«ԹԵԿՈՒԶ ՄԵԿԻ ՔԹԻՑ ԱՐՅՈՒՆ ԳԱ, ՈՒՐԵՄՆ` ՄԵՐ ԴԱՏԸ ԱՐԺԵԶՐԿԵԼՈՒ ԵՆՔ ԱՄԲՈՂՋ ԱՇԽԱՐՀԻ ԵՎ ԻՆՔՆԵՐՍ ՄԵՐ ԱՌՋԵՎ»

«ԱՊՐԻԼԻ 24-ԻՆ ԹԵԿՈՒԶ ՄԵԿԻ ՔԹԻՑ ԱՐՅՈՒՆ ԳԱ, ՈՒՐԵՄՆ` ՄԵՐ ԴԱՏԸ ԱՐԺԵԶՐԿԵԼՈՒ ԵՆՔ ԱՄԲՈՂՋ ԱՇԽԱՐՀԻ ԵՎ ԻՆՔՆԵՐՍ ՄԵՐ ԱՌՋԵՎ»

ՍԴՀԿ-ն նշեց իր հիմնադրման 128-ամյակը` առիթից օգտվելով նաեւ հնչեցնելով քաղաքական գնահատականներ: Ըստ էության, ՍԴՀԿ-ն պատրաստվում է ներգրավվել հայաստանյան ակտիվ ներքաղաքական կյանքին, ավելին` մասնակցել 2017 թվականի խորհրդարանական ընտրություններին` որպես ընդդիմադիր քաղաքական ուժ: Իր ելույթում ՍԴՀԿ Հայաստանի վարչության ատենապետ ՆԱՐԵԿ ԳԱԼՍՏՅԱՆԸ նախ անկեղծացավ. «Փաստ է, որ անկախությունից ի վեր Սոցիալ Դեմոկրատ Հնչակյան կուսակցությունն այդպես էլ Հայաստանի քաղաքական դաշտում դեռ չզբաղեցրեց իրեն արժանի տեղը: Ամբողջ աշխարհով մեկ հսկայական կառույցներ, դպրոցներ, մարզական ու բարեգործական միություններ ունեցող կազմակերպությունը չկարողացավ ըստ արժանվույնս ներկայանալ Հայաստանի քաղաքական դաշտում: Ավելին` նման փառահեղ պատմություն ունեցող կուսակցությունը Լիբանանում ունի խորհրդարանական ֆրակցիա, իսկ Հայաստանում չի մասնակցել վերջին ընտրություններին: Սա, իհարկե, մեր մեծագույն բացթողումն է»: Անդրադառնալով ՍԴՀԿ-ի վաղեմի գործընկեր ՀԱԿ-ին, որի խմբակցության ներքո ժամանակին վերոնշյալ կուսակցությունը մասնակցել էր խորհրդարանական ընտրություններին` Ն. Գալստյանը ասաց. «Չեմ խոսում Հայ ազգային կոնգրեսի մասին, որի գաղափարական հիմքը միայն եւ միայն պայմանավորված է այն փաստով, թե ինչպիսի տրամադրությամբ կարթնանա ՀՀ առաջին նախագահ Լեւոն Տեր-Պետրոսյանը»: Քննադատության ենթարկելով խորհրդարանական բոլոր քաղաքական ուժերին` ՍԴՀԿ Հայաստանի վարչության ատենապետը խոսեց նաեւ ԲՀԿ-ում տիրող իրավիճակի մասին. «Հարցս այսպես ձեւակերպեմ` ընդհանրապես կուսակցությու՞ն է «Բարգավաճ Հայաստանը»: Իշխանական մեքենայի առաջին իսկ ու ոչ այնքան լուրջ ապտակից հետո այդ կուսակցությունը դարձավ ընդամենը խորհրդարանում ժամանակավորապես ֆրակցիա ունեցող մի խումբ, որն էլ, բնական է, օրի օրի ավելի է հալվելու: Ընդհանրապես, մեկ սյան վրա հիմնված կառույցը կենսունակ չէ, դա վերաբերում է բոլորին՝ անխտիր»: Այնուամենայնիվ, այսօր ՍԴՀԿ-ն չի պատրաստվում հեղափոխություն պահանջել, ինչի մասին բանախոսը պարզաբանեց այսպես. «Շատ քաղաքական ուժեր ասում են հեղափոխություն է պետք, սակայն իշխանական մեքենայի առաջին իսկ հարվածի դեպքում տուն են գնում՝ մոռանալով թե՛ հեղափոխության, թե՛ անգամ իրենց կուսակցության եւ կազմակերպության մասին: Հեղափոխությունների փորձ, անկեղծ ասենք, Հայաստանում շատ է եղել եւ բոլորն էլ վերջում ողբերգական