ԹԱՔՆՎԱԾ ԿՈՐԵՅԿՈ՞. ՔԱՂԾԱՌԱՅՈՒԹՅԱՆ ԽՈՐՀՐԴԻ ՆԱԽԱԳԱՀԻ ՄԻԼԻՈՆՆԵՐԸ

ԹԱՔՆՎԱԾ ԿՈՐԵՅԿՈ՞. ՔԱՂԾԱՌԱՅՈՒԹՅԱՆ ԽՈՐՀՐԴԻ  ՆԱԽԱԳԱՀԻ ՄԻԼԻՈՆՆԵՐԸ

«Իրավունքը» շարունակում է  ներկայացնել բարձրաստիճան մեր պաշտոնյաների դրամական  միջոցներն ու ունեցվածքը` ըստ  բարձրաստիճան անձանց էթիկայի հանձնաժողովում ամրագրված հայտարարագրերի: Այս անգամ ընթերցողի դատին ենք հանձնում  քաղաքացիական ծառայության խորհրդի նախագահ Մանվել Բադալյանի նախորդ տարվա հայտարարագիրը: Ըստ դրա` Մանվել Բադալյանի դրամական միջոցները կազմում են 12,850,000 դրամ: Իսկ եկամուտները հարկային տարում կազմել են 7,457,995 դրամ: Ընդ որում` պրն բադալյանի եկամուտները միայն աշխատաբարձից չեն գոյանում:

Մանվել Բադալյանի կնոջ` Երազիկ Ալեքսանյանի  նախորդ տարի ամուսնուց ավելի շատ  գումար է հայտարարագրել` 20,700,000 դրամ: Ուշագրավն այն է, որ տիկին Ալեքսանյանը  բարեխղճորեն հայտարարագրել է նաեւ վարձակալության դիմաց ստացվախ իր եկամուտները` 3,840,000 դրամ:

Հ.Գ. Պարոն Բադալյանի կենսագրությունն ուսումնասիրելիս պարզ է դառնում, որ նա երբեւէ բիզնես գործունեություն չի ծավալել: 1991 թվականից դասախոսում է Հայաստանի պետական ագրարային համալսարանի «Ագրոբիզնեսի կառավարում» ամբիոնում, իսկ 2003 թվականից նաև ՀՀ պետական կառավարման ակադեմիայում: 1997-2002թթ. եղել է Հայաստանի Երիտասարդության ազգային խորհրդի նախագահ: 1998-1999թթ. հանդիսացել է ՀՀ Նախագահին առընթեր Քաղաքական խորհրդի անդամ: 1999-2002թթ. ՀՀ Ազգային ժողովի պատգամավոր, պետական-իրավական հարցերի հանձնաժողովի անդամ:

2002թ. հունվարի 15-ից ՀՀ քաղաքացիական ծառայության խորհրդի նախագահն է: Փաստորեն, պրն Բադալյանին հաջողվել է երեք իշխանությունների օրոք ու երեք նախագահների հետ լեզու գտնել, աննկատ միլիոններ կուտակել: Միգուցե  ՀՀ քաղաքացիական ծառայության խորհրդի նախագահի պաշտոնն այդքան եկամտաբե՞ր  է...

ՍՈՆԱ ԴԱՎԹՅԱՆ