«ԶԱՐՄԱՆՈՒՄ ԵՄ, ԹԵ ԻՆՉՊԵՍ Է ՓՈՍՏԱՆՋՅԱՆԻ ԱՄՈՒՍԻՆԸ ԹՈՒՅԼ ՏԱԼԻՍ ԻՐ ԿՆՈՋԸ ՆՄԱՆ ՊԱՀՎԱԾՔ ՈՒՆԵՆԱԼ...»

«ԶԱՐՄԱՆՈՒՄ ԵՄ, ԹԵ ԻՆՉՊԵՍ Է ՓՈՍՏԱՆՋՅԱՆԻ ԱՄՈՒՍԻՆԸ ԹՈՒՅԼ ՏԱԼԻՍ ԻՐ ԿՆՈՋԸ ՆՄԱՆ ՊԱՀՎԱԾՔ ՈՒՆԵՆԱԼ...»

Հայաստանյան ներքաղաքական կյանքում կարծես տեւական անդորր է, եթե հաշվի չառնենք նորաթուխ ընդդիմություն դարձած ԲՀԿ-ի կազմաքանդման գործընթացը եւ որոշ ընդդիմադիր գործիչների արտասահմանյան քաղաքական «խաղերը»: Հենց այս ամենի շուրջ էլ «Իրավունքը» զրուցեց ԱԺ ՀՀԿ խմբակցության պատգամավոր ԱՇՈՏ ԱՂԱԲԱԲՅԱՆԻ հետ:

«ԵԹԵ ԱՌԱՋԻՆԸ ՉԿԱ, ՊԻՏԻ ԿԱՌՈՒՅՑԸ ՔԱՆԴՎԻ»

–Պարոն Աղաբաբյան, ինչպե՞ս կգնահատեք հանրապետության թիվ երկրորդ կուսակցությունը համարվող ԲՀԿ-ի ներկայիս վիճակը, երբ օր օրի նոր մարդիկ են դուրս գալիս իրենց կազմից:

– Անկեղծ ասած, տեղյակ չեմ, բայց համարում եմ բնական երեւույթ: Այն` որպես կուսակցություն, չէր կարող այդքան ուժեղ լինել, որովհետեւ մի հոգու էին տեսնում կուսակցության ղեկավար, չկար երկրորդը, երրորդը... Եվ, բնականաբար, եթե առաջինը չկա, պիտի կառույցը քանդվի: Հետեւաբար, ԲՀԿ-ում այսօր քանդվելու գործընթացը շարունակվում է:
– Արդեն որոշակի տեղեկություններ կան, որ ԲՀԿ-ից դուրս եկած մի քանի պատգամավորներ պատաստվում են ՕԵԿ-ի մաս կազմել: Ի՞նչ կասեք այս մասին:
– Դե, երբ մի կառույց փլվում է, բնականաբար, այդ կառույցի այն անդամները, որոնք փլուզվողներից են, պիտի գնան մի տեղ ու փորձեն տեղավորվել: Օրինակ` ես հանկարծ, Աստված չանի, կուսակցությունից դուրս գամ, պատգամավորությունից էլ դուրս կգամ եւ ընդհանրապես կդառնամ սովորական քաղաքացի:
– Այսինքն` ոչ պատվաբե՞ր եք համարում կուսակցությունից դուրս գալը, սակայն կառչած մնալը մանդատից:
– Իհարկե, եթե դու կուսակցություն ես ունեցել եւ հարգել ես այդ կուսակցության որոշումները եւ կանոնադրությունը, չի կարելի այդպես վարվել:
– Ի վերջո, դառնալով ընդդիմություն` ըստ Ձեզ, ԲՀԿ-ի վարկանիշը կբարձրանա՞:
– Իմ կարծիքով` բան չի փոխվի, որովհետեւ նրանց նկատմամբ հավատը կորցրեց ժողովուրդը:

«ԱԶԱՏԱՄԱՐՏԻԿԸ ՉԻ ԿԱՐՈՂ ԿՈՒՍԱԿՑՈՒԹՅԱՆԸ ԼԻՆԵԼ»