իրադարձություններով են ավարտվել: Հիմա ինչ-ինչ մարգինալ խմբեր քարոզում են ապրիլի 24-ին հեղափոխություն անելու մասին՝ առանց հաշիվ տալու իրենք իրենց, որ եթե Հայաստանում այդ օրը թեկուզ մեկի քթից արյուն գա, ուրեմն` մեր դատը արժեզրկելու ենք ամբողջ աշխարհի եւ ինքներս մեր առջեւ: Հիմա հարց, այդ պարագայում ո՞րն է ճանապարհը: Մի կողմից հայտարարված բուրժուա-դեմոկրատական օլիգարխիկ հեղափոխությունը տեղի չունեցավ, եռյակ-քառյակի գործունեությունը նման էր ի սկզբանե պարտության մատնվող խմբակի գործունեության, ապրիլի 24-ի մարգինալ հեղափոխականներն էլ մի քանի տասնյակ մարդիկ են, ովքեր չունեն ո՛չ այնքան հեղինակություն, ո՛չ այնքան վճռականություն, որպեսզի իրենց հայտարարությունները մինչեւ վերջ հասցնեն…Պետք է երկրում առկա պրոֆեսիոնալներից ստեղծել նոր թիմ, նոր կառավարություն, որին պետք է մաս կազմեն անխտիր բոլոր այն քաղաքական ուժերը, ովքեր ունեն հարուստ կադրային բազա, անկաշառ են եւ պատասխանատվություն են կրում երկրի համար: Սա է միակ ճանապարհը: Երկրում անհրաժեշտ է հիմք դնել միայն եւ միայն գաղափարական պայքարի»: Ի դեպ, մեջբերելով ՀԱԿԿ առաջնորդ Լեւոն Տեր-Պետրոսյանի հայտնի «մի՛ ջղաձգվեք» արտահայտությունը` պարոն Գալստյանը հայտարարեց, որ ՍԴՀԿ-ն կողմ է սահմանադրական բարեփոխումներին. «Ուզենք կամ չուզենք, անհրաժեշտ են սահմանադրական բարեփոխումներ: Հիմա մեր ընդդիմախոսներն անմիջապես կչարախնդան՝ ըհը, իշխանությունների պատվերն են կատարում, ցանկանում են նպաստել նրանց վերարտադրվելուն: Կպատասխանեմ` երբ Հնչակյան կուսակցությունը հայտարարում էր ապագա անկախ Հայաստանում խորհրդարանական կառավարման ձեւ ներդնելու իր համոզման մասին դեռեւս 19-րդ դարի վերջերին, ոչ այս իշխանությունները կային, ոչ էլ, առավել եւս՝ դուք: Եթե այս իշխանությունները ցանկանան վերարտադրվել, ապա նրանք դա կանեն՝ անկախ սահմանադրական փոփոխություններից: Կարդացեք ՀՀ Սահմանադրությունը, պարոնա՛յք, այնտեղ հստակ երեւում է, որ ուժեղ ֆրակցիայի պայմաններում գործող վարչապետն այս սահմանադրությամբ պակաս լիազորություններ չունի ՀՀ նախագահից: Ուստի` վերարտադրվելուն արված հղումները չեն դիմանում բացարձակապես որեւիցե քննադատության: Արդ, ուրեմն` Հնչակյան կուսակցությունը կողմ է սահմանադրական բարեփոխումներին, որովհետեւ մարդկության միտքը մինչեւ այսօր խորհրդարանականից ավելի ժողովրդավար կառավարման ձեւ չի ունեցել եւ, առաջիկայում էլ հորիզոնում չեն երեւում քաղաքագիտական մտքի այնպիսի հանճարներ, ովքեր կապացուցեն հակառակը»:

ՀՐԱՆՏ ՍԱՐԱՖՅԱՆ

Հ.Գ.- Առաջիկայում կներկայացնենք նաեւ «Իրավունքի» հարցազրույցը ՍԴՀԿ Հայաստանի վարչության ատենապետի հետ: