ՍԱՍՈՒՆ ՄԻՔԱՅԵԼՅԱՆ. «ԸՆԴԴԻՄԱԴԻՐ ՈՒԺԵՐԸ ԹՈՂ ԳՆԱՆ ՊԱՏՄՈՒԹՅԱՆ ԳԻՐԿԸ». ՏԵՍԱՆՅՈՒԹ

ՍԱՍՈՒՆ ՄԻՔԱՅԵԼՅԱՆ. «ԸՆԴԴԻՄԱԴԻՐ ՈՒԺԵՐԸ

ԹՈՂ ԳՆԱՆ ՊԱՏՄՈՒԹՅԱՆ ԳԻՐԿԸ». ՏԵՍԱՆՅՈՒԹ

Այսօր տեղի ունեցավ «Քաղաքացիական  պայմանագիր»  կուսակցության առաջին համագումարը:

«Իրավունքը» կուսակցության անդամ Սասուն Միքայելյանին մի քանի հարց ուղղեց կուսակցության անելիքների եւ քաղաքական այլ ուժերի հետ  հետագա համագործակցության մասին:

- Պրն Միքայելյան,  քաղաքական որեւէ ուժի կամ ուժերի հրավիրե՞լ եք  մասնակցելու համագումարին:

- Ո՛չ, ոչ մեկին:

- Անգամ Լեւոն Տեր-Պետրոսյանին չեք հրավիրել մասնակցելու   կուսակցության համագումարին...

- Ոչ, ասում եմ ոչ մեկին: Ինչի  Լեւոն Տեր-Պետրոսյանն ինչո՞վ է տարբերվում ուրիշներից: Մեր կուսակցության մեխն էլ հենց դա էլ եղել, որ ոչ մեկի չհրավիրենք, ոչ մեկի չմիանանք: Դե գիտեք, դաշինքներ, միավորումներ… բերել եւ ժողովրդին հասցրել են էս վիճակին:

- «Քաղաքացիական պայմանագիր» կուսակցությունը գործելու է ընդդիմադիր դաշտո՞ւմ:

- Ընդդիմադիր դաշտը ո՞րն է…

- Լավ, ոչ իշխանական…

- Չէ,՛ հենց ընդդիմադիր, մենք ով ենք, որ ոչ իշխանական… էդ ինչ ես մեզ կպցնում: Ես դա չեմ հասկանում` «ոչ իշխանական» նոր լեքսիկոն է մտել քաղաքականության մեջ: Կամ ընդդիմություն ես,  կամ իշխանություն:  Մենք երկար միտում չունենք մնալու ընդդիմություն: Մենք ցանկանում ենք ձեւավորել համահայկական  կառույց, որը կկարողանա փոխել մեր ներքաղաքական մթնոլորտը:

- Որպես ընդդիմադիր ուժ` ընդդիմադիր ո՞ր ուժերի հետ է  «Քաղաքացիական պայմանագիրը» համագործակցելու:

- Առայժ ոչ մեկի հետ: Թող ինձ ներեն  բոլորը... նոր ձեւավորված ընդդիմադիր քաղաքական ուժերից չգիտեմ…  մենք նոր ենք ձեւավորվում, ո՞ւմ հետ համագործակցենք: Եթե ընթացքում կլինեն ուժեր, մենք կհամագործակցենք, բայց ոչ հիմա: Ինչքան համախմբումն եղել է, միանգամից փլվել է:

- Բայց այն ընդդիմադիր ուժերը, որոնք տարիների պատմություն ունեն…

- Դե թող գնան պատմության գիրկը, եկել ենք նրանց ուղարկենք պատմության գիրկը:

- Նկատի ունեմ` ինչո՞ւ նրանց  ընդդիմություն չեք համարում:

- Իրենց գործունեության համար: Պիտի էնդպես անեին, որ մեր երկրում այս իրավիճակն ու այս մթնոլորտը չձեւավորվեր:

- Իշխանափոխություն  պահանջելո՞ւ  է կուսակցությունը:

- Անկասկած:

- Հիմնադիր խորհրդարան» նախաձեռնության հետ համագործակցելո՞ւ է «Քաղաքացիական պայմանագիրը»:

- Եկեք այդ հարցին հիմա չպատասխանեմ: Նոր կուսակցություն է  ձեւավորվել, ընթացքում կորոշենք:

Մանրամասները` տեսանյութում:

ՍՈՆԱ ԴԱՎԹՅԱՆ