ՄՈՎՍԻՍՅԱՆԸ ՆՈՐԻՑ ՔՆՆԱԴԱՏՈՒԹՅԱՆ ԿԻԶԱԿԵՏՈՒՄ Է

ՄՈՎՍԻՍՅԱՆԸ ՆՈՐԻՑ ՔՆՆԱԴԱՏՈՒԹՅԱՆ ԿԻԶԱԿԵՏՈՒՄ Է

Հայաստանի ազգային ընտրանու եւ Մոսկվայի "Սպարտակի" հարձակվող Յուրա Մովսիսյանը դարձյալ քննադատությունների կիզակետում է: Ռուսաստանի առաջնության 18-րդ տուրի շրջանակներում մոսկովյան ակումբը 1:3 հաշվով պարտություն է կրել "Կրասնոդարից", եւ Sovsport-ն անդրադառնալով այս հանդիպմանը, քննադատության է ենթարկել Մովսիսյանինª հենց նրան վերագրելով թիմի պարտությունը:
Ըստ պարբերականի. "Ավելի լավ կլիներ, եթե "Սպարտակն" ամբողջ հանդիպումն անցկացներ տասը ֆուտբոլիստներովª առանց Մովսիսյանի: Այդ դեպքում, թիմի խաղն ավելի հետաքրքիր կլիներ, մրցակցի դարպասին մոտենալու տարբերակներն էլª շատ: Իսկ այսպես, սպարտակցիները ստիպված էին "կերակրել" կենտրոնական հարձակվողին, իսկ Յուրան տանուլ տվեց հնարավոր ամեն ինչ: Նրա ներկայությունը ձեւական էր":
Բայց ահա "Կրասնոդարի" մարզիչ Անդրեյ Տիխոնովը մեկնաբանելով Մովսիսյանի խաղը, քննադատությունը միանգամայն այլ ուղղությամբ է տանում: "Ամեն հարձակվող էլ կախվածություն ունի կիսապաշտպաններից: Մովսիսյանը բացառություն չէ: Յուրան շատ էր տեղաշարժվում, փոխանցման համար լավ դիրք էր դուրս գալիս, բայց այդ ամենը ապարդյուն էր",- Տիխոնովի խոսքը մեջբերում է Sport-express-ը:
Իսկ Լիտվայի "Ատլանտաս" թիմի գլխավոր մարզիչ, ռուսաստանցի ֆուտբոլային ֆունկցիոներ Կոնստանտին Սարսանիան "միջինացված" կարծիքի է. "Մեկ պաշտոնական խաղով եզրակացություն անել ֆուտբոլիստի վիճակի մասին` սխալ է: Սակայն եթե "Դինամոյի" դեմ եւս Յուրա Մովսիսյանն անհաջող խաղա, ապա "Սպարտակը" պետք է շանս տա երիտասարդներինª Կրոտովին եւ Դավիդովին",- Սարսանիայի խոսքը մեջբերում է bobsoccer-ը:
Ամեն դեպքում Մովսիսյանը այլ ակումբներ տեղափոխվելու լավ տարբերակներ ունի, եւ հարց է, թե "Սպարտակն" իր պահանջներին համապատասխան հարձակվող ձեռք բերելու հնարավորություն կունենա՞: Ի վերջո բարձրակարգ հարձակվողին նաեւ "բարձրակարգ" աշխատավարձ է հարկավոր, այնպես որ, այս իրավիճակում կորցնողը դժվար թե Մովսիսյանը լինի: Ինչ վերաբերում է վերջինիս տրանսֆերային արժեքին, ապա ըստ transfermarkt-ի տվյալների` Մովսիսյանի տրանսֆերային արժեքը 9 միլիոն եվրո է, որը մոսկովյան ակումբի կազմում երկրորդ ցուցանիշն է, "Սպարտակի" ամենաթանկ ֆուտբոլիստը հոլանդացի կիսապաշտպան Կուինսի Պրոմեսն էª 9.5 միլիոն եվրո: Իսկ ֆուտբոլիստների ընդհանուր տրանսֆերային արժեքը 84.5 միլիոն եվրո է, որը նախորդ չորս տարիների ամենացածր ցուցանիշն է:

ՔՐԻՍՏԻՆԵ ՊԵՏՐՈՍՅԱՆ