Ո՞Վ Է ՍՏՈՒՄ` ԱՀԱՐՈՆ ԱԴԻԲԵԿՅԱ՞ՆԸ, ԱՐԹՈՒՐ ԲԱՂԴԱՍԱՐՅԱ՞ՆԸ ԹԵ՞ ՎԱՀԱՆ ԲԱԲԱՅԱՆԸ

Ո՞Վ Է  ՍՏՈՒՄ` ԱՀԱՐՈՆ ԱԴԻԲԵԿՅԱ՞ՆԸ, ԱՐԹՈՒՐ ԲԱՂԴԱՍԱՐՅԱ՞ՆԸ, ԹԵ՞ ՎԱՀԱՆ ԲԱԲԱՅԱՆԸ

Սոցիոլոգ Ահարոն Ադիբեկյանն օրեր  առաջ հայտարարել է, որ  ԲՀԿ-ից հեռացած ինը պատգամավոր հայտ է ներկայացրել անդամագրվելու ՕԵԿ-ին: «Իրավունքը» սոցիոլոգից հետաքրքրվեց`ովքեր են այդ ինը պատգամավորները: «Ես անունները չգիտեմ այդ  պատգամավորների ու չեմ էլ ուզում ասեմ: Դա ինտիմ, մասնավոր գործ է: Ժամանակը կանցնի, երբ իրենք կանդամակցեն, ամեն ինչ պարզ կլինի»,- ասաց Ադիբեկյանը:

Սոցիոլոգը հիշեցրեց` ԲՀԿ-ը  տրոհվում  է հստակ ուղղություններով.

- ԲՀԿ-ականների մի մասը կդառնան ՀՀԿ-ը, մի մասը  կարող է  դառնա չափավոր ընդդիմություն, մի մասն էլ` արմատական ընդդիմություն: Կուսակցության մի փոքր միջուկը կպահպանի ԲՀԿ-ի անվանվումը, բայց գոյատեւումը հարցականի տակ է դրվում` արդյոք առանց Ծառուկյանի`  կկարողանան կուսակցական պայքարը, այդքան մարդկանց աշխատավարձ տան, տարածքային կառույցներ ունենան»:

- Այդ ինը հոգին գործարար թեւի ներկայացուցիչնե՞ր են:

- Ես անուններ չեմ հարցրել, բամբասանքներով չեմ զբաղվում: Ինձ  ՕԵԿ-ի պաշտոնական դեմքն (ՕԵԿ առաջնորդ Արթուր Բաղդասարյանին նկատի ունի-խմբ.) ու Մհեր Շահգելդյանն են այդ մասին ասել:

- Իսկ ինչո՞ւ այդ մասին  ՕԵԿ-ը չի հայտարարում, այլ Դուք :

- Երբ այդ տեղեկատվությունը ստացա, հարցրի` կարող եմ սա տարածել, ասաց` այո, իհարկե, դա հո գաղտնիք չէ:

- ՕԵԿ-ին անդամագրվելու ցանկություն հայտնածները  Արթուր Բաղդասարյանի՞ն են տեսնում որպես երկրորդ Գագիկ Ծառուկյան:

- Ոչ, ոչ: Այդ ինը հոգին չեն ցանկանում մտնել  ՀՀԿ, չեն ցանկանում «Ժառանգությանն» ու ՀԱԿ-ին, ամենահարմար հանգրվանն ՕԵԿ-ն է:

Կապ հաստատեցինք նաեւ  ԲՀԿ մամուլի ժամանակավոր պատասխանատու Վահան Բաբայանի հետ: Վերջինս հերքեց այդ տեղեկությունները` դրանք համարելով անհեթեթություն:

«Այդ լուրերն իրականությանը չեն համապատասխանում: Եթե երկրում մնացել  են մարդիկ, որոնք  հավատում են Ահարոն Ադիբեկյանի վերլուծություններին, աբսուրդ է»,- ասաց պրն Բաբայանը:

Ըստ Վահան Բաբայանի` Ահարոն Ադիբեկյանը ինը պատգամավորի փոխարեն կարող էր ասել 29, 39: «Հիմա ուզում եք, որ ես դա մեկնաբանե՞մ: Դա ապատեղեկատվություն է: Պետք չէ լուրջ վերաբերվել նման հայտարարություններին»,- եզրափակեց Բաբայանը:

ՍՈՆԱ ԴԱՎԹՅԱՆ