ԶԱՐՄԱՆՔ

"Lragir.am-ում ադրբեջանցի լրագրո՞ղ է աշխատում: Դուք հո հայվան չե՞ք, հետեւո՞ւմ եք ձեր բառապաշարին, հասկանո՞ւմ եք, թե ինչ բառ եք օգտագործել, այ տհասներ: Այսպիսի մտածողությամբ արարածները պետք է ոչնչանան: Դե գնա ու զոհված զինվորի ծնողին ասա, որ իր զավակը ոչնչացվել է: Անասու՛ն",- ահա այդպիսի գրառում հայտնաբերեցինք Շուշիի ազատագրման մասնակից, Արցախ 3 որդուն ծառայության ուղարկած, պահեստի կապիտան Արթուր Եղիազարյանի ֆեյսբուքյան էջում: Իսկ երբ նայեցինք զայրույթի պատճառ հանդիսացած հրապարակումը, միանգամից պարզ դարձավ, որ Արթուր Եղիազարյանն իրավացի է 100 տոկոսով: Քանզի նշյալ կայքի քաղաքական մեկնաբան ՀԱԿՈԲ ԲԱԴԱԼՅԱՆԸ զարմանալիորեն գրել է. "Եվ ահա, սահմանին կանգնած 3 հայ զինվոր է ոչնչացվել ադրբեջանցիների ձեռքով, կամ ով գիտե, գուցե նույնիսկ Ռուսաստանի քաղաքացիների, որովհետեւ ինչպես քարվաճառյան դիվերսիան ցույց տվեց, ադրբեջանցի դիվերսանտները ՌԴ քաղաքացիություն էլ են ունենում": Պարզ է, որ գրված է մաքուր ադրբեջանական տեսակետից, եւ ավելի ուշ "ոչնչնացվել" բառը հոդվածում չակերտել է, դա ամենեւին էլ ի զորու չէ քողարկել: Ինչեւէ, մնում է զարմանալ ու զայրանալ, թե ինչքան են հայկական ազգանուններով հայախոս չհայերը:
Հակոբ Գագիկի Խաչատրյան, Էդուարդ Գագիկի Հայրապետյան, Արշակ Կարենի Հարությունյան` ահա անհավասար մարտում զոհված զինվորները: Եվ ԱՐՇԱԿ ՀԱՐՈՒԹՅՈՒՆՅԱՆԻ վերաբերյալ արդեն հայտնի են զարմանալի մանրամասներ: "Դուխով տղա էր, մի քանի ամիս առաջ օտպուսկ էր եկել, ասում էր` թուրք եմ խփել, դրա համար են թողել: Դրա համար պատվոգիր եւ դրամական պարգեւատրում էր ստացել: Շատ լավ, շփվող տղա էր, թաղում բոլորն էլ սիրում էին նրան: Ծնողները ու բոլորս էլ համարում ենք, որ իրենց տղան հայրենիքի համար է զոհվել եւ հերոս է",- ասել է ընտանիքի մտերիմներից մեկը: Ու պարզվում է, որ 20-ամյա զինվորի պապը` ավագ Արշակը, 1992-ին նույնպես զոհվել է արցախյան պատերազմում: Փաստորեն, Արշակ Հարությունյանը իր պապից ժառանգեց ոչ միայն անունը, այլեւ հերոսական կենսագրությունը:
Եզրափակելով թեման` նշենք, որ ՍՏՅՈՊԻԿ ՍԱՖԱՐՅԱՆԸ զարմանալիորեն սկսեց պաշտպանել պիղծ տողերի հեղինակ Հակոբ Բադալյանին քննադատողներից. "Հարգելի ՀՅԴ-ական ընկերներ, նորմալ է, որ չեք կիսում որեւէ մեկի վերլուծությունները կամ դիտարկումները: Աշխարհը հենց բազմակարծությամբ է առաջ գնում եւ հետաքրքիր: Բայց որեւէ մտքի (տեսակետի) տերմինի դեմ կազմակերպված արշավը եւ հարձակումը ոչ միայն լուրջ չէ, այլ կողքից տարօրինակ ու զավեշտալի է: Թարգեք, Աստծո սիրուն": Դե, ինչ ասես, Ստյոպիկին նոր չենք ճանաչում: Բայց պետք է նշենք, որ լրիվ այլ առիթով Ստյոպիկին պորտատեղադրում կատարեց "Ժառանգության" փոխնախագահ Արմեն Մարտիրոսյանը: Հակադարձելով Ստյոպիկի դժգոհությանը Բաղրամյան 26 կատարած այցի կապակցությամբ` նա ասաց. "Բոլոր նրանք, ովքեր վարչության նիստում չեն եղել, առավել եւս` կուսակցական գործունեությունն ավարտել են եւ իրենք իրենց համարում են փորձագետ, ճիշտ կլինի, որ իրենց փորձագիտական գործունեությամբ զբաղվեն, ոչ թե գտնեն որոշակի թեմա ու այն անընդհատ տաք պահեն": Բայց, իհարկե, մեղմ է ասված, կարծում ենք, որ նույնիսկ փորձագիտությամբ զբաղվելուն Սաֆարյանը պիտանացու չէ:
Իսկ տխրահռչակ ԱՐԹՈՒՐ ՍԱՔՈՒՆՑԻ աչքին բոլորը կամակատար են երեւում. "Ինձ համար զարմանալի է, երբ որոշ վերլուծություններ են կատարվում ՀՀԿ-ի, Սերժ Սարգսյանի կամ նրա քաղաքական վարքագծի, ինչպես նաեւ մնացած քաղաքական դաշտի ու դերակատարների վերաբերյալ: ՀՀ-ում, բացառությամբ 1-2-ից, այն էլ` պայմանական, մնացած բոլորը Կրեմլի կամակատարներ են: Այսօրվա Հայաստանի հիմնական խնդիրը Սահմանադրության առաջին հոդվածն է, որտեղ նշվում է, որ Հայաստանը ինքնիշխան, իրավական, ժողովրդավարական, սոցիալական պետություն է: Այդ հոդվածի դրույթներն ապահովելու համար կառավարման ձեւը կարեւոր չէ: Հետաքրքիր է, որ բոլորը դարձել են Կրեմլի կամակատարներ, մեկ էլ սկսում են խոսել ինչ-որ սահմանադրական փոփոխությունների մասին` չգիտեմ ինչ խնդիրներ լուծելու համար: Այդպես մտածողները կամ քաղաքական տհասներ, անգրագետներ են, կամ էլ մեզ են անգրագետի ու տհասի տեղ դնում": Դե, եթե ինչ-որ մեկը "քեռի Սեմի" կամակատարն է, ապա բոլոր ողջամիտ մարդիկ աչքին Կրեմլի կամակատար են երեւում: Ինչեւէ, զարմանալով հանդերձ, մնում է ընդամենը հիշեցնել, որ ՀՀ ցանկացած արժանապատիվ քաղաքացի կգերադասի շուն լինել-գել լինել, բայց սաքունց չլինել:

Զարմացած է  
ՀՈՎՀԱՆՆԵՍ ԳԱԼԱՋՅԱՆԸ