ԱՆ ՆԵՐԿԱՅԱՑՈՒՑԻՉ. «ԴԻԱՀԵՐՁՄԱՆ ՀԱՄԱՐ ՊԵՏՔ Է ՍԱՀՄԱՆԵԼ ՄԻՋԻՆ ԳՆԵՐ` ՄԵԾ ՏԱՏԱՆՈՒՄՆԵՐԻՑ ԽՈՒՍԱՓԵԼՈՒ ՀԱՄԱՐ»

ԱՆ ՆԵՐԿԱՅԱՑՈՒՑԻՉ. «ԴԻԱՀԵՐՁՄԱՆ ՀԱՄԱՐ ՊԵՏՔ Է ՍԱՀՄԱՆԵԼ ՄԻՋԻՆ ԳՆԵՐ` ՄԵԾ ՏԱՏԱՆՈՒՄՆԵՐԻՑ ԽՈՒՍԱՓԵԼՈՒ ՀԱՄԱՐ»

«Իրավունքի» անդրադարձը «Արմենիա» հանրապետական բժշկական կենտրոնի դիահերձարանում օրեր առաջ դիակի շուրջ տեղի ունեցած «բազարին» մեծ արձագանք է գտել ընթերցողների շրջանում:

Հիշեցնենք` մեզ դիմաց քաղաքացու ընկերոջ հորից դիահերձարանը պահանջել էր  85.000 դրամ, իսկ հետո «լավություն» անելով քաղաքացուն եւ հաշվի առնելով այդքան գումար վճարելու անկարողությունը` պահանջել էր 55.000 դրամ, այն դեպքում, երբ դիահերձանում փակցված գնացուցակի համաձայն` դիահերձման ծառայությունն արժե 13.000 դրամ: Նախորդ հրապարակումներում տեղեկացրել էինք, որ խնդրի վերաբերյալ առոջապահության նախարարությունից պատասխան ստանալու դեպքում այն կհրապարակենք:

Այսօր «Իրավունքը» մի քանի հարց ուղղեց առողջապահության նախարարության բժշկական քաղաքականության վարչության պետ Ծաղիկ Վարդանյանին:

- Տիկին Վարդանյան, քանի՞ դիահերձարան կա այսօր Հայաստանում:

- ՀՀ-ում գործում է 51 կազմակերպություն, որոնք իրականացնում են ախտաանատոմիական ծառայություն: 51 կազմակերպությունից երկուսն առանձին իրավաբանական միավորներ են, որոնցից մեկը Երեւանում է, մյուսը`Գյումրիում: Խոսքը Գյումրու ախտաանատոմիական կենտրոնի մասին է: Իսկ Երեւանում գործողը «Լեբեդ» կազմակերպությունն է, որը գտնվում է «Նաիրի» բժշկական կետրոնի հարեւանությամբ: Մնացած կազմակերպությունները բժշկական կազմակերպությունների կազմի մեջ են`որպես ախտաանատոմիական բաժանմունքներ: 49-ը բաժանմունքից 19-ը Երեւանում են, երեսունը` մարզերում:

- Դիահերձարաններից քանի՞սն են մասնավոր, քանիսը` պետական:

- Մարզերում հիմնականում դիահերձարանները պետական են: Երեւանում պետական են երեք դիահերձարան, մնացածը`մասնավոր:

-Դիահերձարաններում գնային քաղաքականությունն ինչպե՞ս է որոշվում:

Դիահերձումը պետական պատվերով կատարվում է այն դեպքում, երբ հիվանդը մահացել է հիվանդանոցում: Եթե հիվանդը բուժվել է պետական պատերով, դիահերձման գումարը մտնում է հիվանդանոցային բուժման գումարի մեջ: Իսկ տանը մահացած մարդկանց դեպքում պետական պատվերով արվում է ախտանատոմիական դիահերձում այն ժամանակ, երբ մահացածը սոցիալապես անապահով եւ հատուկ խմբերում ընդգրկված է: Դա հաստատելու համար  մահացածի հարազատները ներկայացնում  են սոցիալական անապահովությունը հաստատող փաստաթղթեր:

- Շրջանառվող լուրերի համաձայն`շտապօգնության  ծառայությունը դիակը  դիահերձարան տեղափոխում է 15.000  դրամ ով: Որքանո՞վ է սա օրինական:

-Այդ հարցը առողջապահության նախարարը  բարձրացրել է, այն հիմա քննարկվում է: Մեր  չափորոշիչներում պետք է փոփոխություն անել, որպեսզի սոցիալապես անապահով խմբերում ընդգրկված մահացածներին պետպատվերով լինի:

- Իսկ եթե քաղաքացին սոցիալապես անապահով խմբում ընդգրկված չէ, իրավունք ունի՞ շտապօգնությունը մահացածին տեղափոխելու համար գումար գանձի:

-Մեր չափորոշիչներով` դա վճարովի ծառայություն է:

- Իսկ ինչքա՞ն է սահմանված գինը:

- Քաղաքապետարանի կողմից հաստատված գնացուցակի համաձայն`պետք է  արվի տեղափոխումը: Պետք է տանեն  տվյալ հիմնարկի դրամարկղում վճարեն ու կտրոն ստանան:

- Իսկ եթե կտրոն չեն տալիս:

- Դա արդեն օրենքի խախտում է: Առձեռն ոչինչ չպետք է  տրվի:

- Տիկին Վարդանյան,  դիահերձման համար  մեկ միասնական սակագին հաստատվա՞ծ է, թե`ոչ:

-Պետական պատվերի շրջանակում փոխհատուցվող գինը 12.500 դրամ է: Ենթադրենք` բժշկական կազմակերպությունը այս ամիս պետպատվերով տասը դիահերձում է արել, փոխհատուցվող գումարը լինում  է տասը բազմապատկած  12.500-ի:

- Իսկ եթե  մահացածը սոցիալապես անապահով չէ, ինչքանո՞վ են դիահերձում:

- Հերձում են տվյալ ախտանատոմիական ծառայությունում հաստատված գնացուցակով:

- Իսկ  այդ գնացուցակները միասնակա՞ն են:

- Ոչ: Կան տարբերություններ: Մենք ցանկանում ենք միջին գների գաղափարը մտցնել, որպեսզի մեծ տատանումներ չլինեն: Այսինքն` պետք է սահմանել օպտիմալ գներ:

-Ձեր կարծիքով` սոցիալապես անապահով խմբերում չընդգկված դիահերձման համար  ի՞նչ գին պետք է սահմանվի:

-Եթե միայն դիահերձումն է, ապա` 20-25.000 դրամ:

- Ո՞վ  է վերահսկում դիահերձարանների գնային քաղաքականությունն ու գործունեությունը:

-Մասնավոր դիահերձարանների մասով  պատկերն այսպիսին է. եթե պետպատվերի շրջանակում են դիահերձումներ  անցկացվում, մենք կարող ենք հսկել, իսկ եթե վճարովի ծառայություն է մատուցում, ապա  ստուգումն իրականացնում են հարկային մարմինները, ինչպես նաեւ  առողջապահական  պետական տեսչությունը:

«Իրավունքը» դիմեց նաեւ առողջապահական տեսչություն`փորձելով ստանալ նախորդ տարի դիահերձարաններում կատարված մոնիտորինգի արդյունքները: Խնդրեցին հարցը ուղարկել գրավոր: Մեր հարցման պատասխանը ստանալուն պես «Իրավունքը» այն կհրապարակի` խնդիրը համակողմանի ներկայացնելու համար:

ՍՈՆԱ ԴԱՎԹՅԱՆ