–ԲՀԿ-ական ազատամարտիկ պատգամավորներ Ռուստամ Գասպարյանի եւ Ռուբեն Գեւորգյանի ու հանրապետական ազատամարտիկների միջեւ ակնհայտ հակասություն կար: Արդյո՞ք Գ. Ծառուկյանի` «Բարգավաճ Հայաստանից» հեռանալով` նաեւ այս փոխհարաբերությունները կվերանայվեն:
– Չեմ նկատել ու չեմ էլ մտածում, որ կարող էին Ռուբիկը կամ Ռուստամը ազատամարտիկների մեջ ինչ-որ հակասություն տարածել:
Ազատամարտիկներն առանձին երեւույթ են աշխարհում, եւ, իմ կարծիքով, նրանք իրար վիրավորելու ոչինչ չունեն: Չեմ կարծում, որ Հանրապետականի, «Բարգավաճի» կամ չգիտեմ որ կուսակցության ազատամարտիկներ կան, ազատամարտիկը հայ ժողովրդինն է, Հայաստանինն է, նրանց պետք չէ կուսակցականացնել:
– Այսինքն` կարո՞ղ ենք ասել, որ հիմա գոնե ազատամարտիկներն ավելի համախմբված կլինեն:
– Չգիտեմ ով ինչպես, բայց ես ասում եմ, որ ազատամարտիկ նշանակում է լինել հայրենիքինը, ոչ թե որեւիցե կուսակցությանը: Եթե որեւիցե կուսակցության ազատամարտիկ կա, ապա ես նրան դատապարտված եմ համարում:
– Նաեւ մամուլում շրջանառվում էր, թե Ռ. Գեւորգյանը մեղադրել է Գ. Ծառուկյանին, թե կուսակցական խնդիրների պատճառով մեզ մեր ազատամարտիկ ախպերների հետ փորձեցիք կռվեցնել...
– Ամեն մարդ խոսում է իր գիտակցության չափանիշներով: Իմ չափանիշը սա է, նորից եմ կրկնում` ազատամարտիկը չի կարող կուսակցությանը լինել, այլ միայն կարող է լինել իր հայրենիքինն ու իր պետությանը:

«ՇԱՏ ՄԵԾ ՍԽԱԼ Է ԹՈՒՅԼ ՏՎԵԼ ԼԵՎՈՆ ՏԵՐ-ՊԵՏՐՈՍՅԱՆԸ»

–Գրեթե մեկ ամիս է մնացել, որ նշենք Ցեղասպանության 100-րդ տարելիցը եւ տեսնում ենք, թե ինչպես է ՀՀ առաջին նախագահ Լեւոն Տեր-Պետրոսյանը հանդիպումներ ունենում Եվրամիության անդամ երկրների դեսպանների հետ ու բողոքում 100-րդ տարելիցին նվիրված Համահայկական հռչակագրից: Ինչպե՞ս եք վերաբերում այս երեւույթին:
– Եթե պատմության էջերը թերթեք, կտեսնեք, որ հայ ժողովուրդը երբեմն ոչ բարեկամի «փեշերն ընկնելու» բնավորություն ունի, որովհետեւ չկան բարեկամներ, կան շահեր: Պետք չէ մեր երկրի ներքին գործերը, մեր լուծելու խնդիրները փաթաթել ուրիշների վզին: Միեւնույնն է, դա արհամարհված է լինելու, որովհետեւ ոչ մեկը չի սիրում, որ իր հարեւանի ներքին խոհանոցից իրենց տանը խոսեն: Դա ճիշտ բան չէ: Համարում եմ, որ շատ մեծ սխալ է թույլ տվել Լեւոն Տեր-Պետրոսյանը: Չի՛ կարելի գնալ սրա-նրա դուռը ու բողոքել քո երկրից: Այսինքն` ինքն իր տնից գնացել է ուրիշի՞ն է բողոքում, ինչպե՞ս կարելի է: Ուրեմն` նա տան անդամ չէ արդեն, ինքն իրեն զրկեց այդ տան անդամը լինելուց:
– Ի դեպ, այս իրավիճակում, երբ ներքաղաքական ու արտաքին քաղաքական բազմաթիվ խնդիրներ ունենք, ԱԺ «Ժառանգություն» խմբակցության պատգամավոր Զարուհի Փոստանջյանն այս շրջանում լծվել է համասեռամոլների պաշտպանությամբ: Ինչպե՞ս կգնահատեք այն, որ պատգամավորն իր մանդատը հանուն նման երեւույթների լոբբինգի է օգտագործում:
– Ընդհանրապես այդ կնոջ մասին ասելիք չունեմ:
– Իսկ ինչո՞վ է պայմանավորված:
– Նա այդքան երեխա ունի, թող իր երեխաներով զբաղվի, ոչ թե նման խնդիրներով: Զարմանում եմ, թե ինչպես է Փոստանջյանի ամուսինը թույլ տալիս իր կնոջը նման պահվածք ունենալ եւ նման թեմաներով զբաղվել:

ՀՐԱՆՏ ՍԱՐԱՖՅԱՆ