ԱՆՀԱՆԴՈՒՐԺՈՂԱԿԱՆՈՒԹՅՈՒՆՆ Է ԱՇԽՈՒԺԱՑՆՈՒՄ ՀԱՆՑԱՇԽԱՐՀԸ

ԱՆՀԱՆԴՈՒՐԺՈՂԱԿԱՆՈՒԹՅՈՒՆՆ Է ԱՇԽՈՒԺԱՑՆՈՒՄ ՀԱՆՑԱՇԽԱՐՀԸ

Հայաստանում վերջին մեկ-երկու շաբաթվա ընթացքում ոչ միայն ներքաղաքական դաշտն էր լի իրադարձություններով, այլեւ քրեական աշխարհը: Բացի այն, որ օրը ցերեկով քրեական հեղինակությունները միմյանց հետ ունեցած հաշիվները վերջացրեցին սպանությամբ, քիչ չէին նաեւ զենքի միջոցով հարցերի լուծման տարբեր այլ պատմությունները: Այսինքնª եղան զոհեր, վիրավորներ: Եվ ամենավատն այն է, որ դա, հավանաբար, կշարունակվի վենդետտայի օրենքներով: Մի խոսքովª զենքով հարցեր լուծելու "ավանդույթը" հայ իրականության մեջ կարծես թե իր ուրույն տեղն արդեն ամրապնդել է: Իսկ թե այս ամենն ուր կտանի, փորձեցինք պարզել հայաստանյան  վերլուծաբաններից եւ իրավաբաններից:
Քաղաքագետ ԼԵՎՈՆ ՇԻՐԻՆՅԱՆԸ փաստեց.
-Մինչեւ Հայաստանում չդադարեն ընտրակաշառք տալը, նման դեպքերը միշտ էլ կլինեն: Ընտրակաշառքը ենթադրում է նաեւ քրեածին երեւույթներ: 1996 թվականին արդեն ակնհայտ էր, որ զանգվածային ընտրակեղծիքներով Լ. Տեր-Պետրոսյանը մնաց իշխանությանը եւ սա դարձավ կանոն: Քրեական հանցագործությունները նաեւ շատացել են իրավական պետության թուլության պատկերին: Մնացած գործոնների մասին էլ չեմ խոսում` աղքատություն, անարդարություն: Կա նաեւ մեկ այլ պատճառ. եթե խոշոր պաշտոնյան հանցագործություն է կատարում եւ չի պատժվում, ապա դրանից բոլորն օգտվում են եւ անում այն, ինչ կամենում են: Եթե այսպես շարունակվի, իրավիճակն ավելի է վատանալու: Հայ ժողովուրդը կդիմանա բազմաթիվ զրկանքների, սակայն անարդարության չի դիմանա:
ԱԺ ՀՀԿ խմբակցության պատգամավոր ՍՈՒՔԻԱՍ ԱՎԵՏԻՍՅԱՆԸ նշեց.
-Շատ ցավալի է, որ նմանօրինակ դեպքերի շղթան հաջորդում է մեկը մյուսին: Կարծում եմ մեր հասարակության մեջ ձեւավորվել է անհանդուրժողականության մթնոլորտ, որը շատ վատ է եւ հարկավոր է տարբեր միջոցներով փոխել այն: Այս ամենը վկայում է նաեւ, որ մարդկանց մոտ դեռեւս կա ապօրինի զենք-զինամթերք: Այսպիսի դեպքերը պետք է շատ մանրակրկիտ քննվեն եւ դրանց հեղինակները ստանան իրենց արժանի պատիժը, որպեսզի մարդիկ չմտածեն, որ կարող են հանցագործություն կատարել եւ մնալ անպատիժ: Անհրաժեշտ է, որ բոլորս այս հարցերում կարողանանք միմյանց օգնել եւ օգտակար լինել` նման դեպքերը մինիմումի բերելու համար:
Փաստաբան ՀՈՎԻԿ ԱՐՍԵՆՅԱՆԸ ընդգծեց.
-Այսպիսի դեպքերում օրենքը տեղին չի կիրառվում, երբ արդարադատությունը կամ  դատական իշխանությունը իր դերում չէ, երբ օրենքը չի գործում միասնական, եւ քաղաքացին չի հասնում արդարության: Տվյալ պարագայում գործողությունները տեղի են ունենում օրենքից դուրս: Բոլոր դեպքերը եթե լավ ուսումնասիրվեն, ապա կտեսնենք, որ թվարկածս բոլոր գործոններն առկա են: Ամեն ինչ պետք է իրականացվի գործող օրենքի շրջանակներում:

Z-PR սոցհարցման կենտրոնը Երեւան քաղաքում 100 հոգու շրջանում կատարել է հարցում` պարզելու համար, թե նրանց կարծիքով ինչո՞ւ Է  Հայաստանում ավելացել քրեական հանցագործությունների թիվը.
1. Անպատժելիության մթնոլորտում քրեական հանցագործությունները ավելանում են - 49%:
2. Սոցիալական պայմանները եւ անհանդուրժողականությունը բերում է հանցագործությունների- 23%:
3. Ունենք այն մեծ խնդիրը, որ հասարակությունն է արդեն հանցագործին համարում հեղինակություն: Առավել, քան գիտնականին, զինվորականին, ոստիկանին եւ այլն: Իսկ երետասարդությունն էլ, իհարկե, պետք է հեղինակությունների օրինակով շարժվի. 18%:
4. Նախկինում եւս եղել են նման դեպքեր, պարզապես այսօր ավելի ցայտուն են դարձել, քանի որ ամեն ինչ դարձել է հրապարակային- 7%:
5. Դժվարանում եմ պատասխանել - 3%:

ԶՎԱՐԹ ԽԱՉԱՏՐՅԱՆ