու: Վստահ եմ, որ բավականին ուրախ ժամանակ կանցկացնենք: Այնպես որ, փորձենք բոլորս ուրախանալ երեխաների հետ ու իրենց էլ ուրախացնել»: Բարեմաղթանքներից հետո գեներալ-մայորը մինչեւ վերջ մնաց տոնակատարությանն ու շփվեց փոքրիկների հետ, որոնք շրջապատել էին նրան:

ՀԱՐԿԱԴԻՐ ԿԱՏԱՐՈՂՆԵՐԸ` ՀԱՆՈՒՆ 3 ՀԱԶԱՐ ՄԱՆՈՒԿՆԵՐԻ ԱՆՀՈԳ ՄԱՆԿՈՒԹՅԱՆ

Այնուամենայնիվ, «Իրավունքին» հաջողվեց կազմակերպված միջոցառման ու օրվա խորհրդի մասին զրուցել ՀՀ գլխավոր հարկադիր կատարողի հետ:

- Պարոն գեներալ-մայոր, ինչպես նկատեցինք, նախորդ տարվա համեմատ այս տարի ավելի շատ մանուկներ եք ընդգրկել միջոցառմանը: Նախեւառաջ անդրադառնանք կազմակերպված տոնակատարությանը:

- Հարկադիր կատարման ծառայությունում մոտ 3 հազար երեխայի հետ աշխատանք է տարվում: Դա մեր ամենախոցելի օղակներից մեկն է, որովհետեւ երեխայի հետ հատուկ աշխատանք պետք է տարվի, եւ հոգեբանական գործիքներ կիրառվեն: Այս տարի, իսկապես, մենք հրավիրեցինք ավելի շատ երեխաներ, եւ շուրջ 200 երեխա այսօր մասնակցեց միջոցառմանը, մինչդեռ նախկինում սահմանափակվում էինք 100-ով: Փորձեցինք ավելի շատ երեխաներ ներգրավել մարզերից, եւ արդյունքում բոլոր մարզերից անխտիր (բացի Սյունիքից) երեխաներ են եկել այստեղ, որոնք իրենց ժամանակը կանցկացնեն, նվերներ կստանան եւ դրական լիցքեր կստանան: Եվ, իհարկե, կծանոթանան, կշփվեն հարկադիր կատարողների հետ: Այսօր կփորձենք երեխաների եւ հարկադիր կատարողների միջեւ այդ կապը ստեղծել:

- Փաստորեն, չեք սահմանափակվում միայն տարին մեկ անգամ այս միջոցառմամբ:

- Ինչպես գիտեք, մենք ունենք «Հեքիաթային տնակ», որտեղ կազմակերպում ենք շատ միջոցառումներ: Այնպես որ, ոչ միայն այս օրն ենք նմանատիպ միջոցառում կազմակերպում, այլ փորձում ենք ամեն առիթը օգտագործել` երեխաների հետ շփումը մեծացնելու եւ լավացնելու համար, որը մեր աշխատանքի արդյունավետության բարձրացման մեջ իր նպաստն ունենում է:

- Հատկանշական էր, որ միջոցառման ժամանակ փոքրիկների ծնողներն էլ նույնպիսի բարձր տրամադրություն ունեին: Բացի այն, որ Հարկադիր կատարման ծառայությունը նաեւ իրենց մանկությունը կորցրած ծնողներին հեքիաթային ժամեր պարգեւեց, էլ ինչպիսի՞ աշխատանքներ են տարվում նրանց հետ:

- Ծնողների հետ հատուկ աշխատանք է տարվում: Մենք ունենք նաեւ բազում դեպքեր, երբ մեր միջոցով վերականգվում են ընտանիքները: Հարկադիր կատարողն այն օղակն է, որը փորձում է վերականգնել այն ընտանիքները, որոնք ինչ-ինչ պատճառներով կազմալուծվել են: Իսկ վերականգնված ընտանիքները քիչ չեն: Լինում են ե՛ւ ժամանակավոր, ե՛ւ ավելի խորը ու բովանդակային լուծումներ: Մենք այդ օրինակներն ունենք, ու դրանք բազմաթիվ են:

- Ընդհանրապես, ինչպե՞ս կգնահատեք երեխաների պաշտպանվածությունը մեր երկրում:

- Համենայնդեպս, մեր պետական այրերի անելիքն այն է, որ փորձենք ամենքս հնարավորին չափ պաշտպանել երեխաներին եւ ապահովել նրանց անհոգ մանկությունը: Այս երեխաներն այն ընտանիքներից են, որտեղ կա խնդիր: Պետությունը պետք է փորձի փակել այն բացերը, որոնք ինչ-ինչ պատճառներով ընտանիքում ստեղծվել են: Այս միջոցառման դերն ու նշանակությունն էլ հենց ուղղված է այդ բացերը լրացնելուն:

- Քանի որ օրը տոնական է, անդրադառնանք նաեւ Ձեր մանկությանը, հետաքրքիր է` այն ժամանակ պետական մարմինները նման ուշադրություն դարձնո՞ւմ էին` փոքրիկների մանկությունը առավել գունեղ դարձնելով:

