ՓՈՂԸ ՏՈՒՐ, ԴԻԱԿԸ ՏԱՄ. «ԲԱԶԱՐ»` ԴԻԱՀԵՐՁԱՐԱՆՈՒՄ

ՓՈՂԸ ՏՈՒՐ, ԴԻԱԿԸ ՏԱՄ.  «ԲԱԶԱՐ»`

ԴԻԱՀԵՐՁԱՐԱՆՈՒՄ

«Իրավունքի» խմբագրությունն ահազանգ ստացավ մի քաղաքացու կողմից, ով վրդովված մեզ պատմեց, որ իր մտերիմներից մեկը հայտնվել է չափազանց տհաճ իրավիճակում. «Ընկերոջս հայրը մահացել է, տարել են դիահերձարան նրանից միանգամից պահանջել են 85 հազար դրամ, իսկ չտալու դեպքում ասել են` ո՛չ կհերձեն, ո՛չ էլ դիակը հետ կտան»: Ըստ մեր զրուցակցի`  դեպքը տեղի է ունեցել «Արմենիա» բժշկական կենտրոնի դիահերձարանում: Ինչպես ասում են` մինչ թաղման արարողությունը կենտրոնը հասցրել է հորը կորցրած երիտասարդի վերքին աղ լցնել: Քաղաքացին նախ անակնկալի է եկել`չիմանալով, որ դիահերձումը վճարովի է, ապա ասել է, որ ի վիճակի չէ այդքան գումար վճարել: Ի պատասխան` դիահերձարանի աշխատակիցը սակարկելու  առաջարկ է ներկայացրել` պահանջելով 85.000-ի փոխարեն 75.000 դրամ: Վշտակորույս քաղաքացին` ասել է, որ այդքանն էլ չի կարող վճարել եւ ստիպված ասել է, որ երկուշաբթի օրը կստանա հոր մահվան գումարը, որը տալիս է պետությունը մահացածների համար` 200 հազար դրամը, կբերի կտա: Կրկին հանդիպելով գումարային դիմադրության ստիպված ծնող կորցրած երիտասարդը պահանջել է հոր դիակը հետ վերադարձնել, որպեսզի ուրիշ տեղ տանի: Որքան էլ զարմանալի թվա, դիահերձարանի աշխատակիցը հրաժարվել է` ասելով. «Դիակը չենք կարող հետ վերադարձնել»: Քաղաքացին տեսնելով, որ այլընտրանք չունի, հայտնվել է ավելի վատ վիճակում, դիահերձարանի աշխատակիցն էլ իր հերթին փորձել է հերթական անգամ, «նաղդ հաճախորդին» ձեռքից բաց չթողնել եւ առաջարկել է 55.000 դրամ ու վերջ: Մեծ դժվարությամբ երիտասարդ տղամարդը կարողացել է այստեղից-այնտեղից գումար հայթայթել ու դիահերձված հոր դիակը ետ ստանալ, սակայն վճարել է 50 հազար ու ասել, որ ի վիճակի չէ ավել գումար տալ:

«Իրավունքն» այս առնչությամբ փորձեց պարզաբանում ստանալ վերոնշյալ դիահերձարանից, սակայն Հայկ անունով աշխատակիցը, մինչ տնօրենին փոխանցելը տեղեկանալով, որ զանգահարողը լրատվամիջոցի ներկայացուցիչ է, ասաց, որ տնօրենը տեղում չէ, ապա լսափողը փոխանցեց դիահերձարանի մենեջերին` Արթուր Հովհաննիսյանին: Վերջինս լսելով հարցի բովանդակությունը, նախ հարցրեց` ո՞ր դեպքի մասին է խոսքը, այնուհետ հավելեց, որ գումարը գանձվում է` ըստ օրերի. «Նայած, թե քանի օր է դիակը մնում մեզ մոտ: Ոչ մեկը օդից գումար չի պահանջում»: Երբ մենք այլ հարցեր ուղղեցինք, դիահերձարանի մենեջերը խնդրեց մեր կոնտակտային տվյալը, որպեսզի տնօրենը վաղը  մեզ պարզաբանում ներկայացնի: Իսկ թե ով է տնօրենը, մենեջերը հրաժարվեց ասել ու անմիջապես անջատեց հեռախոսը:

Մեզ հաջողվեց պարզել, որ դիահերձարանը «Արմենիա» հանրապետական բժշկական կենտրոնի սեփականությունն է, որը, սակայն, վարձակալությամբ տրվել է մեկ այլ ընկերության`  օգտագործելու դիահերձման համար:

Հուսով ենք`«Արմենիա» հանրապետական բժշկական կենտրոնի դիահերձարանի տնօրենը  բացատրություն կներկայացնի վերոնշյալ խնդրի վերաբերյալ:

Ի դեպ, ըստ որոշ տեղեկությունների, Հայաստանում դիահերձումն արժե 20.000- 70.000 դրամ, իսկ թե գինն ինչպես է որոշվում, կպարզենք առաջիկայում:

ՍՈՆԱ ԴԱՎԹՅԱՆ