«ԱՐՏ ՖԵՍՏԸ» ՄԵԿ ՏԱՆԻՔԻ ՏԱԿ ՀԱՄԱԽՄԲԵԼ Է ՆԱԵՎ ՄԱՐԶԵՐԻ ԵՐԻՏԱՍԱՐԴ ՍՏԵՂԾԱԳՈՐԾՈՂՆԵՐԻՆ

«ԱՐՏ ՖԵՍՏԸ» ՄԵԿ ՏԱՆԻՔԻ ՏԱԿ ՀԱՄԱԽՄԲԵԼ Է ՆԱԵՎ ՄԱՐԶԵՐԻ ԵՐԻՏԱՍԱՐԴ ՍՏԵՂԾԱԳՈՐԾՈՂՆԵՐԻՆ

Մայիսի 11-ին մեկնարկած «ԱՐՏ ՖԵՍՏ» երիտասարդական հանրապետական 3-րդ բաց փառատոնը դեռեւս շարունակում է ընթանալ հաջողություններ գրանցելով: «Մեկ տանիքի ներքո» խորագրով «ԱՐՏ ՖԵՍՏ» փառատոնը` մշակութային միամսյակը մեկ տանիքի տակ համախմբել է նաեւ մարզերի երիտասարդ ստեղծագործողներին. «Ակտիվ են մասնակցում մարզերի ստեղծագործ երիտասարդները, մասնավորապես՝ Արմավիրի, Շիրակի, Կոտայքի, Գեղարքունիքի եւ Լոռու մարզից: Հույս ունենք, որ հետագայում նույն ակտիվ մասնակցությամբ մեզ կմիանան նաեւ մյուս մարզերը»,- լավատեսորեն «Իրավունքի» հետ զրույցում ընդգծեց փառատոնի տնօրեն ԷՐԻԿ ԲԱՐՍԵՂՅԱՆԸ:

Այս տարի եւս փառատոնը 16-35 տարեկան երիտասարդ ստեղծագործողներին, ձեւավորելով համագործակցության հեռանկարային լայն շրջանակներ, հնարավորություն է ընձեռում ինքնադրսեւորվելու, սեփական ստեղծագործությունները ներկայացնելու համար: Ավանդույթի համաձայն ցուցադրություններից հետո մասնագիտական հանձնախումբը արվեստի ամեն տեսակից որոշում է` ոսկե, արծաթե, բրոնզե մրցանակակիրներին եւ հանձնում փառատոնի փակման հանդիսավոր արարողության ժամանակ:

Իսկ մինչ մրցանակների հանձնումը փառատոնը դեռ անելիքներ ունի`նախ հունիսի 1-7-ը «Հայ Արտ» մշակութային կենտրոնում կընթանա կերպարվեստի ցուցադրությունները, որի բացման արարողությունը կկայանա հունիսի 1-ին, ժամը 15:00-ին ` Մաշտոցի պողոտա 7ա հասցեով (Մաշտոցի պող․- Խորենացու փող․խաչմերուկ): Հունիսի 3-ին եւ 4-ին «Մոսկվա» կինոթատրոնում կընթանան Կինոարվեստի դիտումները, իսկ երգարվեստի լսումները` Երեւանի Կոմիտասի անվան պետական կոնսերվատորիայի օպերային ստուդիայի դահլիճում՝  հունիսի 2-ին: Փառատոնի մրցանակաբաշխությունն ու փակման հանդիսավոր արարողությունը տեղի կունենա հունիսի 11- ին` Պատանի հանդիսատեսի թատրոնում:

ԼԻԼԻԹ ԵՂԻԱԶԱՐՅԱՆ