ԻՐԱՆԱԳԵՏ. «ԻՐԱՆՆ ԱՆՈՒՂՂԱԿԻՈՐԵՆ ՑՈՒՅՑ ՏՎԵՑ ԻՐ ՎԵՐԱԲԵՐՄՈՒՆՔԸ ՀԱՅՈՑ ՑԵՂԱՍՊԱՆՈՒԹՅԱՆ ՀԱՆԴԵՊ»

ԻՐԱՆԱԳԵՏ. «ԻՐԱՆՆ ԱՆՈՒՂՂԱԿԻՈՐԵՆ ՑՈՒՅՑ ՏՎԵՑ ԻՐ

ՎԵՐԱԲԵՐՄՈՒՆՔԸ ՀԱՅՈՑ ՑԵՂԱՍՊԱՆՈՒԹՅԱՆ ՀԱՆԴԵՊ»

Օրերս Մեծի Տանն Կիլիկիո կաթողիկոսության եւ Իրանի կրոնների ու մշակույթի կազմակերպության աստվածաբանական վեցերորդ նիստն է կայացել, որի ընթացքում ընդունվել է Հայոց ցեղասպանությունը դատապարտող հայտարարություն:

Լրագրողների հետ հանդիպման ժամանակ պատմական գիտությունների թեկնածու իրանագետ Կարեն Մկրտչյանը կարեւորում է այս հայտարարությունը, քանի որ սրանով Իրանն անուղղակիորեն իր վերաբերմունք  է արտահայտում Հայոց ցեղասպանության մասին: «Իրանի կրոնների ու մշակույթի կազմակերպությունը պատահական կառույց չէ, այն ուղղորդվում է  Իրանի հոգեւոր առաջնորդի կողմից»,- ասաց իրանագետը:

Իրանը մինչ այսօր չի ճանաչել Հայոց ցեղասպանությունը, քանի որ Թուրքիայի հետ առեւտրա-տնտեսական կապեր ունի, այդ պատճառով էլ փորձում է Հայոց  ցեղասպանության նկատմամբ իր վերաբերմունքը միջնորդավորված հայտնել:

Իրանագետը չբացառեց, որ այս հայտարարությունը կարող է հետագայում հիմք դառնալ Հայոց ցեղասպանության  լայն քննարկման համար:

Ասուլիսի մյուս բանախոս, ԵՊՀ պատմության ֆակուլտետի դեկան Էդիկ Մինասյանը եւս կարեւորեց այս հայտարարությունը, ապա հիշեցրեց. «Մեծի Տանն Կիլիկիո կաթողիկոսությունը վերջերս պահանջատիրական խնդիր է դրել՝ հետ պահաջնելով Սիսի կաթողիկոսարանը: Այսինքն` կաթողիկոսությունը պատահական փաստաթուղթ չէր ստորագրի»:

ՍՈՆԱ ԴԱՎԹՅԱՆ