- Սովետական Միության օրոք կարծում եմ, բոլորը` իմ տարիքի եւ մեծ մարդիկ կհիշեն, որ մեծ ուշադրություն էր դարձվում նմանատիպ միջոցառումների վրա: Եվ դա, երեւի թե, Սովետական Միության լավագույն կողմերից մեկն էր:

- Իսկ Դուք ինչպիսի՞ մանկություն եք ունեցել:

- Հրաշալի, եւ փորձում եմ այդ հրաշալի մանկությունս բազմապատկել եւ փոխանցել այս բոլոր երեխաներին, ովքեր մեզ հետ գործ ունեն: Մենք 3 հազար երեխայի հետ ենք աշխատում, ովքեր ունեն նմանատիպ խնդիրներ, եւ դա բավականին մեծ տոկոս է կազմում:

ԾՆՈՂՆԵՐԸ ԳՈՀ ՈՒ ՇՆՈՐՀԱԿԱԼ ԷԻՆ

Ի դեպ, Հարկադիր կատարման ծառայությունը բացի գեղեցիկ միջոցառում կազմակերպելուց, նաեւ անակնկալ էր պատրաստել փոքրիկների համար: Յուրաքանչյուր երեխայի բաժին հասավ նաեւ իր տարիքին համապատասխան հետաքրքիր նվեր: Մինչ փոքրիկները պարում, ուրախանում եւ նվերներ էին ստանում, «Իրավունքի» հետ իրենց տպավորություններով կիսվեցին մարզերից եկած ծնողները:

«Անչափ ուրախ ենք, շատ հաճելի օր էր: Գոհ ու շնորհակալ ենք, որ այսպիսի միջոցառում էր կազմակերպվել մեր երեխաների համար, ու նրանք կարողացան ուրախանալ իրենց սիրելի հեքիաթների հերոսների հետ», - ասաց Շիրակի մարզից եկած փոքրիկներից մեկի մայրիկը` ԵՎԳԵՆԻԱ ԴԱՎԹՅԱՆԸ եւ հավելեց. «Հատկապես Գյումրին, կարելի է ասել, շատ հեռու է այդ կողմից, ու երեխաներին շատ քիչ տեղ կա ուրախանալու: Ուստի` մեր խորին շնորհակալությունն ենք հայտնում: Մենք էլ այսօր երեխայացանք ու ուրախացանք մեր երեխաների հետ: Փոքրիկները գոհ մնացին նաեւ նվերներից, ավելին` այդ նվերները հաճելի էին նույնիսկ ծնողներիս համար»: Մեզ հետ անկեղծացավ նաեւ Լոռու մարզից եկած ՍՈՆԱ տատիկը (ԹԱՄԱՐՅԱՆ). «Շատ շնորհքով կազմակերպված միջոցառում է, բոլոր երեխաները գոհ են տոնակատարության արդյունքից: Իհարկե, մեզ մոտ էլ են լինում նման միջոցառումներ, բայց այստեղ ավելի կատարելագործված ու գեղեցիկ է: Բոլորս էլ ուրախ ենք եւ ոչ միայն նվերների, այլեւ  երեխաներին այս մի քանի ժամը այսքան հետաքրքիր զբաղեցնելու համար»: Էլ ինչ տոն, առանց բարեմաղթանքի, ամփոփելով խոսքը` Սոնա տատիկը շեշտեց. «Մեր մանուկներին կմաղթեմ, որ լավ սովորեն, հաջողության մեջ լինեն, իրենց կյանքը լավ դասավորեն: Թող այսպիսի միջոցառումներ շատ լինեն ու իրենց ծնողների` հայրիկների եւ մայրիկների հետ անցկացնեն»: Իսկ Կոտայքի մարզից ժամանած ԱՆՆԱ ՂԱԶԱՐՅԱՆՆ ընդգծեց. «Միջոցառման կազմակերպվածությունը շատ հիանալի էր, արտակարգ էր ամեն ինչ: Շնորհակալություն Հարկադիր կատարողական ծառայությանը` երեխաներին այսպիսի հաճելի ժամանակ պարգեւելու համար: Չէինք սպասում, որ այսպես լավ միջոցառում պետք է լիներ, որը ե՛ւ ծնողներին էր հաճելի, ե՛ւ երեխաներին: Մանուկներին քաջառողջություն ու կազմակերպիչներին հաջողություն եմ մաղթում աշխատանքում եւ կյանքում: Իսկ մնացածներին սեր ու հաջողություն»:

Հավելենք, որ Հարկադիր կատարման ծառայության գործառույթներից են ալիմենտներին վերաբերող գանձումները, տեսակցություններն ու երեխայի հանձնումը մի ծնողից մյուսին: Ներկայումս ընթացքի մեջ է 1823 կատարողական վարույթ, որից 1115-ը` մարզերից:

Նյութը եւ տեսանյութերը` ՀՐԱՆՏ ՍԱՐԱՖՅԱՆԻ