ՀՈՎՀԱՆՆԵՍ ՄԱՐԳԱՐՅԱՆԸ ԱՐՁԱԳԱՆՔԵԼ Է HARTAK.AM-Ի ԽԱՅՏԱՌԱԿ ՀՈԴՎԱԾԻՆ

Արխիվ 12-16 19 Մարտ, 2015 17:16

ՀՈՎՀԱՆՆԵՍ ՄԱՐԳԱՐՅԱՆԸ ԱՐՁԱԳԱՆՔԵԼ Է HARTAK.AM-Ի ԽԱՅՏԱՌԱԿ ՀՈԴՎԱԾԻՆ

«Հարթակ» թերթի մարտի 19-ի համարում զետեղված էր «Պարոն Բաբուխանյան, էս ինչո՞ւ ՕԵԿ-ի հանդեպ հանկարծ փոխվեցիր» խայտառակ, սադրիչ հոդվածը, որին այսօր, անմիջապես, հենց hartak.am կայքում արձագանքեց Ազգային ժողովի «Օրինաց երկիր» խմբակցության պատգամավոր Հովհաննես Մարգարյանը: Մեջբերում ենք նրա խոսքերը. «Ես և Հայկ Բաբուխանյանը քաղաքականության մեջ լավ գործընկերներ ենք, իսկ կյանքում՝ նամուսի ու թասիբի տեր մտերիմ ընկերներ: Դեռ 2003 թվականից ՕԵԿ և ՍԻՄ կուսակցությունների միջև, Արթուր Բաղդասարյանի և Հայկ Բաբուխանյանի նախաձեռնությամբ, ստորագրվել է փոխհամագործակցության հուշագիր և այս 12 տարիների ընթացքում մեր քաղաքական թիմերի միջև միշտ էլ եղել են բարեկամական, ընկերական և ավելի քան բարիդրացիական հարաբերություններ, ինչն, անկասկած, որոշ չարակամ, ամբիցիոզ, սադրանքների ակունքներում կանգնած սցենարիստ-ռեժիսորների մոտ նախանձ է առաջացրել: Պետք է հիասթափեցնենք վերջիններիս. ինչպես ՕԵԿ-ը, այնպես էլ ՍԻՄ-ն ունեն բավարար քաղաքական կամք, հմտություն, անցած ուղի մեր միջև սեպ խրելը թույլ չտալու համար: Այնպես որ, և՛ ես, և՛ իմ ընկեր Հայկ Բաբուխանյանն ունենք այնքան ուժ, քաղաքական փորձառություն և խոհեմություն, որ չտրվենք քաղաքական խառնակիչների սադրանքներին: Մենք և մեր կուսակցությունները շարունակելու և ամրապնդելու ենք մեր ընկերությունը, փոխադարձ համագործակցությունը՝ զորակցելով և աջակցելով միմյանց: Սա նաև կոչ է բոլոր ԶԼՄ-ներին՝ զերծ մնալու նման հրապարակումներից»: