ԱՐԴՅՈՔ ԺԱՄԱՆԱ՞ԿՆ Է ԱՆՑՆԵԼ ՊԱՐՏԱԴԻՐ 12-ԱՄՅԱ ԿՐԹՈՒԹՅԱՆԸ

ԱՐԴՅՈՔ ԺԱՄԱՆԱ՞ԿՆ Է ԱՆՑՆԵԼ ՊԱՐՏԱԴԻՐ 12-ԱՄՅԱ ԿՐԹՈՒԹՅԱՆ

Երեկ ԱԺ գիտության կրթության, սպորտի երիտասարդության եւ մշակույթի հանձնաժողովում տեղի ունեցավ հետաքրքիր բանավեճ` ՍԻՄ նախագահ, ԱԺ պատգամավոր Հայկ Բաբուխանայնի եւ ԿԳ նախարար Արմեն Աշոտյանի միջեւ: Թեման աղմուկ հանած 12-ամյա պարտադիր կրթության նախագիծն է, որն առաջարկում է Ա. Աշոտյանը, եւ որի մասին բազմաթիվ սուր քննարկումներ են եղել ԱԺ-ում:

Իր խոսքում Հ. Բաբուխանյանը նշեց, որ մինչեւ պարտադիր 12-ամյա կրթության անցնելը պետք է նախ ձեւավորվեն երեկոյան եւ հեռակա կրթության համակարգերը, որպեսզի այն երիտասարդները, ովքեր ցանկանում են եւ աշխատել, եւ սովորել, ունենան դրա հնարավորությունը: Բացի այդ` Հ. Բաբուխանյանը նշեց, որ մինչեւ 12-ամյա կրթություն պարտադրելը պետք է կարգի բերել ավագ դպրոցը: «Այսօր շատ ծնողներ փող են տալիս, որ իրենց երեխաները 12-րդ դասարանում չհաճախեն դպրոց: Դրա հետ մեկտեղ` էլի փող են տալիս, որ իրենց երեխաներին գիտելիքներ հաղորդեն կրկնուսույցները: Նշանակում է, որ ավագ դպրոցում բուհ ընդունվելու համար բավարար գիտելիքներ չեն օգտագործում, մենք էլ ստիպում ենք, որ երիտասարդները պարտադիր գնան սովորեն այնտեղ»: Ա. Աշոտյանը իր տեսակետները հայտնեց վերոհիշյալ հարցերի շուրջ` ասելով, թե կրկնուսույցի մոտ երեխային տանելը մեզանում դարձել է ազգային ավանդույթ, իսկ աշխատող երիտասարդները կարող են աշխատել նաեւ երեկոյան ժամերին: Այնուամենայնիվ նախարարը դեմ լինելով ավագ դպրոցների պարագայում հեռակա, կամ երեկոյան ուսուցման ձեւերին (ինչը իր կարծիքով կբերի ավարտական վկայականների վաճառքին), դեմ չէր այդ ուսուցման ձեւերին` ուսումնարաններում եւ տեխնիկումներում: Նա նշեց, որ արդեն իսկ հեռակա, երեկոյան ուսուցման ձեւը միջին մասնագիտական կրթության համակարգում գործում են:

Հաջորդ հարցը, որի շուրջ քննարկումներ ծավալվեցին նախարարի ու պատգամավորի միջեւ, օրենքի այն դրույթն է, որով պետությունը երաշխավորում  է անվճար ուսուցումը ավագ դպրոցներում, բայց ոչ տեխնիկումներում եւ ուսումնարաններում: Ըստ Հ. Բաբուխանյանի` օրենքը պարտադրում է 12-ամյա կրթությունը, ապա պետք է նաեւ երաշխավորի այդ կրթության անվճար լինելը ոչ միայն ավագ դպրոցներում, այլեւ միջին մասնագիտական կրթության համակարգում, քանի որ դեռ պարզ չէ, թե եկող կառավարությունն ինչ մոտեցումներ կցուցաբերի վերոնշյալի վերաբերյալ: Նախարարը համաձայնելով պատգամավորի դիտարկմանը` նշեց, որ փաստացի կառավարությունն այնքան պետպատվերով տեղեր է սահմանում տեխնիկումներում, որ այդտեղ էլ անվճար սովորելու հարցը լուծված է: Այնուհետև ավելացրեց` եկեք օպտիմիստորեն տրամադրվենք եկող կառավարությանը, ինչի հետ Հ. Բաբուխանյանը այդքան էլ համակարծիք չէ, նշելով, որ որքան էլ օպտիմիստորեն տրամադրվեն, պետք է զգուշավորություն ցուցաբերել. «Այսօրվա կառավարությունը հարցը լուծում է, բայց կարող է եկողը հարցը չլուծել եւ կմնա պարտադրանքը` առանց երաշխիքի»: Այստեղ քննարկմանը միջամտեց ՀՀԿ պատգամավոր Կարինե Աճեմյանը` փորձելով հասկանալ, թե ինչում է կայանում իր գործընկեր պատգամավորի պեսիմիզմը, ինչին ի պատասխան Բաբուխանյանը հակադարձեց. «Իմ կյանքի փորձը եւ մարդկանց տրամադրությունը» :

Եզրափակելով իր խոսքը` պարոն Բաբուխանյանն ասաց, որ թեեւ նպատակը շատ գովելի է,  համակարգը դեռ պատրաստ չէ պարտադիր 12-ամյա կրթության անցնելուն, իսկ երբ նման վիճակում կա պարտադրանք, ապա այն ժողովրդի մոտ առաջ է բերում հակազդեցություն: Նա նաեւ նշեց, որ օրենքի նախագծի վերաբերյալ կառավարությանը կներկայացնի գրավոր առաջարկներ:

ԱՐՄԵՆՈՒՀԻ ՀԱԿՈԲՅԱՆ