ՈՐՆ ԷՐ ԳՅՈՒՄՐՈՒ ՀԵՐԹԱԿԱՆ ԿՐԱԿՈՑՆԵՐԻ ՊԱՏՃԱՌԸ

ՈՐՆ ԷՐ ԳՅՈՒՄՐՈՒ
ՀԵՐԹԱԿԱՆ ԿՐԱԿՈՑՆԵՐԻ ՊԱՏՃԱՌԸ

Գյումրիում մարտի 7-ին կրկին կրակոցներ հնչեցին: Այս անգամª հիվանդանոց տեղափոխվեց վեց մարդ` Ղազարյան Սմբատը, Ղազարյան Գագիկը, Ղազարյան Կնյազը, Հակոբյան Վլադիմիրը, Գեւորգյան Համլետը, Ղուկասյան Գագիկը: Վիրավորներից 3-ը հրազենային վնասվածքներ են ստացել, իսկ մյուսները վիրավորվել են կտրող-ծակող գործիքներից: Վիրավորներից Կնյազ Ղազարյանը գանգուղեղային վնասվածք է ստացել հրազենից եւ այս պահին միացված է արհեստական շնչառության ապարատին: Նրա եղբայրը` Գագիկ Ղազարյանը, ուսահոդի վնասվածք է ստացել հրազենից: Նրան գիշերը վիրահատել են, այս պահին վիճակը կայուն է, ինքնուրույն է շնչում: Երրորդ վիրավորը նրանց հակառակորդ ճամբարից է` Գագիկ Ղուկասյանը, ով ծանր գանգուղեղային վնասվածք է ստացել բութ գործիքով հարվածից (ոչ հրազենից): Նա եւս ինքնուրույն է շնչում: Միջադեպի վերաբերյալ զրուցեցինք ԱԺ գյումրեցի պատգամավոր ՍՈՒՔԻԱՍ ԱՎԵՏԻՍՅԱՆԻ հետ, ով ճանաչում է միջադեպի մասնակիցներին եւ որոշ չափով տեղյակ է կատարվածի մանրամասներին:
-Սկսենք հետեւյալ տխուր փաստն արձանագրելուց. վերջին ամիսներին Գյումրիում անընդհատ անցանկալի միջադեպեր են տեղի ունենում:
- Նախ ցավում եմ, որ հատկապես այս տարի Գյումրիում նմանատիպ դեպքերը շատացել են, որը, արդեն, իրոք մտահոգիչ է: Ամենացավալին այն է, որ կենցաղային հողի վրա տեղի ունեցող փոքրիկ վիճաբանությունները վերածվում են նմանատիպ անցանկալի ընդհարումների: Եվ, այս պարագայում, կարծում եմ, որ մեր հասարակությունը պետք է ավելի հանդուրժող լինի, քանի որ վերջին դեպքերը փաստում են այն մասին, որ խնդիրն ընդամենը անհանդուրժողականությունն է: Փոխանակ մեկս մյուսի նկատմամբ ավելի հանդուրժող լինի եւ փորձենք մարել վեճի փոքրիկ օջախները, ցավոք դրանք դարձնում ենք ավելի լուրջ ընդհարումների եւ կոնֆլիկտների պատճառ:
- Իսկ Դուք հանդիպե՞լ եք միջադեպի մասնակիցների հետ:
- Անկեղծ ասած` ես այդ ծեծկռտուքի մասնակիցներին բոլորին էլ գիտեմ, եւ միջադեպի մանրամասներին էլ ինչ-որ չափով տիրապետում եմ:
- Կկիսվե՞ք Ձեր ունեցած տեղեկատվությամբ մեզ հետ, ի՞նչ  վարկածներ են շրջանառվում:
- Այստեղ վարկածի խնդիր չկա. հստակ է, որ միջադեպը տեղի է ունեցել կենցաղային հողի վրա ծագած վիճաբանությունից, որն ավարտվել է կրակոցներով: Եվ այստեղ ես նաեւ մեղադրում եմ այն մարդկանց, ծնողներին, ովքեր ժամանակին չեն կարողացել դրա դեմն առնել, քանի որ իսկապես մտահոգիչ է, որ երբ մի փոքր կենցաղային վեճը ավարտվում է նմանատիպ ցավալի հետեւանքներով:
- Կենցաղային վեճ ասելով` ի՞նչ նկատի ունեք, մասնավորապես ի՞նչն է տվյալ պարագայում կրակոցների պատճառ հանդիսացել:
- Իմ ունեցած տեղեկատվությամբª մի քանի ամիս առաջ հարսանիքի ժամանակ տեղի ունեցած կոնֆլիկտի շարունակությունն էր: Ամիսներ  շարունակ այդ վեճը թեժացել-թեժացել եւ մարտի 7-ին էլ հանգել է նմանատիպ միջադեպի: Ճանաչելով միջադեպի մասնակիցներին, երբեք չէի մտածի, որ տվյալ անձինք կարող են այդ միջադեպի կիզակետում հայտնվել, առավելեւս միջադեպի պատճառը լինել: Քանի որ բոլորն էլ լուրջ մարդիկ են, թաղում, քաղաքում ճանաչված, եւ մինչ օրս էլ չեմ հասկանում, թե ինչն էր խանգարում, որ չկարողացան միմյանց հետ լեզու գտնել, քննարկել եւ խնդիրը լուծել: Առավել եւս, որ ո՛չ խոշոր բիզնեսի բաժանման խնդիր է եղել, ո՛չ պարտք ու տալիքի. խնդիրը ընդամենը հասարակ վիրավորվածություն էր, եւ այն վերածվեց ցավալի իրադարձության, որի մեջ ներգրավված են տասնյակ մարդիկ, կան վեց վիրավորներ: Ու անհասկանալին այն է, որ նրանցից որեւէ մեկի մոտ ցանկություն չի եղել այս հարցը խաղաղ ճանապարհով լուծելու:
Ինձ համար եւ այսօր ցանկացած գյումրեցու համար էականն ու մտահոգիչն այն է, որ եթե ցանկացած փոքր վեճ հասունացնեն նման ընդհարումների, ապա սա լավ բանի չի բերի: Շատ վատ է սա, մեզ մոտ անհանդուրժողականության խնդիր կա, որ գնալով խորանում է:

ԻԼՈՆԱ ԱԶԱՐՅԱՆ