«ԵՐԲ ԿԼԻՆԻ ԴԻԱԿԸ, ԿԽՈՍԵՆՔ ԳՆԻ ՄԱՍԻՆ». ՀԱՆՐԱՊԵՏԱԿԱՆ ՀԻՎԱՆԴԱՆՈՑԻ ԴԻԱՀԵՐՁԱՐԱՆԻ «ԲԱԶԱՐԸ» ՇԱՐՈՒՆԱԿՎՈՒՄ

«ԵՐԲ ԿԼԻՆԻ ԴԻԱԿԸ, ԿԽՈՍԵՆՔ ԳՆԻ ՄԱՍԻՆ».

ՀԱՆՐԱՊԵՏԱԿԱՆ ՀԻՎԱՆԴԱՆՈՑԻ ԴԻԱՀԵՐՁԱՐԱՆԻ

«ԲԱԶԱՐԸ» ՇԱՐՈՒՆԱԿՎՈՒՄ Է

Օրեր առաջ, iravunk.com-ում հրապարակել էր ` «Փողը տուր, դիակիդ կտամ. «բազար»` դիահերձանարում» եւ «Դիահերձարանի տնօրենի անուն-ազգանունը` պետական  գաղտնիք» վերտառությամբ հոդվածները, որտեղ անդրադարձել էինք «Արմենիա» հանրապաետական բժշկական կենտրոնին պատկանող դիահերձարանում տեղի ունեցած  «բազարին»` մեզ դիմաց քաղաքացիներից մեկի ընկերոջ հոր դիակի շուրջ:

Հիշեցնենք` մեզ դիմաց քաղաքացու  ընկերոջ հորը  դիահերձելու համար պահանջել էին 85.000 դրամ, սակայն, երբ քաղաքացին ասել էր, որ հնարավորություն չունի այդքան  վճարելու, սակարկել էին եւ որպես վերջնական գին`պահանջել 55.000 դրամ:

Մեզ չէր հաջողվում պարզաբանում ստանալ դիահերձարանից, ուստի «Իրավունքի» լրագրողն այսօր այցելեց վերոնշյալ դիահերձարան: Ինչպես  ժողովուրդն է ասում, երբ Մուհամեդը չի գնում սարի մոտ, սարն է գնում Մուհամեդի մոտ:

Դիահերձարանը Ֆորտ Բոյար քարե ամրոցն էր հիշեցնում` իսկական լաբիրինթոս` տարբեր մուտքերով, հին դռներով, ժանգոտած աստիճաններով կես կատակ, կես լուրջ ասած ճանապարհ դեպի դժոխք: Աշխատակիցներն էլ` կարծես մեկը մյուսից անտեղյակ, չգիտեին մեր հարցերին ինչպես պատասխանել, կամ միգուցե լրագրողի անուն էին լսել ու չգիտեին` ինչպես խուսափել հարցերի տեղատարափից:

Առաջինն ում մոտեցանք, «Արմենիա» հանրապետական բժշկական կենտրոնի ախտաբանա-անատոմիական բաժանմունքի վարիչ վարիչ Վարդան Դաբաղյանն էր, ով «Իրավունքի» հետ զրույցում անմեղ ու անտեղյակ հայացքով նախ ասաց, որ տեղյակ չէ` օրեր առաջ «Արմենիա» բժշկականի դիահերձարանի մասին ինչ հոդված է տպվել, ապա  հավելեց, որ  դիահերձարանի գնային քաղաքականությունը ինքը չի որոշում, այլ հանրապետական հիվանդանոցի երրորդ հարկում տեղակայված ադմինիստացիան`  Քրմոյանի գլխավորությամբ:  «Իսկ կասեք` ի՞նչ է եղել»,- հետաքրքվեց ախտաբանա-անատոմիական բաժանմունքի վարիչը:

