ՀԵՌՈՒՍՏԱՑՈՒՅՑ ՎԱՃԱՌՈՂՆԵՐԻ ԱՉՔԸ ԼՈՒՅՍ

ՀԵՌՈՒՍՏԱՑՈՒՅՑ ՎԱՃԱՌՈՂՆԵՐԻ ԱՉՔԸ ԼՈՒՅՍ

Թանկացումների եւ սոցիալական ծանր պայմանների պատկերին, այժմ էլ մարդիկ ստիպված են վճարել հեռուստացույց դիտելու համար: Համենայնդեպսª հեռուստատեսության թվային հեռարձակման անցնելուց հետո Հայաստանի բնակիչները պետք է 14-34 հազար դրամով ձեռք բերեն այն սարքավորումը, որը նրանց համար կապահովի հեռուստացույցի աշխատանքը:
Դա դեռ մի հեռուստացույցի համար, եւ վայ նրանց, ովքեր ունեն մի քանիսը: Էլ չասած, թե ինչ որակ կունենան այդ սարքավորումները, դեռ հարց է: Այսինքնª ամեն փչանալուց հետո մարդիկ ստիպված են լինելու նորը գնել, մինչեւ որ ճարահատյալ մտածեն թվային համակարգին համապատասխանող թանկարժեք հեռուստացույցների մասին, որոնց գներն այդ իրավիճակում հաստատ մինչեւ երկինք կթռնեն:
Ուրեմնª ինչքանո՞վ է տեղին այս ծանր օրերին մարդկանց գլխներին թվային հեռուստատեսություն փաթաթելը: "Իրազեկ եւ պաշտպանված սպառող" հասարակական կազմակերպության նախագահ Բաբկեն Պիպոյանի խոսքով` պետք է հաշվի առնելՀայաստանում աղքատության տոկոսը եւ այն հանգամանքը, թե արդյոք հնարավո՞ր է նույն սարքավորումը Հայաստան ներկրել ավելի մատչելի գներով. "Այս գործընթացի վերաբերյալ պետք է հստակ մեխանիզմ մշակվի, եւ երբ ուսումնասիրենք ամեն ինչ, հանդես կգանք առաջարկությամբ: Հնարավոր է, որ սարքը մարդիկ կարողանան ձեռք բերել 11 հազար դրամով, չնայած այս դեպքում էլ մարդկանց մի զանգվածի համար այն մեծ գումար է: Անհրաժեշտ է բոլոր հնարավորությունները դիտարկել, եւ եթե հասկանանք, որ սպառողին կարողանում ենք ընձեռել հնարավորություն` պայմանական ձեռք բերել սարքը եւ մի քանի ամսվա ընթացքում վճարել գումարը, ապա այդ հնարավորությունը կօգտագործենք: Եթե այս խնդիրը լուծվի, կարծում եմ, բոլորը գոհ կլինեն",- ընդգծեց Բաբկեն Պիպոյանը:
Եթե ոմանց համար մի ամբողջ ամսական թոշակին հավասար այդ 14-34 հազար դրամը իրենից մի մեծ բան չի ներկայացնում, ապա շատ ընտանիքներ, մանավանդ սահմանամերձ գյուղի բնակիչներ, այդ գումարով կարող են լուծել մի շաբաթվա հացի խնդիր: Թվային հեռարձակման անցնելուց հետո սահմանամերձ Վահան համայնքի  գյուղապետ Գուրգեն Բալյանը հույս ունի, որ համայնքի անապահով ընտանիքներին պետությունը կաջակցի` տվյալ սարքավորումը ձեռք բերելու համար. "Մեզ մոտ աշխատող հեռուստակայանը մեկ տարի եւս նախկին ռեժիմով կաշխատի, որպեսզի մարդիկ կարողանան հեռուստացույց դիտել: Որպես սահմանամերձ գյուղ, հնարավոր է, որ նպաստառուներին եւ անապահով ընտանիքներին սարքավորումը տրամադրեն անվճար: Այսօր մենք գյուղում  հնարավորություն ունենք դիտելու ընդամենը երկու հեռուստաալիք, եւ ոչ այդքան որակով",- "Իրավունքի" հետ զրույցում նշեց Գ. Բալյանը:
Բայց մեկ է, կանխատեսել, թե քանի ամսվա կյանք կունենան սարքերը, ոչ ոք չի կարող: Այդ ոլորտում տեղավորվել փորձող ընկերություններից մեկի ներկայացուցիչն անհայտ մնալու պայմանով մեզ փոխանցեց. "Դրանք կունենան շահագործման երաշխիքային ժամկետ, բայց երկու-երեք տարվա կարգի: Այսինքնª դա այն երաշխավորված ժամկետն է, որից հետո մարդիկ պետք է պատրաստ լինեն նոր սարք գնել: Իսկ այդ դեպքում արդեն հաստատ պետական սոցիալական ծրագրեր չեն լինի, եւ անապահովներն անգամ ստիպված կլինեն իրենց գլխի ճարը տեսնել":

ԶՎԱՐԹ ԽԱՉԱՏՐՅԱՆ