«ՉԿԱ ԱՐԹՈՒՐ ԲԱՂԴԱՍԱՐՅԱՆ, ՉԿԱ ՕԵԿ». ԳԱՌՆԻԿ ԻՍԱԳՈՒԼՅԱՆ

«ՉԿԱ ԱՐԹՈՒՐ ԲԱՂԴԱՍԱՐՅԱՆ, ՉԿԱ ՕԵԿ». ԳԱՌՆԻԿ

ԻՍԱԳՈՒԼՅԱՆ

ՕԵԿ նախագահ Արթուր Բաղդասարյանի՝ «Եթե չկա Գ. Ծառուկյանը, ապա չկա ԲՀԿ-ն» արտահայտության հետ Գառնիկ Իսագուլյանը «Իրավունք»-ի լրագրողի հետ զրույցում չհամաձայնեց, քանի որ ըստ նրա` նույն ձևով կարելի է ասել, որ եթե չկա Արթուր Բաղդասարյանը, ապա չկա ՕԵԿ-ը: «Բայց որոշակի պարկեշտություն է պետք ունենալ, որպեսզի նման արտահայտությունները ճիշտ ընկալվեն, քանի որ երբ ճնշում կա մարդու վրա, և դրա պատճառով է նա ակտիվ քաղաքականությունից դուրս գալիս, ու եթե Արթուր Բաղդասարյանի նկատմամաբ նույն բանը կիրառվի, ու ինքը դուրս գա Օրինաց երկրից, ու իրեն չաջակցեն, այն առումով, ինչ առումով ես եմ ասում, ապա նույնը կարելի կլինի ասել նրա մասին»,- ասում է «Ազգային անվտանգություն» կուսակցության նախագահը:

Իսագուլյանի համար վիրավորական է ընդհանուր առմամբ նաև Ա. Բաղդասարյանի այն արտահայտությունը, թե ինքը երբեք օգնական կամ ենթակա չի աշխատել, քանի որ ծառայել, կամ աշխատել պետության համար դա չի կարող վատ ընկալվել ոչ մեկի կողմից: «Եթե անվտանգության խորհրդի նախագահը երկրի նախագահն է, ապա այդ խորհրդի քարտուղարն այն մարդն է, ով կատարում է խորհրդի նախագահի հանձնարարությունները, և ինքը ենթակա է»,- ասում է Գ. Իսագուլյանը:

Այն դիտարկմանը, թե արդյո՞ք քաղաքականությունը բարոյական կարող է լինել, Իսագուլյանն ասաց, որ բարոյականությունը և քաղաքականությունը նույնական են, այլ հարց է, որ անբարո քաղաքական գործիչներն են քաղաքականությունը դարձնում անբարո:

«Քաղաքականությունը անբարոյական դարձնում են անբարոյական քաղաքական գործիչները, իսկ նրանք, ովքեր մտածում են իրենց պետության, ժողովրդի մասին և պետական շահը գերադասում են անձնական շահից, նման քաղաքական գործիչներին ոչ ոք չի կարող ասել, որ նման քաղաքականությունն անբարոյականություն է: Դրանք ըստ էության հոմանիշներ են, և եթե մարդը քաղաքական առումով ճիշտ քայլեր է կատարում, ապա նա բարոյական անձնավորություն է: Հակառակ դեպքում ցանկացած արվեստի կամ արհեստի մասին կարելի է նույնն ասել: Եվ եթե գնում ես խառատի մոտ և պատվիրում ես ինչ-որ բան, բայց ինքը պատրաստում է միանգամայն ուրիշ բան, ապա ի՞նչ պետք է ասել այդ խառատի մասին»,- ասաց Գ. Իսագուլյանը:

ԱՐՄԻՆԵ ԳՐԻԳՈՐՅԱՆ