ԻՆՉՊԵՍ ՁՈՒԿԸ` ՋՐՈՒՄ, ՎՊ ՆԱԽԱԳԱՀՆ ԷԼ` ՀԱՄԱՀԱՅԿԱԿԱՆ ԽԱՂԵՐԻՆ ՊԱՏՐԱՍՏՎԵԼԻՍ

ԻՆՉՊԵՍ ՁՈՒԿԸ` ՋՐՈՒՄ, ՎՊ ՆԱԽԱԳԱՀՆ ԷԼ`

ՀԱՄԱՀԱՅԿԱԿԱՆ ԽԱՂԵՐԻՆ ՊԱՏՐԱՍՏՎԵԼԻՍ

Վերջերս խորհրդարանը քննարկում էր «Հայաստանի Հանրապետության 2014թ. պետական բյուջեի կատարման մասին» տարեկան հաշվետվության վերաբերյալ ՀՀ Վերահսկիչ պալատի եզրակացությունը, որը  օրենսդիր մարմնին ներկայացրեց  ՎՊ խորհրդի անդամ Սեյրան Ավագյանը:  Իշխան Զաքարյանի  բացակայության մասին, իհարկե, հարց հնչեց, սակայն այդպես էլ հստակ  պատասխան չլսվեց:

«Իրավունք»-ին հասած տեղեկությունների համաձայն` Իշխան Զաքարյանը նեղ շրջանակներում խորհրդարանում  չներկայանալը եւ 2013 թ-ի հաշվետվությունը չներկայացնելն օրենսդիրում եւ ընդհանրապես ԱԺ-ից խուսափելն արդարացնում է այն հանգամանքով, որ 2013 թ-ի հաշվետվությունը պետք է ներկայացվեր 2014 թ-ին, բայց քանի որ օրենքի խախտում է եղել, հաշվետվությունը ներկայացվել է 2015 թ-ին, հետեւաբար դրանից հետո կարիք չկա  նեղություն քաշել եւ հասնել խորհրդարան:

ՎՊ նախագահը, մեր տեղեկություններով, չգիտի` ինչպես է լղոզելու իր սկանդալային  հայտարարությունը` «բյուջեի 70 տոկոսը գտնվում է կոռուպցիոն ռիսկի տակ» հատկապես Սերժ Սարգսյանի  այն հակադարձումից հետո, թե Հայաստանի ավելի քան 2,5 միլիարդ դոլարանոց բյուջեից կարելի է չարաշահումներ գտնել ընդամենը 700-800 հազար դոլարի` ոչ ավել:

Ի դեպ, Իշխան Զաքարյանին վերջին շրջանում կարելի է տեսնել համահայկական խաղերին առնչվող միջոցառումներում ու դրանց մասին տեղեկատվություն տրամադրելիս: Ինչպես ասում է ժողովրդական ասացվածքը, համահայկական խաղերի մասին խոսելիս ու դրանց պատրաստվելիս ՎՊ-նախագահը իրեն լավ է զգում, ինչպես ձուկը ջրում:

Միգուցե համահայկական խաղե՞րն են «մեղավոր Իշխան Զաքարյանի` ԱԺ-ում չներկայանալու եւ ՎՊ տարեկան հաշվետվությունը չներկայացելու համար:

ՍՈՆԱ ԴԱՎԹՅԱՆ