Հետաքրքիր է, պրն Դաբաղյան, եթե դուք իրավասու չեք  մեր հարցերին պատասխանել, ինչու էիք ցանկանում լսել մեր բողոքը եւ խլել ժամանակ թե՛ ձեզանից,  մեզանից:  Պարզվում է, որ հենց Վարդան Դաբաղյանն է իրավասու (համենայնդեպս,  մի քանի աշխատակիցներ մեզ այդպես ասացին)  լսել բողոքներն ու տալ դրանց պատասխանները: Սակայն մեր զրուցակիցը փորձում էր հնարավորինս «ցրել» լրագրողին` ասելով, որ  դիահերձարանի տնօրինությունը տեղակայված է «Արմենիա» հանրապետական  հիվանդանոցի երրորդ հարկում, եւ պետք է դիմել  ֆինանսական գծով տնօրեն Նորայր Քրմոյանին:

Ինչեւէ, փորձեցինք հիվանդանոցում գտնվող դիահերձարանի տնօրինությունից պարզաբանում ստանալ, սակայն այդ պահին ստացանք հեռախոսազանգ մի աղջկա կողմից, ով  ներկայացավ որպես դիահերձանաի տնօրենի կողմից լիազորված անձ`մի աղջիկ, ով առաջարկեց հեռախոսով խոսել: Ի պատասխան ասացինք, որ հիմա գտնվում ենք դիահերձարանում եւ կարող ենք նրան հանդիպել: Վերջինս, սակայն, հրաժարվեց` ասելով, որ  հանդիպման համար ժամանակ չունի. «Եթե հանդիպելու ժամանակ չունեք, ինչպե՞ս եք մեր հարցերին պատասխանելու հեռախոսով»,- հակադարձեցինք ոմն պատասխանատուին: Ի վերջո, մեզ հաջողվեց  հանդիպել տնօրենի ներկայացուցչի հետ, որի անուն-ազգանունն այդպես էլ չիմացանք: Ականջին ամրացված պիրսինգով տնօրենի ներկայացուցիչը նախ անակնկալի եկավ` տեսնելով մեզ, ապա կրկին հրաժարվեց մեր հարցերին հստակ պատասխանել: Ավելին` նա սկսեց հոխորտալ եւ մուննաթով ասել,  թե ինչու ենք եկել` առանց իրենց տեղյակ պահելու: Մեր զրույցի ընթացքում պիրիսնգով աղջիկը պահանջում էր բողոքողի անուն-ազգանունը, որպեսզի, ըստ բողոքի, հասկանան խնդրի էությունը: Հիշեցրինք նրան` լրատվամիջոցը զբաղվում է երեւույթի ուսումնասիրությամբ, ոչ թե անուն-ազգանուններով հրապարակելով: Սա զայրացրեց մեր զրուցակցին, ով պարսպի նման փակեց մեր ճանապարհն ու թույլ չտրվեց զրուցել տնօրենի` ավելի կոնկրետ մենեջերի` Արթուր Հովհաննիսյանի հետ, ով, որքան հասկացանք, զբաղվում  է դիահերձարանի ֆինանսական հարցերով: Ինչպես ասում են` փողի տոպրակը հենց նրա տակ է:

Ի դեպ, մինչ ներկայացուցչին գտնելը դիահերձարանի մուտքին փակցված դիահերձման վճարովի ծառայությունների ցուցակը նկատեցինք, որտեղ գրված է, թե ինչ արժե մեկ դիահերձումը` 13.000 դրամ:

