ԻՆՉ Է ՀՈՒՇՈՒՄ ԱՊՐԻԼԻ 24-ԻՆ ՌԴ ՆԱԽԱԳԱՀԻ ԱՅՑԸ ՀԱՅԱՍՏԱՆ

Արխիվ 12-16 17 Մարտ, 2015 20:00

ԻՆՉ Է ՀՈՒՇՈՒՄ ԱՊՐԻԼԻ 24-ԻՆ
ՌԴ ՆԱԽԱԳԱՀԻ ԱՅՑԸ ՀԱՅԱՍՏԱՆ

Հայոց ցեղասպանության 100-րդ տարելիցին նվիրված միջոցառումներին մասնակցելու եւ Ցեղասպանության զոհերի հիշատակը հարգելու համար ապրիլի 24-ին Հայաստան կայցելեն մի շարք երկրների ղեկավարներ եւ կառավարության անդամներ: Այդ օրը Երեւան կայցելի նաեւ Ռուսաստանի Դաշնության նախագահ Վլադիմիր Պուտինը:
"Իրավունքի" հետ զրույցում վերլուծաբանները մեկնաբանեցին, թե ի՞նչ նշանակություն կունենա Վ. Պուտինի ապրիլյան այցը Հայաստան, մանավանդ այն դեպքում, երբ որոշ երկրներ ապրիլի 24-ին իրենց ներկայությունը Երեւանում ապահովելու են վարչապետի կամ խորհրդարանի խոսնակի միջոցով:
Քաղաքագետ ԱԼԵՔՍԱՆԴՐ ՄԱՐԿԱՐՈՎԻ խոսքով` այն երկիրը, որ Հայաստանի համար հանդես է գալիս որպես ռազմավարական գործընկեր` քաղաքական, տնտեսական բնագավառներում, ապրիլի 24-ին Երեւանում պետք է ունենար բարձր ներկայացուցչություն. "Հասկանալի է, որ Ցեղասպանության ճանաչման, դրա հետ առնչվող բոլոր միջոցառումները համարվում են գերակա ուղղություն` մեր արտաքին քաղաքականության մեջ: Այս պարագայում պարզ է, որ այսքան մոտ գործընկերոջ կողմից նման բարձր ներկայացուցչությունը կարող է ենթադրել նախագահի` տվյալ պարագայում Վ. Պուտինի ներկայությունը: Այս ամենն արտացոլում է Հայաստանի եւ Ռուսաստանի միջեւ եղած հարաբերությունների մակարդակը եւ ցույց տալիս այն վերաբերմունքը, որ Ռուսաստանն ունի երկկողմանի հարաբերությունների վերաբերյալ: Այստեղ խոսքը ոչ միայն քաղաքական սիմվոլիկայի մասին է, այլեւ հարաբերությունների վերահաստատման":
"Միջազգային եւ անվտանգության հարցերի հայկական ինստիտուտի" հիմնադիր, քաղաքական վերլուծաբան ՍՏՅՈՊԱ ՍԱՖԱՐՅԱՆԸ փաստեց, որ կարեւոր էր, թե ապրիլի 24-ին անցկացվող հիշատակի միջոցառումներին մասնակցելու համար Ռուսաստանն ինչ որոշում էր ընդունելու, մանավանդ այն դեպքում, երբ վերջերս Ռուսաստանը տեսանելի քաղաքական եւ տնտեսական խաղերի մեջ է մտել Թուրքիայի հետ. "Կարծում եմ` ճիշտ որոշում կայացնելու արդյունքում հայ-ռուսական հարաբերությունները եւս մեկ հարված չստացան եւ կարելի է ասել` լավ է, որ այսպես եղավ: Դժվարանում եմ ասել, թե այս ամենը Թուրքիայի կողմից ինչպես կընկալվի: Ռուսաստանը արել է այն առավելագույնը, որը կարող էր հունից հանել Թուրքիային, քանի որ մեր դաշնակիցը ճանաչել է Հայոց ցեղասպանությունը: Ի վերջո Ռուսաստանը, եթե ուղղակի չի հայտարարել, ապա անուղղակի ասել է, որ Հայաստանի հետ համատեղ հսկելով հայ-թուրքական սահմանը` ճանաչում է թուրքական վտանգը":
ԱԺ ՀՀԿ խմբակցության պատգամավոր եւ արտաքին հարաբերությունների մշտական հանձնաժողովի անդամ ՀԱՄԼԵՏ ՀԱՐՈՒԹՅՈՒՆՅԱՆԻ կարծիքով` մեծ նշանակություն ունի Վ. Պուտինի այցը Հայաստան, քանի որ Ռուսաստանի նման հզոր պետության ղեկավարը հարգում է Հայոց ցեղասպանության զոհերի հիշատակը: Ինչ վերաբերում է ռուս-թուրքական հարաբերություններին, որոնք կարող են այլ ընթացք ստանալ Վ. Պուտինի այցելությունից հետո, Հ. Հարությունյանը նշեց, որ ռուս-թուրքական հարաբերությունների բարելավումը օգտակար է նաեւ Հայաստանի համար:

ԶՎԱՐԹ ԽԱՉԱՏՐՅԱՆ