ԿԵՆՏՐՈՆԻ ԹԱՂԱՊԵՏԱՐԱՆԸ «ԹԽԵԼ» Է ՔԱՂԱՔԱՊԵՏԱՐԱՆԻ ՊԱՐԶԱԲԱՆՈ՞ՒՄԸ

ԿԵՆՏՐՈՆԻ ԹԱՂԱՊԵՏԱՐԱՆԸ «ԹԽԵԼ» Է

ՔԱՂԱՔԱՊԵՏԱՐԱՆԻ ՊԱՐԶԱԲԱՆՈ՞ՒՄԸ

«Իրավունքը» բազմիցս անդրադարձել է Եզնիկ Կողբացի 50/2 հասցեում կատարվող շինարարությանը, խնդրի առնչությամբ ներկայացրել  շինարարության պատվիրատուի, քաղաքապետարանի պարզաբանումն ու այդ տարածքում ապրող բնակիչների դժգոհությունը:

Քանի որ  շինարարությունն  իրականացվում է մայրաքաղաքի կենտրոնում, փետրվարի 18-ին «Իրավունքը» գրավոր հարցում էր ուղարկել Կենտրոնի թաղապետարան հետեւյալ հարցերն ուղարկելով Կենտրոնի թաղապետ Արա Սադոյանին:

1.Ի՞նչ օբյեկտ է կառուցվում Եզնիկ Կողբացի 50/2 հասցեում:

2. Տեղյա՞կ եք, որ վերոնշյալ տարածքը նախկինում եղել է կանաչապատ ու ծառածածկ, որը փաստում են  մեր կողմից հրապարակված լուսանկարները:

3. Եթե տեղյակ եք, որ տարածքը եղել է կանաչապատ, ինչո՞ւ է կանաչ տարածքում շինություն կառուցվում:

4. Արդյոք շինությունը կառուցելիս անցկացվել են հանրային լսումներ:

Թաղապետարանը ուղիղ մեկ ամիս անց է պատասխանում մեր գրավոր հարցմանը, այն էլ` ոչ լիարժեք:

«Ի պատասխան 18.02.2015 թ-ի Ձեր հարցմանը, տեղեկացնում եմ, որ Եզնիկ Կողբացի 50/2 հասցեում  նախատեսվում է իրականացնել մեկ հարկանի հասարակական նշանակության օբյկետի կառուցման շինաշխատանքներ, որի համար առկա է Երեւանի քաղաքապետարանի հետ 15.12. 2014 թ. համաձայնեցված հ.01/18-05/1-Վ-1668-1152 նախագիծն ու կառուցապատող Վահագն Վանցյանին 15.12. 2014 թ. տրված հ. 01/18-Վ-1668-1330 շինարարության թույլտվությունը: Վերոնշյալ տարածքը կանաչապատ չի եղել»,- ասված է  թաղապետարանի պատասխանում:

Հանրային լսումների մասին հարցը, սակայն, թաղապետարանն անպատասխան է թողել: Սրանից կարելի է ենթադրել, որ հանրային լսումներ, ինչպես այլ շինաշխատանքների դեպքում, հավանաբար, չեն անցկացվել: Ավելին` պատասխանում հստակ գրված չէ`հասարակական նշանակության ի՞նչ շինություն է կառուցվում:

Ինչ վերաբերում է  տարածքի կանաչապատ չլինելուն, թաղապետարանը ամենայն հավանականությամբ  քաղաքապետարանի թելն է  թելում, կամ հիշողության հետ խնդիրներ ունի:

Պրն Սադոյան, հատուկ Ձեզ համար հրապարակում ենք  վերոնշյալ հասցեում կանաչ  ու ծառածածկ  տարածքն ապացուցող լուսանկարները:

Ընդհանուր առմամբ Կենտրոնի թաղապետարանի պատասխանը ոչնչով չի տարբերվում փետրվարի վեցին  «Իրավունքին» տված քաղաքապետարանի պարզաբանումից:  Տպավորությունն այնպիսին է, որ  թաղապետարանը ուղղակի «թխել» է քաղաքապետարանի պարզաբանումն ու իր աշխատանքը համարել ավարտված:

Մենք հետեւողական ենք լինելու եւ շարունակելու ենք խնդրի հետ կապված հարցերը հասցնել համապատասխան մարմիններին:

ՍՈՆԱ ԴԱՎԹՅԱՆ