ՀԱՅԿԱԿԱՆ ԶԻՆԱՆՇԱՆԸ` ԿՐԿԻՆ ՔՆՆԱՐԿՄԱՆ ԹԵՄԱ

ՀԱՅԿԱԿԱՆ
ԶԻՆԱՆՇԱՆԸ` ԿՐԿԻՆ ՔՆՆԱՐԿՄԱՆ ԹԵՄԱ

Հայաստանի պետական խորհրդանիշներից մեկի` հայկական զինանշանի շուրջ վերջին շրջանում տեղի ունեցան բազմաթիվ խոսակցություններ: Հնչեցին դեմ ու կողմ կարծիքներ, որոնք այնքան "յուրօրինակ" էին, որ առաջին հայացքից թվում էր, թե տվյալ մեկնաբանությունները վերաբերում են ոչ թե Հայաստանի, այլ օտար պետության զինանշանին:
ՀՀ զինանշանը, որի  հեղինակներն են` ճարտարապետ Ալեքսանդր Թամանյանը եւ նկարիչ Հակոբ Կոջոյանը, վերականգնվել է 1992 թվականի ապրիլի 19-ին, այն Հայաստանի Առաջին Հանրապետության (1918-1920) զինանշանն Է: Կենտրոնում` վահանի վրա պատկերված են Արարատ լեռը` Նոյյան տապանով եւ պատմական Հայաստանի չորս թագավորությունների զինանշաններով: Վահանը պահում են արծիվը եւ առյուծը, իսկ վահանից ներքեւ պատկերված են` սուր, ճյուղ, հասկերի խուրձ, շղթա եւ ժապավեն:
Ահա վահանի վրա եղած այդ պատկերներն էլ տարաբնույթ խոսակցությունների տեղիք տվեցին: Ոմանց համար զինանշանին պատկերված առյուծի բերանը բաց է եւ հիշեցնում է գազանանոցի, իսկ ոմանք էլ` արծիվին տեսնում էին խեղճացած վիճակում: Պատկերների նման բնորոշումից հետո մի շարք մտավորականներ որոշեցին շտկումներ կատարել զինանշանի վրա կամ այն փոխել: Անդրադառնալով այս հրատապ թեմային, "Իրավունքը" զրուցեց խնդրին ծանոթ անձանց հետ եւ փորձեց պարզել, արդյո՞ք կա անհրաժեշտություն` զինանշանի վրա փոփոխություններ կատարելու համար:

"ՇԱՏ ԿՑԱՆԿԱՆԱՅԻ, ՈՐ ԿՐԿԻՆ
ՀԻՆ ԶԻՆԱՆՇԱՆԸ ԼԻՆԵՐ"

Հայաստանի ճարտարապետների միության նախագահ ՄԿՐՏԻՉ ՄԻՆԱՍՅԱՆ.
- Ընդհանրապես ես հավանում էի Մարտիրոս Սարյանի ստեղծած զինանշանը, այն շատ ամփոփ էր: Շատ կցանկանայի, որ կրկին հին զինանշանը լիներ, որի մեջ ամեն ինչ ընդգծված էր: Եթե նայենք այժմյան զինանշանին, չենք կարողանա մեր ուշադրությունը կենտրոնացնել որեւէ կետի:

"ԱՅԺՄՅԱՆ ԶԻՆԱՆՇԱՆԻ ՎՐԱ ՇԱՏ Է ԱՄԵՆ ԻՆՉ ԽԱՌՆՎԱԾ"

Քանդակագործ ԼԵՎՈՆ ԹՈՔՄԱՋՅԱՆ.
- Ամենալավ զինանշանը, որն արտացոլում էր ամբողջ Հայաստան աշխարհը` Մ. Սարյանի կերտածն էր` Արարատ լեռն էր, խաղողներով ու ցորեններով: Այժմյան զինանշանի վրա շատ է ամեն ինչը խառնված, իսկ նախկինը պարզ էր ու հստակ:

"ԽՈՐՀՐԴԱՅԻՆ ՀԱՅԱՍՏԱՆԻ
ԶԻՆԱՆՇԱՆԸ ԲԱՑԱՌԻԿ ԷՐ"

Տեր ՊԵՏՐՈՍ ավագ քահանա ՄԱԼՅԱՆ.
- Նախ ասեմ, որ մենք` որպես ժողովուրդ, պետական խորհրդանիշների նկատմամբ հարգանք չունենք: Ինքս իմ մեջ մտածել եմ, բայց չեմ արտահայտվել այն մասին, որ Մ. Սարյանի զինանշանն ավելի լավն էր: Խորհրդային Հայաստանի զինանշանը բացառիկ էր, մնացած բոլոր հանրապետությունների մեջ: Արարատը, ցորենի հասկերն ու խաղողը կար, այնտեղ ուղղակի մի փոքր պետք էր փոփոխություն անել: Պարզապես մուրճը, մանգաղը եւ աստղը հանեին արեւի վրայից եւ վերջ, զինանշանը կատարյալ կլիներ: Ներկայիս զինանշանն էլ է լավը, սակայն մի քիչ "խուճուճ" է:

Ներկայացրեց ԶՎԱՐԹ ԽԱՉԱՏՐՅԱՆԸ