Սակայն, օրեր առաջ «տուժած» քաղաքացուց պահանջել էին տարբեր չափի գումարներ: Տնօրենի ներկայացուցչից փորձեցինք  պարզել` ի՞նչ արժե, ի վերջո, դիահերձումը, եթե 13.000 դրամի փոխարեն պահանջել են սկզբում 85.000, իսկ հետո 55.000 դրամ: Վերջինս այսպես պատասխանեց. «Երբ կլինի  դիակը, այդ ժամանակ գնի մասին կխոսենք: Էստեղ հենց  ընենց ոչ մեկից  գումար չի վերցվում: Ամեն ծառայությունն ունի իր գինն ունի»: Այս պատասխանից կարելի է եզրակացնել, որ այս գործում օգնության է հասնում մարդկային ճաշակը եւ ըստ դիահերձողների ճաշակի` նաեւ գին է որոշվում: Մի խոսքով`մենք դիահերձարանից հեռացանք առանց որեւէ հստակ պատասխանի, քանի որ, եթե դիահերձարանը մասնավոր է, ապա պետք է ունենա կոնկրետ գնացուցակ եւ դրան համապատասխան բացատրություն: Իսկ եթե այն պետական է, կրկին հստակ սահմանված գներ պետք է լինեն:

Փորձեցինք  պարազաբանում ստանա նաեւ «Արմենիա» բժշկական կենտրոնի տնօրենից`Գրիգոր Գրիգորյանից, քանի որ դիահերձման վճարովի ծառայության փաստաթղթում առկա էր «Արմենիա» բժշկական կենտրոնի  տնօրենի ստորագրությունը, սակայն մեզ ասացին, որ հարցերին կպատասխան փոխտնօրեն Հարություն Դավթյանը: «Բայց ինչի համար հենց ինձ»,- անակնկալի եկավ փոխտնօրենը, իսկ երբ լսեց, որ տնօրինությունն է կարգադրել պարզաբանում տալ մեզ, ասաց, որ իրավասու չէ մեր հարցերին պատասխանել: Իսկ թե ով է իրավասու, փոխտնօրենը խոստացավ ճշտել ու «անհետացավ»: Մոտ երկու ժամ անց  մեզ տեղեկացրին, որ տնօրինությունը չի կարող մեր հարցերին պատասխանել:

Առողջապահության նախարարության բժշկական քաղաքականության վարչության պետ Ծաղիկ Վարդանյանն էլ  անդրադառնալով  խնդրին,  ասաց, որ առաջին պատասխանատուն  տվյալ բժշկական կենտրոնն է` «Արմենիա» հանրապետական բժշկական կենտրոնը: «Մենք հարցում ենք արել, սպասում ենք իրենց հարցմանը, բայց միայն դրանով չենք բավարարվելու: Փորձում ենք հասկանալ` ինչ է կատարվում»,- ասաց նախարարության ներկայացուցիչը:

Ինչ վերաբերում է դիահերձարանի  տնօրենի լիազորված անձի`«Երբ կլինի  դիակը, այդ ժամանակ գնի մասին կխոսենք» արտահայտությանը, Ծաղիկ Վարդանյանն այդ պատասխանը համարեց հուզմունքի  ու վախի արդյունք: «Դա ոչ իրատեսական պատասխան է»,-ասաց  մեր զրուցակիցը:

Իսկ եթե կենտրոնը ոչ մի քայլ չձեռնարկի, Ծ.Վարդանյանի խոսքով` հաջորդ քայլը առողջապահության նախարարության կողմից վարույթ հարուցելն է: «Նման դեպքում նախարարի հանձնարարականով պետք է վարչական վարույթ հարուցվի, որով տվյալ կազմակերպությունը ենթարկվում է ֆինանսական ու վարչական պատասխանատվություն: Այն առաջին հերթին ներառում է տուգանք տվյալ կազմակերպությանը»,-եզրափակեց առողջապահության նախարարության բժշկական քաղաքականության վարչության պետ Ծաղիկ Վարդանյանը:

Հ.Գ. Դատելով դիահերձարանում փակցված  վճարովի ծառայությունների փաստաթղթում  ֆիքսված գներից, մեզ դիմաց քաղաքացու բողոքից,  ինչպես նաեւ բժշկական կենտրոնի կողմից անպատասխան մնացած մեր հարցերից` կարելի է եզրահանգել` վերոնշյալ բժշկական կենտրոնը դիակների հաշվին մեծ գումարներ են շորթում` բացահայտ թալանելով մեր քաղաքացիներին:

ՍՈՆԱ ԴԱՎԹՅԱՆ