ԶԱՐՄԱՆՔ

Կիեւում տեղի են ունեցել միաժամանակ երկու տարօրինակ իրադարձություններ: Քիչ էր, որ մի տարի շարունակ խոսակցություններ էին պտտվում Յանուկովիչի ոսկե զուգարանակոնքի մասին (որն այդպես էլ ոչ ոք չտեսավ), հիմա էլ անհետացել է նրան պատկանող 2 կգ ոսկե բոքոնը, այն էլ` երկրի գլխավոր դատախազությունից, ուր պահվում էր որպես իրեղեն ապացույց: Սակայն "ամենագժականը" ՎԱԽԹԱՆԳ ԿԻԿԱԲԻՁԵԻ հայտարարությունն էր, որ որոշել է Ուկրաինայում քաղաքական ապաստան ստանալ: Բացատրությունն էլ զարմանալիորեն նման է "Միմինո" ֆիլմի սյուժեին. "Ես երեկ կնոջս ասացի` ե՛կ քաղաքական ապաստան խնդրենք: Նա ասաց` լավ": Բայց զարմանալի է` ով է հալածում Կիկաբիձեին, ումից է փախչում, որ մի բան էլ քաղաքական ապաստան փնտրի: Ախր, չնայած բազում "բլթոցների", Ռուսաստանում էլ նրա հավին քըշ ասող չկա, իսկ առավել եւս, ի՞նչ քաղաքական ապաստան, եթե հանգիստ կարող է բնակվել Վրաստանում: Ինչեւէ, զարմանալով հանդերձ, մնում է ենթադրել, որ Կիեւում Մայդանի օդն այնքան է ներծծվել պատերի մեջ, որ այդ քաղաքում վաղ թե ուշ Մայդանի գոլորշիներից խելքը թռցնում է ցանկացած ոք:
Մեզ զարմացրեց եւ ԲՀԿ-ական ՄԻՔԱՅԵԼ ՄԵԼՔՈՒՄՅԱՆԸ` սահմանադրական բարեփոխումների վերաբերյալ հայտարարելով. "Մերժողական կամ ոչ մերժողական վերաբերմունքի խնդիր չեմ տեսնում: Մենք պետք է հասկանանք` քաղաքական համակարգն ինչ տրանսֆորմացիայի է ենթարկվելու, մոտավորապես քանի՞ քաղաքական ուժ կարող է հավակնել խորհրդարանում ներկայացված լինելու, եթե ապագայում լինելու են կոալիցիաներ, դա բերելո՞ւ է տնտեսական քաղաքական ցնցումների, թե` հակառակը, հետո նոր քննարկենք մասնակցության հարցը": Ինչեւէ, պարոն Մելքումյանին խորհուրդ տալով քիչ շփվել դաշնակների հետ, որպեսզի վերջնականապես չընդօրինակի ե՛ւ նալին, ե՛ւ մեխին տարբերակը, մնում է զարմանալ` այդ ինչքան են ԲՀԿ-ականները սիրում տրանսֆորմացիա բառը: Հիմա ԲՀԿ-ականներին ինչ պետք է համարենք, ելնելով դրանից, նրանք տրանսֆորմերնե՞ր են, թե՞ տրանսֆորմատորներ:
Սակայն զարմանալիորեն արագ մենք ստացանք այդ հարցի պատասխանը ԲՀԿ խմբակցության անդամ ԳՈՒՐԳԵՆ  ԱՐՍԵՆՅԱՆԻՑ, որ, այնուամենայնիվ, երեւի թե տրանսֆորմատոր են. "Իրավիճակ է փոխվել երկրում: Պատկերավոր ասած` քաղաքական սինուսոիդը հարթվել է, եւ այդ դաշտում տեղ է բացվել քննարկումների համար: Ի վերջո սա մեր երկիրն է` ինչքան ընդդիմության, այնքան էլ` իշխանությունների, ինչքան տկարամիտների ու խելապակասների, նույնքան էլ` իրենց ոլորտներում կայացած մարդկանց": Հիմա, պարոն Արսենյան, ինչո՞ւ է հարթվել "քաղաքական սինուսոիդը"` ԲՀԿ-ին սնուցող գեներատո՞րն է անջատվել` ի դեմս Գագիկ Ծառուկյանի, թե՞ ԲՀԿ-ի տրանսֆորմատորի փաթույթները կարճ միացում է տվել:
Իսկ Կոտայքի մարզի գյուղերից մեկում գյուղապետի ընտրությունները հետաձգվեցին բավականին զվարճալի ու զարմանալի պատճառով: Այդտեղ մրցակցում էին 2 ՀՀԿ-ական` գյուղապետ Արսեն Կարապետյանը եւ նրա տեղակալ Գրիգոր Թորոսյանը: Եվ ահա Թորոսյանը չի գրանցվում, դրա պատճառով ընդամենը 1 թեկնածու լինելու առնչությամբ ընտրությունները հետաձգվում են, սակայն ամենազարմանալին այն է, թե ինչո՞ւ չի գրանցվում: Խոսակցություններ են շրջանառվում, որ չգրանցման պատճառը ՀՀԿ-ի ԿԵՂԾ ԱՆԴԱՄԱՏՈՄՍՆ էր: Ամեն ինչ լսել էինք, բայց ՀՀԿ-ի կեղծ անդամատոմսի մասին երբեւէ չէինք լսել: Օրինակ, երբեւէ անդամատոմս չունեցող ՀՅԴ-ի կեղծ անդամատոմսերով Լեւոնի օրոք մարդիկ դրսում քաղաքական ապաստան էին խնդրում, հիմա խոսակցություններ են պտտվում, որ որոշ հանրահայտ ՀԱԿ-իստներ կարող են քրեական պատասխանատվության ենթարկվել քաղաքական ապաստանի նպատակով ՀԱԿ-ի կեղծ անդամատոմսեր վաճառելու համար... Բայց, գրողը տանի, ՀՀԿ-ի անդամատոմսն է՞լ կեղծեն, չէ՞ որ այդպիսի անդամատոմսով քաղաքական ապաստան ստանալ չի լինի, իսկ տեղական ընտրություններում թե ինչով պետք է այդ տոմսն օգներ` դժվար է ասել:  

Զարմացած է
ՀՈՎՀԱՆՆԵՍ ԳԱԼԱՋՅԱՆԸ