ՀՐԱՉԻԿ ԲԱԲԱՅԱՆ.ՙԱՐԴՅՈՒՆՔԻՑՍ ԳՈՀ ՉԵՄ՚

ՀՐԱՉԻԿ ԲԱԲԱՅԱՆ.ՙԱՐԴՅՈՒՆՔԻՑՍ ԳՈՀ ՉԵՄ՚

Հոլանդական Առնեմում կայացած Հրաձգության Եվրոպայի երիտասարդների եւ մեծահասակների առաջնությունում Հայաստանը ներկայացրին 11 մարզիկ: Հայ հրաձիգները մրցաշարից վերադարձան ոչ միայն լավ ելույթների տպավորություններով, այլեւ ոսկե մեդալով:

Վազող թիրախ, 10մ, երիտասարդ աղջիկների պայքարում Լիլիթ Մկրտչյանը 6:4 հաշվով եզրափակչում հաղթելով գործող չեմպիոն հունգարուհի Վերոնիկա Մայոռին`դարձել է Եվրոպայի չեմպիոն. աշխարհի գործող չեմպիոն Վ. Մայոռը բավարարվեց 2-րդ տեղով:
Հայաստանը ներկայացնող պատանեկան օլիմպիական խաղերի եւ աշխարհի երիտասարդական առաջնության փոխչեմպիոն 18-ամյա Հրաչիկ Բաբայանը 63 տղամարդկանց պայքարում խոցել է 622,0 միավոր եւ գրավել 18-րդ տեղը: Իր ելույթների եւ առաջիկա անելիքների մասին "Իրավունքի" հետ զրույցում Հրաչիկ Բաբայանը նշեց. "Եվրոպայի առաջնությունում առաջին անգամ էի մասնակցում մեծահասակների պայքարին: Արդյունքներիցս գոհ չեմ. 4 միավոր ցածր էր, իսկ եզրափակիչ անցնելու համար չբավավարեց 1.4 միավոր: Այս տարի ունեմ եւս երկու կարեւոր մրցաշար: Առաջինն Աշխարհի գավաթն է, որտեղ դարձյալ մեծահասակների հետ եմ պայքարելու: Եվ երկրորդը` Եվրոպայի խաղերը Բաքվում, եթե իհարկե Հայաստանի թիմը մասնակցի":
Առաջնության մթնոլորտը Հրաչիկ Բաբայանը գնահատում է դրական. "Ընդհանրապես, ամեն ինչ շատ լավ էր: Մրցակիցներս շատ ուժեղ եւ փորձառու հրաձիգներ էին: Մասնակցում էին թե՛ օլիմպիական չեմպիոններ, թե՛ աշխարհի առաջնության հաղթողներ: Ըստ իմ ունեցած հնարավորությունների` կարող էի անցնել եզրափակիչ, բայց որոշ թերությունների պատճառով չստացվեց: Այդ թերությունները տեխնիկական էին, բայց ավելի շատ` հոգեբանական":
Հայաստանի հավաքականի թիմի մյուս մարզիկները գրանցել են հետեւյալ արդյունքները. վազող թիրախ, 10մ, երիտասարդ տղաների պայքարում (30+30 կրակոց) 16 մրցակիցների մեջ Շանթ Սարգսյանը 552 միավորով գրավել է 5-րդ տեղը եւ չի անցել կիսաեզրափակիչ փուլ: Ռազմիկ Մինասյանը 527 միավորով գրավել է 13-րդ տեղը: Նրան հաջորդել է 524 միավոր խոցած Արթուր Պետրոսյանը: Թիմային պայքարում տղաների եռյակը գրավել է 4-րդ տեղը: Օդամղիչ հրացան, 10մ, կանանց պայքարում (40 կրակոց) 71 մասնակցից Իրինա Լաուերը (Աղաջանյան) 405,6 միավորով գրավել է 63-րդ տեղը: Օդամղիչ ատրճանակ, 10մ, տղամարդկանց պայքարում (60 կրակոց) 57 մրցակցների մեջ Նորայր Առաքելյանը 573 միավորով գրավել է 24-րդ տեղը: Իսկ մրցաշարի ամենաերիտասարդ մասնակից` 12-ամյա Հայկ Բաբայանը օդամղիչ հրացան, 10մ, երիտասարդ տղաների պայքարում (60 կրակոց) 47 մրցակիցների միջեւ 608,9 միավորով գրավել է 35-րդ տեղը: Իսկ օդամղիչ ատրճանակ, 10մ, երիտասարդ տղաների պայքարում (60 կրակոց) 51 մրցակցից Զավեն Իգիթյանը մրցելույթն ավարտել է` գրավելով 5-րդ տեղը: Օդամղիչ հրացան, 10մ, երիտասարդ աղջիկների պայքարում (40 կրակոց) 66 մրցակցից Մարիամ Միքայելյանը 408.9 միավորով գրավել էր 33-րդ տեղը:
Հավելենք, որ Եվրոպայի առաջնությանը մասնակցում էին 43 երկրի 521 մարզիկ:

ՔՐԻՍՏԻՆԵ ՊԵՏՐՈՍՅԱՆ