ՏԵՂԻ ՈՒՆԵՑԱՎ «ՀԱՐՈՒԹՅՈՒՆ» ՖԻԼՄԻ ՊՐԵՄԻԵՐԱՆ`ՆՎԻՐՎԱԾ ԿՈՄՊՈԶԻՏՈՐ ՀԱՐՈՒԹՅՈՒՆ ԴԵԼԼԱԼՅԱՆԻ ՀԻՇԱՏԱԿԻՆ

Արխիվ 12-16 19 Մարտ, 2015 14:22

Եթե ծնվեմ նորից` ապա կնտրեմ միայն երաժշտությունը, ուրիշ ոչինչ

Նարեկացի Արվեստի միության ավանդական դարձած Կինոչորեքշաբթի ծրագրի շրջանակներում այս շաբաթ հայ հանրությանը ներկայացվեց Հայաստանի մշակութային ինտերնետ հեռուստատեսության կողմից նկարահանված «Հարություն» փաստավավերագրական ֆիլմը` նվիրված կոմպոզիտոր, ՀԽՍՀ կոմպոզիտորների միության անդամ ՀԱՐՈՒԹՅՈՒՆ ԴԵԼԼԱԼՅԱՆԻ հիշատակին: Ֆիլմի հեղինակ Արայիկ Մանուկյանի խոսքով` «Հարություն» ֆիլմով ցանկացել է եւս մեկ անգամ ներկայացնել Հ. Դելլալյանին բոլոր նրանց, ովքեր գիտեն եւ ճանաչել են կոմպոզիտորին.«Ֆիլմը նաեւ նրանց համար է, ովքեր չեն ճանաչել Դելլալյանին: Այն դիտելուց հետո, հուսով եմ շատերը կգտնեն ու կլսեն կոմպոզիտորի ստեղծագործությունները»,-նշեց ԱՐԱՅԻԿ ՄԱՆՈՒԿՅԱՆԸ:

Ֆիլմը, որը ուղեկցվում էր կոմպոզիտորի երաժշտությամբ, ներկայացնում էր Դելլալյան կոմպոզիտորին, մարդուն ու ընկերոջը:

Կոմպոզիտորի այրին իրենց հանդիպման առաջին օրվանից էր զգացել սիրելիի երաժշտական հակումներ.«Հարությոնի հետ մեր հանդիպումը պատահական ստացվեց: Մեկ հանդիպումից հետո սկսեցինք մտերմանալ, սիրեցինք միմյանց եւ կազմեցինք մեր գեղեցիկ ընտանիքը: Մեր հանդիպումների ընթացքում տեսնում էի այն մեծ սերը, որը Հարությունը տածում էր դեպի երաժշտությունը: Ես չէի պատկերացնում, որ այդքան համեստ մարդու մեջ կա մեծ կամքի ուժ եւ նպատակ առաջ գնալու: Մեր ամուսնությունից որոշ ժամանակ անց, Հարությունը դարձավ ուսանող եւ սկսեց սովորել կոնսերվատորիայում»,-վերհիշեց ՀԵՐՄԻՆԵ ԴԵԼԼԱԼՅԱՆԸ:

Ստեղծագործական 13 տարիների ընթացքում Հ. Դելլալյանը ստեղծել է մնայուն շատ ստեղծագործություններ, որոնք ինչպես մասնագետներն են բնորշում, այսօր էլ շատ արդիական են: 1987 թվականին Դելլալյանը առաջին անգամ հայտնվեց միջազգային բեմում, որտեղ կոմպոզիտորին շնորհվեց Կալիֆորնիայի կինոյի եւ հեռուստատեսության խորհրդի «Ոսկե Փառապսակ» պարգեւը: Նրա ստեղծագործությունների մեջ առանձնանում է հատկապես «Նվիրում Կոմիտասին» սոնատը:

Ինչպես կոմպոզիտորի դուստրն է բնորոշում` Հ Դելլալյանը մարդ էր, ով ընդհանրապես տարված չէր շողալու եւ երեւալու ձգտումով, այլ պարզապես լուռ ու անխոս կատարում էր իր առջեւ դրված աշխատանքը. «Երանի նրանց, ովքեր առաջին անգամ են հայտնաբերում Հարություն Դելլալյան արվեստագետին» ,-նշեց ԳԱՅԱՆԵ ԴԵԼԼԱԼՅԱՆԸ:

ԶՎԱՐԹ ԽԱՉԱՏՐՅԱՆ