ՌԴ-Ն ՖԻՆԱՆՍԱԿԱՆ ՕԺԱՆԴԱԿՈՒԹՅՈՒՆ Է ՀԱՏԿԱՑՆՈՒՄ ՀԱՅԱՍՏԱՆԻ ՍԱՀՄԱՆԱՄԵՐՁ ՀԱՄԱՅՆՔՆԵՐԻՆ

ՌԴ-Ն ՖԻՆԱՆՍԱԿԱՆ ՕԺԱՆԴԱԿՈՒԹՅՈՒՆ Է ՀԱՏԿԱՑՆՈՒՄ ՀԱՅԱՍՏԱՆԻ ՍԱՀՄԱՆԱՄԵՐՁ ՀԱՄԱՅՆՔՆԵՐԻՆ

Առաջիկա հինգ տարիներին Ռուսաստանը 5 միլիոն դոլար կհատկացնի Հայաստանի Տավուշի մարզի սահմանամերձ 45 համայնքների զարգացման համար: Ծրագիրը, որում կներառվեն սահմանամերձ համայնքների 62 հազար բնակիչներ, իրականացվելու է ՄԱԿ-ի Զարգացման ծրագրի «ՄԱԶԾ» միջոցով` ՀՀ տարածքային կառավարման եւ արտակարգ իրավիճակների նախարարության հետ համագործակցությամբ: Այս մասին այսօր համաձայնագիր ստորագրեցին Հայաստանում ՌԴ դեսպան Իվան Վոլինկինը, մեր երկրում ՄԱԿ-ի մշտական համակարգող, ՄԱԶԾ մշտական ներկայացուցիչ Բրեդլի Բուզետտոն եւ ՀՀ տարածքային կառավարման եւ արտակարգ իրավիճակների նախարար Արմեն Երիցյանը:

Մանրամասնելով ծրագրի նպատակային ուղղվածությունը, ՌԴ դեսպան պարոն Վոլինկինը նշեց. «Ռուսաստանը շարունակաբար ուղղորդում է իր ջանքերը` աջակցելու իր միջազգային գործընկերներին` կայուն զարգացում ապահովելու նպատակով: Ռուսաստանի միջազգային զարգացման նպատակով տրամադրվող աջակցությունն առաջնահերթորեն ստանում են ԱՊՀ երկրները եւ Եվրասիական ինտեգրման գործընկերները: «ՄԱԶԾ» ծրագրի կարեւորությունը նրա թիրախ հանդիսացող Տավուշի մարզի սահմանամերձ համայնքների բազմակողմ զարգացումն է եւ այն հանգամանքը, որ այս նպատակին ուղղված դրական փորձառությունը հնարավոր կլինի փոխանցել երկրի մյուս համայնքներին...»:

Նկատենք, որ դեսպանի վերջին միտքը հուշում է, որ ռուսական ֆինանսական աջակցության նման ծրագրեր կարող են իրականացվել նաեւ հայաստանյան այլ սահմանամերձ բնակավայրերում, ինչը, իհարկե, միանգամայն տեղին կլիներ: